//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

(2) བྱང་ཆུབ་སེམས་དཔའི་སྡོམ་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 10:10:47 ཀློག་གྲངས། 457 

  གཉིས་པ་བྱང་སྡོམ་ནི། ས་པཎ་གྱིས། སེམས་བསྐྱེད་ལ་ནི་ཉན་ཐོས་དང་།། ཐེག་པ་ཆེན་པོ་ལུགས་གཉིས་ཡོད།། ཅེས་སེམས་བསྐྱེད་ལ་ཐེག་པ་ཆེ་ཆུང་གཉིས་ཀྱི་དམན་པ་ལ་དགྲ་བཅོམ་རང་རྒྱལ་སངས་རྒྱས་གསུམ་གྱི་སེམས་བསྐྱེད་ཡོད་ཀྱང་དེ་དག་གངས་ཅན་དུ་མ་དར། ཐེག་པ་ཆེན་པོའི་འཇུག་པ་སེམས་བསྐྱེད་ཆོ་གས་བཟུང་ནས་བྱང་སེམས་ཀྱི་སྡོམ་པ་མནོས་ཏེ་ཚུལ་བཞིན་སློབ་པ་ལ་བོད་ཀྱི་མཁས་པ་མང་པོ་མི་ཕམ་འཕགས་པ་ཐོགས་མེད་དང་དཔལ་མགོན་ཀླུ་སྟེ་ཤིང་རྟ་ཆེན་པོ་གཉིས་པ་ལ་དབུ་སེམས་གཉིས་སུ་བཞེད་པ་ལྟར་འདིར་ཡང་། མགོན་པོ་བྱམས་པས། བཤེས་གཉེན་དུལ་བ་ཞི་བ་ཉེར་ཞི་བ།། སོགས་དང་ཀླུས། ཆོག་ཤེས་སྙིང་རྗེ་ཚུལ་ཁྲིམས་ལྡན། ཞེས་སོགས་གསུངས་པས་བླང་བྱའི་ཡུལ་མི་འདྲ། སེམས་ཙམ་པ། སོ་སོ་ཐར་བ་རིགས་བདུན་གྱི།། ནས། སྐལ་བ་ཡོད་ཀྱི་གཞན་དུ་མིན།། ཞེས་བྱང་སྡོམ་ལེན་རྟེན་ལ་སོ་ཐར་རིགས་བདུན་གང་རུང་དང་ལྡན་དགོས་པ་དང་། དབུ་མ་བ་འགྲོ་བ་རིགས་དྲུག་མཐའ་དག་དང་རྒྱལ་པོ་ནས་ཤན་པའི་བར་ཐམས་ཅད་ལ་སྐྱེ་བར་བཞེད་པས་ལེན་པའི་གང་ཟག་མི་འདྲ་བས་མཚོན། བླང་བའི་ཆོ་ག བླངས་ནས་བསྲུང་ཚུལ། ཉམས་ན་ཕྱིར་བཅོས་ལ་སོགས་པ་མི་འདྲ་བ་ཡོད་པར་གསུངས་ཀྱང་། མཁས་གྲུབ་དགེ་ལེགས་དཔལ་བཟང་པོའི་སྡོམ་གསུམ་རྣམ་བཞག་ཐུབ་བསྟན་བྱི་དོར་དུ། དང་པོ་ཁོ་ནར་བླང་བའི་ཡུལ་མི་འདྲ་བའི་ཚུལ་སྨྲས་པ་དེ་མི་འཐད་དེ། ལུང་དེ་གཉིས་ཚིག་ཐ་དད་པ་ཙམ་དུ་ཟད་ཀྱི། དེས་བསྟན་པའི་དགེ་བའི་བཤེས་གཉེན་གྱི་མཚན་ཉིད་ཅུང་ཟད་རྒྱས་བསྡུས་མ་གཏོགས་དོན་གཅིག་ཏུ་སྣང་བའི་ཕྱིར་རོ།། ཞེས་མི་འདྲ་བའི་ཁྱད་པར་ཐམས་ཅད་བཀག་ཅིང་། དེའི་ཕྱིར་འཕགས་པ་ཀླུ་སྒྲུབ་དང་ཐོགས་མེད་གཉིས་ཆོ་གའི་ཡན་ལག་འགའ་ཞིག་མི་འདྲ་བ་མ་གཏོགས་སྡོམ་པ་ཐོབ་པའི་ཆོ་ག་ལ་དོན་ལ་ཁྱད་པར་མེད་ཅིང་། གཞན་དག་དབུ་མ་ལུགས་ཀྱི་ཕྱོགས་སུ་འདོད་པའི་སློབ་དཔོན་ཛི་ཏ་རེས་ཀྱང་སྨོན་སེམས་དང་སྡོམ་པ་བཟུང་བའི་རིམ་པ་གཉིས་མཛད་ལ། ཞེས་གསུངས་པ་ལྟར་མདོར་བསྡུས་ན། མི་ཕམ་འཕགས་པ་ཐོགས་མེད་ཀྱིས་བྱང་སའི་ཚུལ་ཁྲིམས་ལེའུ་ལས། ངོ་བོ་ཉིད་དང་ཐམས་ཅད་དང་།། དཀའ་བ་དང་ནི་སྒོ་ཀུན་དང་།། སྐྱེས་བུ་དམ་པ་ལྡན་པ་དང་།། དེ་བཞིན་རྣམ་པ་ཐམས་ཅད་དང་།། ཕོངས་ཤིང་འདོད་དང་ལྡན་པ་དང་།། འདི་དང་གཞན་དུ་བདེ་འགྱུར་དང་།། རྣམ་པར་དག་དང་རྣམ་དགུ་སྟེ།། མདོར་ན་ཚུལ་ཁྲིམས་དེ་ཡིན་ནོ།། ཞེས་སྤྱིའི་མཚན་ཉིད་དེ་ངོ་བོ། དངོས་པོའི་དབྱེ་བས་ཐམས་ཅད། སྒྲུབ་དཀའ་བ་ལ་འཇུག་པས་ཐུན་མོང་མ་ཡིན་པའི་ཁྱད་པར། ཇི་ལྟར་འཇུག་པའི་དབྱེ་བའི་སྒོ། བྱེད་པ་བོ་རྟེན་གྱི་ཁྱད་པར་སྐྱེས་བུ་དམ་པ། རྣམ་པའི་རབ་ཏུ་དབྱེ་བ་ཐམས་ཅད། ཡུལ་དང་བྱེད་པའི་ཁྱད་པར་གྱི་ཕོངས་ཤིང་འདོད་པ། འབྲས་བུའི་ཁྱད་པར་གྱི་འདི་དང་གཞན་དུ་བདེ་བ་དང་། རྣམ་པར་དག་པ་སྟེ། བྱང་སྡོམ་ལ་ས་བཅད་དམ་རྣམ་གྲངས་དགུར་བཞེད་པའི་ཚུལ་ཁྲིམས་ཀྱི་ངོ་བོ་ལ་སྡོམ་པ་ནོད་པའི་ཡུལ། ལེན་པར་བྱེད་པའི་གང་ཟག གང་སྲུང་བར་བྱེད་པའི་ཚུལ་ཁྲིམས། དེ་ཉིད་ཇི་ལྟར་སྲུང་བའི་ཚུལ། སྡོམ་པ་གཏོང་བའི་རྒྱུ། ཉམས་ན་ཕྱིར་བཅོས་པའི་སྒོ་རྣམས་ཀྱིས་གཏན་ལ་འབེབས་པ་ལས། དང་པོ་སྡོམ་པ་ནོད་པའི་ཡུལ་ལ་སློབ་དཔོན་ཡོད་པ་དང་མེད་པ་གཉིས་ལས། དང་པོ་སྡོམ་པ་ནོད་ཡུལ་སྨོན་སེམས་བསྐྱེད་པ། བྱང་སྡོམ་ལ་གནས་པ། ཐེག་པ་ཆེན་པོ་ལ་མཁས་པ། བསླབ་པ་ནོད་པར་གསོལ་བ་འདེབས་པ་ལ་སོགས་པའི་ངག་གི་རྣམ་པར་རིག་བྱེད་ཀྱི་ཚིག་འབྲུ་འཛིན་ནུས་ཤིང་དོན་གོ་བ་ལས་བླང་བར་བྱ་སྟེ་སློབ་དཔོན་ཙནྡྲ་གོ་མིའི་སྡོམ་པ་ཉི་ཤུ་པར། བྱང་ཆུབ་སེམས་དཔའ་རྣམས་ཀྱི་ཁྲིམས།། བསོད་ནམས་ཀུན་གྱི་གཏེར་གྱུར་གང་།། དེ་ནི་བསམ་པ་དམ་པ་ཡིས།། བླ་མ་སྡོམ་ལ་གནས་ཤིང་མཁས།། ནུས་དང་ལྡན་ལས་བླང་བར་བྱ།། ཞེས་གསུངས་པའི་ལྟར་བྱང་སྡོམ་འབོགས་པའི་མཚན་ཉིད་དང་ལྡན་པའི་བླ་མའམ། དེ་མ་རྙེད་ན་བྱང་ས་ལས། དེ་བཞིན་གཤེགས་པའི་སྐུ་གཟུགས་དེ་ཉིད་ཀྱི་སྤྱན་སྔར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་བཞུགས་ཤིང་འཚོ་བ་ཐམས་ཅད་ཀྱི་ཞབས་ལ་གཏུགས་ཏེ། ཞེས་པ་ལྟར་དེ་བཞིན་གཤེགས་པ་ཤཱཀྱ་ཐུབ་པ་ལ་སོགས་པའི་སྐུ་གཟུགས་ཀྱི་སྤྱན་སྔར་ཡན་ལག་བདུན་པ་སོགས་སྔོན་དུ་བཏང་། རང་ཉིད་ཀྱིས་ཕྱོགས་བཅུའི་རྒྱལ་བ་སྲས་དང་བཅས་པ་ལ་མཁྱེན་པར་གསོལ་ཏེ། དུས་གསུམ་གྱི་བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞི་མཐའ་དག་ལ་སློབ་པར་ཁས་ལེན་པ་ལན་གསུམ་གྱིས་ལེན་པར་བྱ་བ་ཡིན་ལ། ལེན་པའི་རྟེན་ནམ་གང་ཟག་ཀྱང་རྒྱ་གར་གྱི་གྲུབ་ཆེན་ཛེ་ཏ་རིས། རིགས་ཀྱི་བུའམ་རིགས་ཀྱི་བུ་མོ་རྟེན་དང་བསམ་པ་ཕུན་སུམ་ཚོགས་པ་དང་ལྡན་པས། ཞེས་གསུངས་པ་ལྟར་ལྷ་དང་ཀླུ་ལ་སོགས་པ་རྟེན་དེ་ལ་རྫོགས་པའི་བྱང་ཆུབ་དོན་གཉེར་གྱི་སེམས་བསྐྱེད་རུང་བ་ཐམས་ཅད་སྨོན་སེམས་ལེན་པ་ཙམ་གྱི་རྟེན་དུ་རུང་ཡང་། བྱང་སེམས་ཀྱི་སྡོམ་པའི་དངོས་རྟེན་མཚན་ཉིད་ཚང་བར་སོང་བའི་སྨོན་སེམས་ཆོ་གས་འཛིན་པའི་རྟེན་ལ་ནི། སྐྱེས་བུ་ཆུང་འབྲིང་དང་ཐུན་མོང་གི་བསམ་པ་དང་མན་ངག་རྒྱུ་འབྲས་བདུན་ལ་སོགས་པ་ལ་ལེགས་པར་བློ་སྦྱངས་པས། བྱང་ཆུབ་ཀྱི་སེམས་ལ་ཡིད་འགྱུར་བའི་མྱོང་བ་སྣ་ཟིན་རྒྱུད་ལ་སྐྱེས་པ་ཡན་ཆད་གཅིག་དགོས་ཞེས་མཁས་གྲུབ་རྗེས་གསུངས་ལ། ཇོ་བོ་ཨ་ཏི་ཤས་ལམ་སྒྲོན་དུ། སོ་སོ་ཐར་བ་རིས་བདུན་གྱི།། རྟག་ཏུ་སྡོམ་གཞན་ལྡན་པ་དག། བྱང་ཆུབ་སེམས་དཔའི་སྡོམ་པ་ཡི།། སྐལ་བ་ཡོད་ཀྱི་གཞན་དུ་མིན།། ཞེས་པ་འདི་ལ། འཇམ་མགོན་བཙོང་ཁ་བ་ཆེན་པོས་བྱང་ཆུབ་གཞུང་ལམ་དུ། ཞེས་གསུངས་པའི་ལུང་ལས་དང་པོ་བ་ལ་སོ་ཐར་རིས་བདུན་གང་རུང་མེད་ན་ཚུལ་ཁྲིམས་ཀྱི་སྡོམ་པ་ཁྱད་པར་ཅན་སྐྱེ་བའི་སྐལ་བ་མེད་ལ། སོ་ཐར་རིགས་བདུན་དང་ཐུན་མོང་བ་རང་བཞིན་སྤོང་བ་མེད་ན་བྱང་སེམས་ཀྱི་སྡོམ་པ་ཙམ་སྐྱེ་བའི་སྐལ་བ་མེད་ཅེས་སྟོན་པ་ཡིན་གྱི། སོ་ཐར་རིགས་བདུན་མཚན་ཉིད་པ་གཅིག་མེད་ན་བྱང་སེམས་ཀྱི་སྡོམ་པ་མི་སྐྱེ་བར་བཞེད་པ་མིན་ཏེ། ཞེས་ལམ་སྒྲོན་འགྲེལ་བ་དང་། ཐུབ་དགོངས་འདྲེན་པར་མཛད་ལ། གཞན་ཡང་དེ་ལྟར་ན་ལྷ་ལ་བྱང་སྡོམ་མི་སྐྱེ་བར་བཞེད་དགོས་ཀྱང་། དེར་བྱང་སྡོམ་སྐྱེ་བ་ཤིང་རྟ་ཆེན་པོ་གཉི་ག་དགོངས་པ་མཐུན་ཅིང་འཁོར་ལོ་བསྒྱུར་པའི་རྒྱལ་པོ་ལ་བྱང་སྡོམ་སྐྱེ་བ་བཀའ་བསྟན་དུ་མ་ལས་བཤད་མོད་དེ། དེ་ལ་དགེ་བསྙེན་དང་ཡན་ལག་བརྒྱད་པ་ལ་སོགས་པའི་སོ་ཐར་ཡོད་དུ་ཟིན་ཀྱང་དེ་ལས་དམན་པ། མདོ་སྡེ་བསྐལ་བ་བཟང་པོ་ལས། རྒྱལ་བ་ཕན་བཞེད་གྲོང་དཔོན་གྱུར་པའི་ཚེ།། དེ་བཞིན་གཤེགས་པ་རིན་ཆེན་དཔལ་དེ་ལ།། ཉིན་གཅིག་སྲོག་གཅོད་སྡོམ་པ་བླངས་ནས་སུ།། དང་པོར་བྱང་ཆུབ་ཏུ་ནི་སེམས་བསྐྱེད་དོ།། ཞེས་དང་། དེ་བཞིན་དུ་བདག་ཅག་གི་སྟོན་པས་ཀྱང་དྲིན་ལན་བསབ་མདོར། དམྱལ་བའི་ཤིང་རྟ་འདྲེན་པའི་གྱད་དུ་གྱུར་དུས་གྲོགས་ཀྱི་སྡུག་བསྔལ་ལ་བསམས་ཏེ་བྱང་སེམས་འཁྲུངས་པ། ཕུང་བོ་གསུམ་པར་ཚོང་དཔོན་གྱི་བུ་མངོན་དགའི་དུས་དང་། བསྐལ་བཟང་དུ་དམན་པ་ཞེས་མུ་ཏོ་བ་ལྟ་བུ། འདུལ་བར་རྒྱལ་པོ་འོད་ལྡན་དང་། རྫ་མཁན་ཡངས་པའི་འོད། མྱང་འདས་སུ་དབུལ་པོ། སྙིང་རྗེ་པད་དཀར་དུ་རྒྱལ་པོ་རྩི་བས་རྩིབསཀྱི་མུ་ཁྱུད་ཀྱི་མདུན་ན་འདོན་བྲམ་ཟེ་རྒྱ་མཚོའི་རྡུལ་རྣམས་སུ་གྱུར་དུས་ཐུགས་བསྐྱེད་པ་དང་། སྤྱན་རས་གཟིགས་ལ་མཚོན་ན། སྒྱུ་མ་ལྟ་བུའི་ཏིང་ངེ་འཛིན་མདོར་རྒྱལ་པོ་དཔལ་གྱི་གཟི་བརྗིད་ཀྱི་གློ་གཡས་གཡོན་ནས་རྫུས་སྐྱེས་ཀྱི་ཁྱེའུ་རིན་ཆེན་མཆོག་དང་། ཆོས་དང་དོན་རྣམ་པར་འབྱེད་པའི་མདོར་འཁོར་ལོས་བསྒྱུར་པའི་རྒྱལ་པོ་རྒྱལ་བ་ཐོབ་ཀྱི་བཙུན་མོ་རིན་ཆེན་དཔལ་གྱི་པང་བ་ནས་བརྫུས་ཏེ་སྐྱེས་པ་ཁྱེའུ་རིན་ཆེན་འབྱུང་གནས་སུ་གྱུར་དུས་ཐུགས་བསྐྱེད་པར་བཤད་པ་སོགས། སོ་ཐར་གྱི་སྡོམ་པ་ལེན་པའི་སྐལ་བ་མེད་ཅིང་བསྲུང་མི་ནུས་པ་དུ་མ་འབྱུང་བ་ལྟར་དང་།རང་མི་འདོད་བཞིན་དུ་ཕ་རོལ་བོས་འཛིན་བཅུག་པའམ་གཞན་དང་འགྲན་པའི་ཕྱིར་མ་ཡིན་ན་སོ་ཐར་རིགས་བདུན་གང་རུང་དང་ལྡན་པ་ངེས་པར་དགོས་པ་ནི་མ་ཡིན་ནོ།། བླངས་པ་མི་ཉམས་པར་བསྲུང་བའི་ཚུལ་ལ། གང་སྲུང་བར་བྱེད་པའི་ཚུལ་ཁྲིམས་དང་། དེ་ཉིད་ཇི་ལྟར་སྲུང་བའི་ཚུལ་གཉིས་ལས། དང་པོ་ནི། རྒྱལ་སྲས་འཕགས་པ་ཐོགས་མེད་ཀྱིས། བྱང་ཆུབ་སེམས་དཔའ་ཁྱིམ་པའི་ཕྱོགས་ལ་བརྟེན་པ་དང་། རབ་ཏུ་བྱུང་བའི་ཕྱོགས་ལ་བརྟེན་པའི་ཚུལ་ཁྲིམས། དེ་ཡང་མདོར་བསྡུ་ན་རྣམ་པ་གསུམ་སྟེ། སྡོམ་པའི་ཚུལ་ཁྲིམས་དང་། དགེ་བའི་ཆོས་སྡུད་པའི་ཚུལ་ཁྲིམས་དང་། སེམས་ཅན་ལ་ཕན་འདོགས་པའི་ཚུལ་ཁྲིམས་སོ།། ཞེས་གསུངས་པ་ལྟར་དང་། དེ་ཡང་བྱང་སེམས་ཀྱི་བྱ་བ་ནི་རང་རྒྱུད་སྨིན་པར་བྱེད་པ་དང་། གཞན་རྒྱུད་སྨིན་པར་བྱེད་པ་གཉིས་སུ་ངེས་པ་ལས། དང་པོར་ཉེས་སྤྱོད་སྤོང་བ་དང་ལེགས་སྤྱོད་བསྡུ་བ་གཉིས་སུ་ངེས་པའི་ཕྱིར། ཚུལ་ཁྲིམས་རྣམ་པ་གསུམ་དུ་གྲངས་ངེས་པའི་རྒྱུ་མཚན། ཉན་ཐོས་དང་ཐུན་མོང་སྡོམ་པའི་ཚུལ་ཁྲིམས་ནི་ཚུལ་ཁྲིམས་ཕྱི་མ་གཉིས་ཀྱི་གཞི་རྟེན་དུ་གྱུར་ལ། མདོ་ལས་བདག་མ་གྲོལ་བར་གཞན་མི་དགྲོལ་བར་གསུངས་པ་བཞིན་རང་རྒྱུད་ལ་དགེ་བ་སྡུད་པ་དང་པོར་མ་བྱས་པར་སེམས་ཅན་གྱི་དོན་བྱེད་མི་ནུས་པས་གོ་རིམ་དེ་ལྟར་འཐད་ཅིང་། དེ་ལ་བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་ནི། བྱང་སེམས་སོ་ཐར་གྱི་སྡོམ་ལྡན་ཡིན་ན་དེའི་རྒྱུད་ཀྱི་ཐེག་པ་ཆེན་པོའི་བྱང་ཆུབ་སེམས་ཀྱིས་ཡང་དག་པར་ཟིན་པའི་སོ་ཐར་གང་རུང་གི་སྡོམ་པ་དང་། སོ་ཐར་དངོས་ཀྱི་སྡོམ་ལྡན་མིན་ན། རང་བཞིན་གྱི་ཁ་ན་མ་ཐོ་བ་སྤོང་བའི་ཚུལ་ཁྲིམས་ཆོས་ཉིད་ཀྱི་ཐོབ་པའམ་བླངས་པ་ལས་བྱུང་བ་གང་རུང་ནི་སྡོམ་པའི་ཚུལ་ཁྲིམས་ཡིན་ལ། དགེ་བ་ཆོས་སྡུད་ནི། མདོར་ན་བྱང་སེམས་ཀྱི་སྡོམ་པ་ཡང་དག་པར་བླངས་པའི་འོག་ཏུ་དེའི་རྒྱུད་ཀྱི་ཐེག་པ་ཆེན་པོའི་བྱང་སེམས་ཀྱིས་ཡང་དག་པར་ཟིན་པའི་སྒོ་ནས་ཕ་རོལ་ཏུ་ཕྱིན་པ་དྲུག་ལ་སོགས་པ་ལུས་ངག་ཡིད་གསུམ་གྱི་དགེ་བ་བསགས་པ་གང་ཅི་ཡང་རུང་བ་དེ་དག་ཐམས་ཅད་དོ།། སེམས་ཅན་དོན་བྱེད་ཀྱི་ཚུལ་ཁྲིམས་ནི། བྱང་སྡོམ་དེ་ཡང་དག་པར་ཐོབ་ནས་ཐེག་པ་ཆེན་པོའི་བྱང་སེམས་ཀྱིས་ཟིན་པའི་སྒོ་ནས་གྲོགས་བྱ་དགོས་པ་དང་། ཐབས་ལ་རྨོངས་པ་དང་། ཕན་འདོགས་པ་དང་། འཇིགས་པས་ཉེན་པ་དང་། མྱ་ངན་གྱིས་གཟེར་གཟིརབ་དང་། ཡོ་བྱད་ཀྱིས་ཕོངས་པ་དང་། གནས་འཆའ་བར་འདོད་པ་དང་། བློ་མཐུན་པར་འདོད་པ་དང་། ཡང་དག་པར་ཞུགས་པ་དང་། ལོག་པར་ཞུགས་པ་དང་། རྫུ་འཕྲུལ་གྱིས་གདུལ་བར་བྱ་བ་སྟེ་རྣམ་པ་བཅུ་གཅིག་གི་དོན་ཇི་ལྟར་རིགས་པར་སྒྲུབ་པའོ།། ཇི་ལྟར་བསྲུང་བའི་ཚུལ་ཡང་། རྒྱལ་སྲས་ཞི་བ་ལྷའི་བསླབ་པ་ཀུན་ལས་བཏུས་སུ། བྱང་ཆུབ་སེམས་དཔའི་སྡོམ་པ་ནི།། རྒྱས་པར་ཐེག་པ་ཆེ་ལས་འབྱུང་།། ཞེས་དང་། དགེ་བའི་བཤེས་གཉེན་མི་བཏང་ཞིང་།། མདོ་སྡེ་རྣམས་ལ་རྟག་བལྟ་བས།། ཞེས་ཐབས་དེ་དག་གི་སྒོ་ནས་བསྲུང་བར་བཤད་པས་ན་སྤྱིར་ཐེག་ཆེན་གྱི་བསླབ་པའི་གནས་རྣམས་ལ་རང་ཉིད་གོམས་པ་ལྷུར་བྱེད་ཅིང་གདུལ་བྱ་གཞན་དག་ཀྱང་ཚུལ་དེ་ལ་སྦྱོར་བའི་དགེ་བའི་བཤེས་གཉེན་མི་གཏོང་བར་གུས་པས་བསྟེན་པ་ནི་བསྲུང་ཐབས་ཀྱི་གཙོ་བོ་ཡིན་ལ། གཞན་ཡང་ཐེག་པ་ཆེན་པོའི་མདོ་སྡེ་རིན་པོ་ཆེ་རྣམས་དང་། ཁྱད་པར་བྱང་ས་དང་བསླབ་བཏུས་ལ་ཐོས་བསམ་ལེགས་པར་བྱ་ཞིང་། དེ་ཙམ་མ་ལྕོགས་ཀྱང་ཚུལ་ཁྲིམས་ལེའུ་ཙམ་ལ་ངེས་པར་སྦྱངས་ནས། བྱང་སེམས་བསླབ་པའི་གནས་མཐའ་དག་ལ་སྒྲོ་འདོགས་ཆོད་ཅིང་མཁས་པར་བྱ་བ་གལ་ཆེ་སྟེ། དེ་ལྟར་མ་ཡིན་ན་འཇུག་ལྡོག་བྱ་བའི་གཞིར་གྱུར་པའི་བླང་དོར་གྱི་གནས་རྣམས་ལ་རྨོངས་པར་འགྱུར་བས་སོ།། འོ་ན་བྱང་སེམས་ལས་དང་པོ་བས་མདོ་སྡེ་དག་ནས་འབྱུང་བའི་བསླབ་པ་རྣམས་ལས་ཇི་ཙམ་ཞིག་ལ་བསླབ་ཅེ་ན། ཐེག་བསྡུས་ལས། བྱང་ཆུབ་སེམས་དཔའི་བསླབ་པའི་རབ་ཏུ་དབྱེ་བ་ཚད་མེད་དེ། ཞེས་དང་། སློབ་དཔོན་བྱང་ཆུབ་བཟང་པོས་སྡོམ་པ་ཉི་ཤུ་པའི་འགྲེལ་བར། བྱང་ཆུབ་སེམས་དཔའི་སྤྱོད་པ་རྣམས་ནི་ཚད་མེད་ཅིང་མཐར་ཐུག་པ་མེད་པའི་ཕྱིར་རོ།། ཞེས་རྒྱས་པར་ཕྱེ་ན་བྱང་སེམས་ཀྱི་བསླབ་པའམ་སྤྱོད་པ་ལ་གྲངས་དང་ཚད་མེད་ཅིང་། འོན་ཀྱང་གྲངས་ཉེ་བར་མཚོན་ཏེ་གསུངས་པ་ནི། སྨན་བླའི་མདོ་ལས། བྱང་ཆུབ་སེམས་དཔའི་སྡོམ་པ་བསླབ་པའི་གཞི་བཞི་བརྒྱ་པོ་དག་འཛིན་པ་དང་།ཞེས་བཞི་བརྒྱར་བཤད་ཅིང་། ཞི་བ་འཚོས་ཉི་ཤུ་པའི་འགྲེལ་བར། བྱང་ཆུབ་སེམས་དཔའི་བསླབ་པའི་གཞི་སྟོང་ཕྲག་དུ་མ། ཞེས་དང་། རྟོག་གེ་འབར་བ་ལས། བྱང་ཆུབ་སེམས་དཔའི་བསླབ་པའི་གནས་བདུན་བརྒྱད་ལ་སྣང་། ཞེས་དང་། བྱང་ཆུབ་སེམས་དཔའི་བསླབ་པའི་གནས་བཤད་པའི་མདོ་ལས། ཕམ་པ་བཅུ་དང་ལྟུང་བ་བཞི་བཅུ་རྩ་བརྒྱད་དེ་བསླབ་པ་ལྔ་བཅུ་རྩ་བརྒྱད་དུ་བཤད། དབུ་མ་རིན་ཆེན་ཕྲེང་བ་ལས། བྱང་ཆུབ་སེམས་དཔའི་བསླབ་པ་བཞི་བརྒྱ་དང་། མདོ་སྡེ་ཆོས་ཀྱི་རྒྱ་མོ་ལས། ཕམ་པ་བཅུ་དང་ལྟུང་བ་བཞི་བཅུ་རྩ་བརྒྱད་དུ་བཤད་པ་སོགས་གདུལ་བྱའི་བློ་ཚོད་དང་སྦྱར་བའི་གྲངས་དུ་མ་ཡོད་ཀྱང་། དོན་སློབ་དཔོན་ཙནྡྲ་གོ་མིས། གཞན་རྣམས་དང་ནི་བདག་ལའང་རུང་།། སྡུག་བསྔལ་ཡིན་ཡང་གང་ཕན་དང་།། ཕན་དང་བྱ་བ་རྣམ་རྣམསབྱ་སྟེ།། བདེ་ཡང་མི་ཕན་མི་བྱའོ།། ཞེས་གསུངས་པའི་ནང་དུ་བྱང་སེམས་ཀྱི་བསླབ་པ་ཐམས་ཅད་འདུ་བར་བཞེད་ལ། དེང་སང་གྲགས་ཆེ་བ་འཇམ་མགོན་ཆོས་ཀྱི་རྒྱལ་པོ་བཙོང་ཁ་བས་བྱང་ཆུབ་གཞུང་ལམ་དུ་ཕམ་པའི་སྡེ་ཚན་དང་ཉེས་བྱས་ཀྱི་སྡེ་ཚན་གཉིས་སུ་ཕྱེ་བའི་དང་པོ། རྩ་ལྟུང་ངམ་ཕམ་པ་ནི། ནམ་མཁའི་སྙིང་པོའི་མདོ་ལས་གསུངས་པའི་དོན་ཞི་བ་ལྷས་བསླབ་བཏུས་སུ་ལེན་པར་མཛད་པའི་ཚིགས་བཅད། དཀོན་ཅོག་གསུམ་གྱི་དཀོར་འཕྲོག་པ།། ཕས་ཕམ་པ་ཡི་ལྟུང་བར་འདོད།། དམ་པའི་ཆོས་ནི་སྤོང་བྱེད་པ།། གཉིས་པར་ཐུབ་པས་གསུངས་པ་ཡིན།། ཚུལ་ཁྲིམས་འཆལ་པའི་དགེ་སློང་ལའང་།། ངུར་སྨྲིག་འཕྲོག་དང་བརྡེག་པ་དང་།། བཙོན་རར་འཇུག་པར་བྱེད་པ་དང་།། རབ་ཏུ་བྱུང་ལས་འབེབས་པ་དང་།། མཚམས་བྱེད་ལྔ་པོ་བྱེད་པ་དང་།། ལོག་པར་ལྟ་བ་འཛིན་པ་དང་།། གྲོང་ལ་སོགས་པ་འཇིག་པ་དང་།། རྩ་བའི་ལྟུང་བར་རྒྱལ་བས་གསུངས།། བློ་སྦྱོང་མ་བྱས་སེམས་ཅན་ལ།། སྟོང་པ་ཉིད་ནི་བརྗོད་པ་དང་།། སངས་རྒྱས་ཉིད་ལ་ཞུགས་པ་དང་།། རྫོགས་པའི་བྱང་ཆུབ་ལྡོག་པ་དང་།། སོ་སོ་ཐར་བ་ཡོངས་སྤངས་ཏེ།། ཐེག་པ་ཆེ་ལ་སྦྱོར་བ་དང་།། སློབ་པའི་ཐེག་པ་ཆགས་ལ་སོགས།། སྤོང་བར་འགྱུར་བ་མིན་ཞེས་འཛིན།། ཕ་རོལ་དག་ཀྱང་འཛིན་འཇུག་དང་།། ཚིགས་བཅད་རྒྱུ་ཡིས་གཞན་སྨོད་དང་།། རང་གི་ཡོན་ཏན་བརྗོད་པ་དང་།། རྙེད་པ་དང་ནི་བཀུར་བསྟི་སྟིདང་།། བདག་ནི་ཟབ་མོ་བཟོད་པའོ་ཞེས།། ལོག་པ་ཉིད་ནི་སྨྲ་བ་དང་།། དགེ་སྦྱོང་ཆད་པས་གཅོད་འཇུག་དང་།། དཀོན་ཅོག་གསུམ་གྱི་སྦྱིན་བྱེད་དང་།། སྦྱིན་པ་ལེན་པར་བྱེད་པ་དང་།། ཞི་གནས་འདོར་བར་བྱེད་པ་དང་།། ཡང་དག་འཇོག་གི་ལོངས་སྤྱོད་རྣམས།། ཁ་ཏོན་བྱེད་ལ་སྦྱིན་པ་རྣམས།། དེ་དག་རྩ་བའི་ལྟུང་བ་སྟེ།། སེམས་ཅན་དམྱལ་བ་ཆེན་པོའི་རྒྱུ།། ཞེས་པ་འདི་ལ་ནམ་མཁའི་སྙིང་པོའི་མདོར་རྒྱལ་རིགས་སྤྱི་བོ་ནས་དབང་བསྐུར་པ་ཞེས་སོགས། རྒྱལ་པོའི་རྩ་ལྟུང་ལྔ་བློན་པོའི་རྩ་ལྟུང་ལྔ། ལས་དང་པོ་བའི་རྩ་ལྟུང་བརྒྱད་དེ་བཅོ་བརྒྱད་དུ་མིང་འདོགས་པ་དང་། འཇམ་དབྱངས་བླ་མ་བཙོང་ཁ་བས་རྩ་ལྟུང་ངམ་ཕམ་པ་དངོས་བཅུ་བཞི་དང་། ཡན་ལག་བཞི་སྟེ་བཅོ་བརྒྱད་དུ་མཛད་པ་དོན་ལ་ཁྱད་པར་མེད། ཉེས་བྱས་ཀྱི་སྡེ་ཚན་ལ་བྱང་ས་ལས་རྣམ་གྲངས་བཞི་བཅུ་རྩ་དྲུག་གསུངས་པ་མདོར་བསྡུ་ན། དགེ་བའི་ཆོས་སྡུད་ཕ་རོལ་ཏུ་ཕྱིན་པ་དྲུག་གི་མི་མཐུན་ཕྱོགས་སེར་སྣ་ལ་སོགས་པའི་ཉེས་པ་དང་། སེམས་ཅན་དོན་བྱེད་ཀྱི་མི་མཐུན་ཕྱོགས་ཀྱི་ཉེས་པ་རྣམས་སྤོང་དགོས་པར་གསུངས་སོ།། སྡོམ་པ་གཏོང་བའི་རྒྱུ་ནི། སྨོན་སེམས་བཏང་བ་དང་། ཕམ་པའི་གནས་ལྟ་བུའི་ཆོས་དེ་དག་གང་ཡང་རུང་བ་ཀུན་ནས་དཀྲིས་པ་ཆེན་པོས་སྤྱད་པ་དང་། སྡོམ་པ་ཕུལ་བ་གསུམ་གང་ཡང་རུང་བས་གཏོང་བར་བཤད། དེ་ཡང་སོ་སོ་ཐར་བའི་སྡོམ་པ་ནི་བསྲུང་མ་ནུས་པ་ན་ཕུལ་པས་སྡོམ་པའི་རྒྱུན་རྗེས་སུ་འཇུག་པའི་བསོད་ནམས་ཆད་པ་ཡིན་གྱི། སྡོམ་པ་ཕུལ་པ་དེ་ཉིད་ཀྱི་ཆ་ནས་སྡིག་པ་ཆེན་པོ་མི་བསྐྱེད་ལ། བྱང་སྡོམ་ཕུལ་ན་ནི། ཕྱོགས་བཅུའི་སངས་རྒྱས་སྲས་བཅས་ཐམས་ཅད་ཀྱི་སྤྱན་སྔར་སེམས་ཅན་ཐམས་ཅད་ཀྱི་ཕན་བདེ་སྒྲུབ་པར་ཁས་བླངས་ཏེ་སྡོམ་པ་བཟུང་བ་ལས་འདས་ཤིང་སངས་རྒྱས་དང་སེམས་ཅན་དེ་དག་ཐམས་ཅད་བསླུས་པས་ངན་འགྲོ་མུ་མཐའ་མེད་པར་འཁྱམ་དགོས་ཏེ། སྤྱོད་འཇུག་ལས། གལ་ཏེ་དེ་ལྟར་དམ་བཅས་ནས།། ལས་ཀྱིས་སྒྲུབ་པ་མ་བྱས་ན།། སེམས་ཅན་དེ་དག་ཀུན་བསླུས་པས།། བདག་གི་འགྲོ་བ་ཇི་ལྟར་འགྱུར།། ཞེས་སོགས་མང་དུ་གསུངས་ལ་རྣམ་སྨིན་ཤིན་ཏུ་ལྕིའོ།། ཉམས་པ་ཕྱིར་བཅོས་པ་ནི། ཉེས་པས་མ་གོས་པར་བྱ་བ་ལ་འབད་ཀྱང་མི་ཤེས་པ་དང་། བག་མེད་པ་དང་། ཉོན་མོངས་པ་མང་བ་དང་། མ་གུས་པ་སྟེ་ལྟུང་བ་འབྱུང་བའི་རྒྱུ་བཞིས་ཉེས་པ་བྱུང་བ་ན་ཡང་ཆོས་བཞིན་སླར་གསོ་བ་ཇི་སྐད་དུ། ཟག་པ་འབྲིང་ནི་གསུམ་ལ་བཤགས།། གཅིག་གི་མདུན་དུ་ལྷག་མ་རྣམས།། ཉོན་མོངས་མི་མོངས་རྨོངསབདག་སེམས་མིན།། ཞེས་པ་ལྟར་བཤགས་ཡུལ་དུ་འོས་པའི་གང་ཟག་གི་མདུན་དུ་སྙིང་ཐག་པ་ནས་བཤགས་ཏེ་ཉེས་པ་ལས་ལྡང་བར་བྱ་བ་ཡིན་ལ། དེ་ལྟར་དེང་སང་གྲགས་ཆེ་བ་སོ་ཐར་ལྟ་བུའི་སྡོམ་པ་གཟུགས་ཅན་མ་ཡིན་པ། ས་པཎ་གྱིས། བྱང་ཆུབ་སེམས་དཔའི་སྡོམ་པ་ནི།། སེམས་ལས་སྐྱེ་ཕྱིར་གཟུགས་ཅན་མིན།། ཞེས་སངས་རྒྱས་མ་ཐོབ་ཀྱི་བར་ཡང་མི་གཏོང་བར་བཤད་ལ། བྱེ་བྲག་སྨྲ་བ་ལུགས་ཀྱི་སོ་ཐར་གཟུགས་ཅན་དུ་འདོད་པ་ལྟར་དེ་གཟུགས་ཅན་ཡིན་པས་ཤི་མ་འཕོས་པར་མི་གཏོང་བར་སོང་ན་དེ་ལུགས་ཀྱི་བསྙེན་གནས་ཀྱི་སྡོམ་པས་མ་ངེས་ཤིང་། ཡང་སྡོམ་པ་གཟུགས་ཅན་མ་ཡིན་པས་ཤི་ནས་ཀྱང་མི་གཏོང་བར་སོང་ན་དབུ་མ་བ་རྣམས་སོ་ཐར་ཤེས་པའི་ངོ་བོར་འདོད་པས་ཤི་འཕོས་ནས་མི་གཏོང་བར་སོང་བས་ཇི་སྲིད་དང་དེ་ནས་དེའི་བར་གྱི་ཁས་བླངས་པའི་དུས་ཀྱིས་ཕྱེ་བ་ལས་གཟུགས་ཅན་ཡིན་མིན་གྱི་དབྱེ་བ་མེད་པ་བསྟན་ནམ་སྙམ། གསང་སྔགས་རྡོ་རྗེ་ཐེག་པའི་སྒོར་འཇུག་པ་ལ་ཡང་བྱང་སྡོམ་འདི་མེད་དུ་མི་རུང་བ་ནི། འཇམ་དཔལ་རྩ་རྒྱུད་འདུས་པའི་ལེའུ་དང་པོ་ལས། ཆོས་གསུམ་དང་ལྡན་ན་སྔགས་ཀྱི་སྤྱོད་པ་ཡོངས་སུ་རྫོགས་པར་འགྱུར་ཏེ། གསུམ་པོ་གང་ཞེ་ན། སེམས་ཅན་ཐམས་ཅད་ཡོངས་སུ་མི་གཏོང་བ་ཉིད་དང་། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་བསྲུང་བ་དང་། རང་གི་སྔགས་ཡོངས་སུ་མི་གཏོང་བ་ཉིད་དོ།། ཞེས་དང་། གསང་བ་འདུས་པའི་བཤད་རྒྱུད་རྡོ་རྗེ་རྩེ་མོ་ལས། ཕ་རོལ་ཕྱིན་དྲུག་སྤྱོད་པ་ལ།། གོ་རིམ་བཞིན་དུ་བསླབ་པར་བྱ།། སེམས་ཅན་གྱི་ནི་དོན་ལྡན་པས།། བྱང་ཆུབ་སེམས་དཔའི་སྤྱོད་པ་སྤྱད།། ཅེས་དང་། ཀྱེ་རྡོ་རྗེའི་བཤད་རྒྱུད་རྡོ་རྗེ་གུར་མགུརགྱི་ལེའུ་བཅུ་གཉིས་པ་ལས། བྱང་ཆུབ་སེམས་སུ་འདི་བགྱི་སྟེ།། བདག་དང་གཞན་དོན་རབ་སྒྲུབ་ཕྱིར།། བདག་གི་བྱང་ཆུབ་སེམས་མཆོག་བསྐྱེད།། ཨེ་མ་ཧོ་སེམས་ཅན་ཀུན་མགྲོན་གཉེར།། བྱང་ཆུབ་སྤྱོད་མཆོག་མཛད་བཞིན་སྤྱད།། འགྲོ་ལ་ཕན་ཕྱིར་སངས་རྒྱས་ཤོག། ཅེས་མདོ་སྔགས་ཟུང་དུ་འཇུག་པའི་ལམ་པོ་ཆེ་འདིའི་ཕན་ཡོན་ཀྱང་། སྡོང་བོས་བརྒྱན་པའི་མདོའི་བམ་པོ་བརྒྱ་བཅུ་གསུམ་པ་ལས། རིགས་ཀྱི་བུ་འདི་ལྟ་སྟེ་དཔེར་ན། མི་མང་གཅིག་ཅིག་ཁྱིམ་མམ་ཁང་བུ་ཇི་ལྟ་བུར་བཅུག་ཀྱང་རུང་སྟེ། བཅུག་མ་ཐག་ཏུ་ལོ་སྟོང་དུ་བསགས་བསགས་པའི་མུན་པ་ཡང་རྣམ་པར་སེལ་ཞིང་སྣང་བར་བྱེད་དོ།། དེ་བཞིན་དུ་བྱང་ཆུབ་ཀྱི་སེམས་བསྐྱེད་པ་གཅིག་ཀྱང་སེམས་ཅན་གྱི་བསམ་པའི་ཁྱིམ་འཐིབས་པོ་མ་རིག་པའི་མུན་པ་དང་ལྡན་པ་ཅི་ཡང་རུང་སྟེ། དེའི་རྒྱུད་དུ་ཕྱིན་ན་དེ་ཕྱིན་མ་ཐག་ཏུ་བསྐལ་བ་བརྒྱ་སྟོང་བརྗོད་དུ་མེད་པར་བསགས་པའི་ལས་དང་ཉོན་མོངས་པའི་སྒྲིབ་པ་དང་། མུན་པ་ཐམས་ཅད་རྣམ་པར་སེལ་ཞིང་ཡེ་ཤེས་ཀྱི་སྣང་བ་ཡོངས་སུ་བསྐྱེད་དོ།། ཞེས་སེམས་བསྐྱེད་མཚན་ཉིད་པ་དེ་རྒྱུད་ལ་སྐྱེས་པ་ཙམ་གྱིས་བསྐལ་བ་དུ་མར་བསགས་པའི་སྒྲིབ་པ་ཐམས་ཅད་སྐད་ཅིག་གིས་འཇོམས་ནུས་པ་དང་། བྱམས་པ་འཇུག་པའི་མདོ་ལས། རིགས་ཀྱི་བུ་འདི་ལྟ་སྟེ། དཔེར་ན་རྡོ་རྗེ་རིན་པོ་ཆེ་ནི་ཆག་ཀྱང་གསེར་གྱི་རྒྱན་ཁྱད་པར་དུ་འཕགས་པ་ཐམས་ཅད་ཟིལ་གྱིས་ནོན་ཅིང་རྡོ་རྗེ་རིན་པོ་ཆེའི་མིང་ཡང་མི་འདོར་ལ་དབུལ་བ་ཐམས་ཅད་ཀྱང་རྣམ་པར་བཟློག་གོ། རིགས་ཀྱི་བུ་དེ་བཞིན་དུ་ཐམས་ཅད་མཁྱེན་པར་སེམས་བསྐྱེད་པའི་རྡོ་རྗེ་རིན་པོ་ཆེ་ནན་ཏན་དང་བྲལ་ཡང་ཉན་ཐོས་དང་སངས་རྒྱས་ཐམས་ཅད་ཀྱི་ཡོན་ཏན་གྱི་རྒྱན་ཐམས་ཅད་ཟིལ་གྱིས་ནོན་ཅིང་བྱང་ཆུབ་སེམས་དཔའི་མིང་ཡང་མི་འདོར་ལ་འཁོར་བའི་དབུལ་བ་ཐམས་ཅད་ཀྱང་རྣམ་པར་བཟློག་གོ། ཞེས་བྱང་ཆུབ་སེམས་དཔའི་སྤྱོད་པ་རྣམས་ལ་མ་བསླབས་ཀྱང་སྨོན་པ་བྱང་ཆུབ་ཀྱི་སེམས་དེ་ཡོད་ན་བྱང་ཆུབ་སེམས་དཔར་གསུངས་པ་དང་། ཡང་དེ་ཉིད་ལས། བྱང་ཆུབ་སེམས་ཀྱི་རྣམ་སྨིན་བསྟན་པ་ཡི།། བསོད་ནམས་དེ་ལ་གལ་ཏེ་གཟུགས་ཡོད་ན།། ཞིང་རྣམས་གངྒཱའི་བྱེ་སྙེད་གང་བྱས་ཀྱང་།། དེ་དག་བཀང་བས་ཆ་ཙམ་ཟད་པ་མེད།། ཅེས་དང་། ཞི་བ་ལྷས་སྤྱོད་འཇུག་ཏུ། བྱང་ཆུབ་སེམས་སྐྱེས་གྱུར་ན་སྐད་ཅིག་གིས།། འཁོར་བའི་བཙོན་རྭར་བསྡམས་པའི་ཉམ་ཐག་རྣམས།། བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་།། འཇིག་རྟེན་ལྷ་མིར་བཅས་པས་ཕྱག་བྱར་འགྱུར།། ཞེས་དང་། ཇོ་བོ་རྗེས་ལམ་སྒྲོན་དུ། བྱང་ཆུབ་སེམས་ཀྱི་བསོད་ནམས་གང་།། དེ་ལ་གལ་ཏེ་གཟུགས་མཆིས་ན།། ནམ་མཁའི་ཁམས་ནི་ཀུན་བཀང་སྟེ།། དེ་ནི་དེ་བས་ལྷག་པར་འགྱུར།། གངྒཱའི་བྱེ་མའི་གྲངས་སྙེད་ཀྱི།། སངས་རྒྱས་ཞིང་རྣམས་མི་གང་གིས།། རིན་ཆེན་དག་གིས་ཀུན་བཀང་སྟེ།། འཇིག་རྟེན་མགོན་ལ་ཕུལ་བ་བས།། གང་གིས་ཐལ་མོ་སྦྱར་བགྱིས་ཏེ།། བྱང་ཆུབ་ཏུ་ནི་སེམས་བཏུད་ན།། མཆོད་པ་འདི་ནི་ཁྱད་པར་འཕགས།། ཞེས་སོགས་མདོ་སྡེ་རིན་པོ་ཆེ་རྣམས་ལས་རྒྱ་ཆེར་གསུངས་པ་འདིར་བརྗོད་ཀྱིས་མི་ལང་ལ། གཞན་ཡང་འཕགས་པ་དཀོན་ཅོག་བརྩེགས་པའི་འདུས་པ་བཅུ་དགུ་པ་དྲག་ཤུལ་ཅན་གྱིས་ཞུས་པའི་མདོར། ཁྱིམ་བདག་འདི་ལ་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པས་སངས་རྒྱས་ལ་སྐྱབས་སུ་འགྲོ་བར་བྱའོ།། ཆོས་ལ་སྐྱབས་སུ་འགྲོ་བར་བྱའོ།། དགེ་འདུན་ལ་སྐྱབས་སུ་འགྲོ་བར་བྱའོ།། དེ་གསུམ་ལ་སྐྱབས་སུ་སོང་བའི་དགེ་བའི་རྩ་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ།། ཞེས་དང་། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ནི་བསླབ་པའི་གཞི་ཐམས་ཅད་ཡོངས་སུ་བཟུང་བ་ཡིན་ཏེ། འདི་ལྟ་སྟེ་བསླབ་པའི་གཞི་ལྔ་ཡོངས་སུ་བཟུང་ནས། ཞེས་ཡོངས་རྫོགས་དགེ་བསྙེན་གྱི་སྡོམ་པས་མཚོན་བསླབ་པའི་གཞི་མང་དུ་གསུངས་པ་དང་། འདུས་པ་ཉི་ཤུ་རྩ་བཞི་པ་འདུལ་བ་རྣམ་པར་གཏན་ལ་དབབ་པ་ཉེ་བར་འཁོར་གྱིས་ཞུས་པ་ལས། ཉེ་བར་འཁོར་དེའི་ཕྱིར་ཁྱོད་ཀྱིས་ཉན་ཐོས་ཀྱི་ཐེག་པ་བ་རྣམས་ཀྱི་བསླབ་པ་ནི་སྦྱོར་བ་གཞན་དང་། ལྷག་པའི་བསམ་པ་གཞན་གྱིས་ཡོངས་སུ་དག་པ་ཡིན་པར་སྨྲོས་ཤིག དེ་ཅིའི་ཕྱིར་ཞེ་ན། ཉེ་བར་འཁོར་ཉན་ཐོས་ཀྱི་ཐེག་པ་བ་རྣམས་ཀྱི་སྦྱོར་བ་ཡང་གཞན། ལྷག་པའི་བསམ་པ་ཡང་གཞན་ལ། ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ཀྱི་སྦྱར་བ་ཡང་གཞན། ལྷག་པའི་བསམ་པ་ཡང་གཞན་ཡིན་པའི་ཕྱིར་རོ།། ཉེ་བར་འཁོར་དེ་ལ་ཉན་ཐོས་ཀྱི་ཐེག་པ་བའི་ཚུལ་ཁྲིམས་ཡོངས་སུ་དག་པ་གང་ཡིན་པ་དེ་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་མ་དག་པ་ཉིད་དང་། ཤིན་ཏུ་འཆལ་བའི་ཚུལ་ཁྲིམས་ཉིད་ཡིན་ལ། ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཉིད་གང་ཡིན་པ་དེ་དག་ནི་ཉན་ཐོས་ཀྱི་ཐེག་པ་བའི་ཚུལ་ཁྲིམས་ཡོངས་སུ་མ་དག་པ་ཉིད་དང་། ཤིན་ཏུ་འཆལ་བའི་ཚུལ་ཁྲིམས་ཉིད་ཡིན་ནོ།། དེ་ཅིའི་ཕྱིར་ཞེ་ན། ཉེ་བར་འཁོར་འདི་ལ་ཉན་ཐོས་ཀྱི་ཐེག་པ་བ་ནི། དེའི་སྐད་ཅིག་ཙམ་ཡང་སྲིད་པར་སྐྱེ་བ་ལེན་པར་མི་བྱེད་དོ།། དེ་ནི་ཉན་ཐོས་ཀྱི་ཐེག་པ་བའི་ཚུལ་ཁྲིམས་ཡོངས་སུ་དག་པ་ཉིད་ཡིན་ལ། དེ་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་མ་དག་པ་ཉིད་དང་། ཤིན་ཏུ་འཆལ་བའི་ཚུལ་ཁྲིམས་ཡིན་པའི་ཕྱིར་རོ།། ཞེས་དང་། ཉེ་བར་འཁོར་དེ་ལྟ་བས་ན། ཁྱོད་ཀྱིས་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ཀྱི་བསླབ་པ་ནི་རྗེས་སུ་བསྲུང་བ་དང་བཅས་པ་ཡིན་པར་སྨྲོས་ཤོག་ཤིག ཉན་ཐོས་ཀྱི་ཐེག་པ་བ་རྣམས་ཀྱི་བསླབ་པ་ནི་རྗེས་སུ་སྲུང་བ་མེད་པ་ཡིན་པར་སྨྲོས་ཤིག ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ཀྱི་བསླབ་པ་ནི་བཅོས་སུ་ཡོད་པ་ཡིན་པར་སྨྲོས་ཤིག ཉན་ཐོས་ཀྱི་ཐེག་པ་བ་རྣམས་ཀྱི་བསླབ་པ་ནི་བཅོས་སུ་མེད་པ་ཡིན་པར་སྨྲོས་ཤིག ཅེས་སོགས་དང་། ཤཱ་རིའི་བུ་དེ་ལ་བྱང་ཆུབ་སེམས་དཔའི་ཉེས་པ་དང་པོའི་ལྕི་བ་ནི་ཚོགས་བཅུ་ལ་དྲང་བོར་བཤགས་པར་བྱའོ།། བུད་མེད་ཀྱི་ལག་པ་ནས་འཛིན་པའི་ལག་པའི་ཉེས་པ་ལྕི་བ་ནི་ཚོགས་ལྔ་ལ་བཤགས་པར་བྱའོ།། ཉོན་མོངས་པ་ཅན་གྱི་སེམས་ཀྱི་མིག་གིས་བལྟས་པའི་ཉེས་པ་ནི་གང་ཟག་གཅིག་གམ། གཉིས་ཀྱི་མདུན་དུ་བཤགས་པར་བྱའོ།། བྱང་ཆུབ་སེམས་དཔའ་མཚམས་མེད་པ་ལྔ་དང་ལྡན་པའི་ཉེས་པ་དང་། བུད་མེད་ཀྱི་ཉེས་པ་དང་། ཁྱེའུའི་ཉེས་པ་དང་། ལག་པའི་ཉེས་པ་དང་། མཆོད་རྟེན་གྱི་ཉེས་པ་དང་། དགེ་འདུན་གྱི་ཉེས་པ་དང་། དེ་ལས་གཞན་པའི་ཉེས་པ་ལྕི་བ་རྣམས་ནི་སངས་རྒྱས་བཅོམ་ལྡན་འདས་སུམ་ཅུ་རྩ་ལྔའི་སྤྱན་སྔར་གཅིག་པུས་ཉིན་མཚན་དུ་བཤགས་པར་བྱའོ།། དེ་ལ་བཤགས་པ་ནི་འདི་ཡིན་ཏེ། བདག་མིང་འདི་ཞེས་བགྱི་བ་སངས་རྒྱས་ལ་སྐྱབས་སུ་མཆིའོ།། ནས། ཡོན་ཏན་བསྔགས་པ་མཐའ་ཡས་རྒྱ་མཚོ་འདྲ་ཀུན་ལ།། ཐལ་མོ་སྦྱར་བར་བགྱིས་ཏེ་སྐྱབས་སུ་ཉེ་བར་མཆི།། ཞེས་པའི་བར་དེང་སང་ལྟུང་བཤགས་སུ་གྲགས་པ་ཕུང་བོ་གསུམ་པའི་མདོ་གསུངས་ནས། ཤཱ་རིའི་བུ་དེ་ལྟར་བྱང་ཆུབ་སེམས་དཔས་སངས་རྒྱས་བཅོམ་ལྡན་འདས་སུམ་ཅུ་རྩ་ལྔ་པོ་དེ་དག་ལ་སོགས་པ་དེ་བཞིན་གཤེགས་པ་ཐམས་ཅད་དང་ལྡན་པའི་ཡིད་ལ་བྱེད་པ་དག་གིས་སྡིག་པ་ཐམས་ཅད་རྣམ་པར་དག་པར་བྱའོ།། ཞེས་བྱང་ཆུབ་སེམས་དཔའི་བསླབ་བྱ་དང་། ལྟུང་བ་དང་། དེ་བཤགས་པ། སོ་ཐར་དང་བྱང་སྡོམ་གྱི་ཁྱད་པར་སོགས་སྔ་རབས་པ་རྣམས་ནས་གླེང་བར་མ་མཛད་པའི་བརྡ་འཆད་ཆདབག་ཙམ་འདུག་པ་ཁོ་བོས་འདིར་སྒོ་འབྱེད་ཀྱི་ཚུལ་དུ་མགོ་སྨོས་ཙམ་བགྱིས་པ་ཡིན་ལ། སླད་དུ་བྱང་སྡོམ་ལ་རྒྱས་བཤད་མཛད་བཞེད་ཀྱི་རྟོགས་དཔྱོད་མཁན་ཡོད་ན་མདོ་དེར་གཟིགས་ཏེ་སྨྲ་བའི་ལྗགས་རིང་བོར་རྐྱོང་བར་འཚལ་ལོ།།

X