//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

བྱང་པ་རྣམ་རྒྱལ་གྲགས་བཟང་ཡབ་སྲས་ཀྱིས་སྨན་སྤེལ་ཚུལ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 10:01:51 ཀློག་གྲངས། 71 

ཕྱིས་སུ་གསོ་རིག་སྤྱི་དང་བྱེ་བྲག་དཔལ་ལྡན་རྒྱུད་བཞིའི་དཀའ་གནད་ཀྱི་མདུད་པ་བཀྲོལ་ཏེ་རིག་གནས་རྩེ་མོ་འདིའི་བསྟན་པའི་བདག་པོ་ལྟ་བུ་མཁས་པ་བྱང་ཟུར་གཉིས་ཞེས་གྲགས་པ་བྱུང་བའི། བྱང་པ་ནི། ཕུན་སུམ་ཚོགས་པའི་བསོད་ནམས་ཀྱི་དཔལ་ལས་གྲུབ་པའི་རྒྱ་ནག་གོང་མའི་ཁྲི་ལ་གནམ་གྱི་ལུང་གིས་དབང་བསྒྱུར་པ་མི་ཉག་སེའུ་རྒྱལ་པོ་ནས་གཏད་རྒྱལ་རབས་བདུན་པ། གོང་མ་སེ་ཆེན་རྒྱལ་པོས་རིན་པོ་ཆེའི་ཐམ་ཀ་དང་སི་ཏུའི་ལས་ཀ་གནང་པས་མངོན་པར་མཐོ་བ། གུའི་གུང་གྲགས་དཔལ་བཟང་དང་ཡུམ་སི་ཏུ་ཆོས་རིན་པའི་སྲས་མོ་འབུམ་སྐྱོང་རྒྱལ་མོ་གཉིས་ཀྱི་སྲས་སུ་རབ་བྱུང་བདུན་པའི་ཤིང་ཕག་ལ་དཔལ་ངམ་རིངས་ཀྱི་རྒྱལ་སྡེ་ཆེན་པོ་བྱང་ཕྱོགས་ཤམྦྷ་ལའི་འདུན་ས་ཉེ་བར་འཕོས་པའི་བསྟི་གནས་སུ་འཁྲུངས། ཆུང་ངུ་ནས་སྔོན་གྱི་བག་ཆགས་རབ་ཏུ་སད་དེ་སྐྱེས་བུ་དམ་པའི་ཀུན་ཏུ་སྤྱོད་པས་དུས་འདའ། མཁས་ཤིང་གྲུབ་པའི་དབང་ཕྱུག་ལོ་ཆེན་བྱང་ཆུབ་རྩེ་མོ་དང་། རང་རིགས་གདུང་གི་ཐིག་ལེ་འཛིན་པ་བསྟན་པའི་རྒྱལ་མཚན། མཁན་ཆེན་ཟླ་མགོན་ཤེས་རབ་པ་རྣམས་ལ་དམ་པའི་ཆོས་ཀྱི་དགའ་སྟོན་བདུད་རྩིའི་སྐྱེས་ལན་གཅིག་མིན་པར་བཞེས། དགུང་ལོ་ལྔའི་དུས་ལྷོ་ཕྱོགས་བསྐྱེད་མའི་ཕོ་བྲང་དུ་བཞུགས། ཡི་གེ་འདྲི་འབྲིཀློག་བརྡ་དག་གིས་མཚོན་པ་ཐམས་ཅད་ཚེགས་མེད་དུ་མཁྱེན།སླར་ཡང་དཔལ་ངམ་རིང་དུ་ཕེབས་ནས་སྟན་ཆགས། དགུང་ལོ་བཅུ་པའི་དུས་མནལ་ལམ་དག་པའི་སྣང་བར་ཨོ་རྒྱན་པདྨ་དང་མཇལ་པ་ནས་སྔ་ཕྱིར་བཅོམ་ལྡན་འདས་ཐུབ་པའི་དབང་པོ།རྒྱལ་པོ་གཟུགས་ཅན་སྙིང་པོ་དང་ཟླ་བ་བཟང་པོ། ཐོགས་མེད་སྐུ་མཆེད། མི་ལ་རས་པ་ལ་སོགས་པ་ལྷ་དང་བླ་མ་དུ་མའི་ཞལ་གཟིགས་ཤིང་གསུང་གི་གནང་པ་ཐོབ། བཀའ་ལྔ་པ་དཔལ་འབྱོར་ཤེས་རབ། རིན་ཆེན་དཔལ་བཟང་། སེང་གེ་རྒྱལ་མཚན། རྒྱ་གར་རྡོ་རྗེ་གདན་གྱི་མཁན་པོ་ཤཱ་རི་པུ་ཏྲ། པཎ་ཆེན་ནགས་ཀྱི་རིན་ཆེན། བོ་དོང་ཕྱོགས་ལས་རྣམ་རྒྱལ་ལ་སོགས་པ་མཚན་ཉིད་དང་ལྡན་པའི་ཡོངས་འཛིན་མང་དུ་བསྟེན་ནས་མདོ་སྔགས་ཤེས་བྱ་རིག་པའི་གནས་ཐམས་ཅད་ལ་དཔྱིས་ཕྱིན་པར་སྦྱངས། ཧོར་བཀའ་བཞི་པ་སེང་གེ་རྒྱལ་མཚན་ལ་དགེ་བསྙེན་གྱི་སྡོམ་པ་ཞུས་པས་མཚན་ཆོས་རྒྱལ་རྣམ་རྒྱལ་གྲགས་བཟང་དུ་གསོལ་ཞིང་དེ་གོང་གི་མཚན་རྒྱ་རུག་དར་མ་རིགས་འཛིན་ཡིན་པར་གྲགས། དཔལ་ལྡན་ས་སྐྱ་བ་ཀུན་དགའ་བཀྲ་ཤིས་རྒྱལ་མཚན་དཔལ་བཟང་རྒྱ་ནག་གོང་མ་ཆེན་པོ་ཏ་མིང་གིས་གདན་དྲངས། ཐེག་ཆེན་ཆོས་ཀྱི་རྒྱལ་པོའི་ལུང་ལས་ཕུལ་པ་སོགས་བཀུར་སྟི་ཕུན་སུམ་ཚོགས་པ་མཛད་པའི་བདག་རྐྱེན་ལས། རིགས་ལྡན་ཆོས་ཀྱི་རྒྱལ་པོ་འདི་ཉིད་ལའང་དངུལ་གྱི་ཐམ་ཀ་དང་ཏའི་སི་ཏུའི་ལས་ཀ་བསྩལ། དགུང་ལོ་སོ་གཅིག་གི་ཁར་སེང་གེ་རྩེ་བའི་སྲས་མོ་ནམ་མཁའ་དཔལ་འབུམ་ཁབ་ཏུ་བཞེས། རིམ་གྱིས་སྲས་ལྕམ་སྲིད་སྲིངརྣམས་བསྐྲུན། མཁས་པའི་སྙན་གྲགས་ཀྱིས་སའི་སྟེང་ཁྱབ་པས་དྲན་དབང་རྡོ་རྗེ་རྒྱལ་མཚན། མི་ཉག་ཆོས་གྲགས་བཟང་པོ། རྩེས་དང་བ་སངས་རྒྱས་ལྷུན་གྲུབ་སོགས་དུ་མའི་ཁེངས་པའི་རི་བོ་བསྙིལ་ཏེ་ཞབས་ཀྱི་པདྨར་གཏུགས། པཎ་ཆེན་བྱམས་པ་གླིང་བས་ཀྱང་བསྔགས་བརྗོད་ཀྱི་མེ་ཏོག་འཐོར། ཐམས་ཅད་མཁྱེན་པ་དགེ་འདུན་གྲུབ་པ་དང་དྲི་བ་དྲིས་ལན་མཛད་ཅིང་ཆོས་རྒྱལ་ཟླ་བ་བཟང་པོའི་ཡང་སྲིད་དུ་ངོས་བཟུང་། དགུང་ལོ་བཞི་བཅུ་པ་ནས་རིམ་པར་གསང་ཆེན་རྒྱུད་སྡེ་རབ་འབྱམས་རྒྱ་མཚོའི་གཙོ་བོར་གྱུར་པ་དུས་འཁོར་གྱི་སྐུ་གསུང་ཐུགས་ཡོངས་སུ་རྫོགས་པའི་བློས་བསླང་བཀོད་པས་ཁྱད་པར་འཕགས་ཤིང་རྒྱུ་གསེར་དངུལ་ཤས་ཆེ་བ་ལས་གྲུབ་པ་རིན་པོ་ཆེའི་རྒྱན་གྱིས་སྤྲས་པ། བྱམས་ཆེན་དང་དུས་འཁོར་གྱི་སྐུ། བཀའ་འགྱུར་བྱང་བརྩེགས་མ་སོགས་སྐུ་གསུང་ཐུགས་རྟེན་མང་དུ་བཞེངས། མངའ་ཞབས་སུ་ཐོ་བཙུན་བཏུས་ཏེ་བྱམས་ཕྲུག་གི་དགེ་འདུན་འདུས་པའི་སྡེ་བཙུགས། རྗེ་བཙུན་ས་སྐྱ་པཎྜི་ཏ་དབུ་གཙུག་ནས་ཐིམ་པས་དཔལ་ལྡན་ས་སྐྱ་བའི་དགོངས་པའི་ཟབ་གནད་ཐམས་ཅད་ཐུགས་ལ་ཤར་བ་སོགས་རྟོགས་པའི་ཡོན་ཏན་མཐའ་ལས་འདས། བཀའི་རྩོམ་པ་ཡང་དེ་བཞིན་གཤེགས་པའི་གདུང་རབས། བསྟོད་པ། བཀའ་བསྟན་དུ་མའི་དོན་བཏུས་སོགས་བསྟན་པ་སྤྱིའི་གནས་ལས་བསྒྲགས་པའི་བསྟན་བཅོས་སུམ་ཅུ་རྩ་ལྔ། དཔལ་དུས་ཀྱི་འཁོར་ལོའི་ཕྱི་ནང་གཞན་གསུམ་ལས་རྩིས་ཀྱི་བསྟན་བཅོས་བྱིས་པ་བདེ་བླག་ཏུ་འཇུག་པ་སོགས་རྒྱུད་ཐོག་མའི་ལེའུ་གཉིས་ཀྱི་དོན་འགྲེལ་གྱི་དབང་དུ་མཛད་པའི་བསྟན་བཅོས་བཞི་བཅུ་ཞེ་གཉིས། དབང་ཆོག་བདེ་བ་ཆེན་པོའི་ཆུ་རྒྱུན་སོགས་དབང་ལེ་དང་བསྒྲུབ་ལེའི་དོན་འགྲེལ་དུ་མཛད་པ་ལྔ་བཅུ་རྩ་བཞི།ལུས་དཀྱིལ་རྫོགས་རིམ་ལམ་དུས་སོགས་ཡེ་ཤེས་ལེའུའི་དོན་འགྲེལ་བཅུ་གཉིས། ཤེས་བྱ་རབ་གསལ། མདོར་བསྡུས་དང་པོའི་རྣམ་བཤད་སོགས་སྤྱིར་བསྡོམས་ཀྱི་འགྲེལ་བ་དྲུག སྒྲ་རིག་པའི་ཉིང་ཁུ་ཀ་ལཱ་པའི་མདོ་རྒྱན། བཟོ་རིག་པར་དེ་བཞིན་གཤེགས་པའི་སྐུ་གཟུགས་ཀྱི་ཚ་ཚད། ཚད་མ་ལ་བསྟན་བཅོས་མ་མཛད་ཀྱང་རིགས་པར་སྨྲ་བ་དུ་མའི་ཁྲོད་དུ་ཐལ་འགྱུར་འཕེན་པ་སོགས་རྒྱལ་པོ་པཎྜི་ཏ་ཞེས་འཆད་རྩོད་རྩོམ་པས་དུས་འདའ། ཁྱད་པར་གསོ་བ་རིག་པ་ཕུལ་ཏུ་ཕྱིན་པས་ཡན་ལག་བརྒྱད་པ་ཐམས་ཅད་ཀྱི་སྙིང་པོ་བསྡུས་པ་ཡིད་བཞིན་ནོར་བུ་རིན་པོ་ཆེ་ཞེས་བྱ་བའི་བསྟན་བཅོས་ལེའུ་བརྒྱ་ཉི་ཤུ་ཡོད་པ་ཞིག་དང་། རྩ་བའི་རྒྱུད་ཀྱི་བཤད་པ་རྒྱུད་དོན་གསལ་བྱེད་སྒྲོན་མེ། བཤད་རྒྱུད་ཀྱི་རྒྱ་ཆེར་འགྲེལ་བ་བདུད་རྩིའི་ཆུ་རྒྱུན་དང་། ཊིཀ་ཊཱ་ཀཱཆུང་དོན་གསལ། ཕྱི་མ་རྒྱུད་ཀྱི་དཀའ་འགྲེལ་དགོས་འདོད་འབྱུང་བ། ཡོངས་གཏད་ཀྱི་འགྲེལ་བ་ཚིག་དོན་རྣམ་པར་གསལ་བ། སྨན་གཞུང་རིན་ཆེན་སྒྲོམ་བུ། རྩོམ་པ་ཆུང་བ་རྒྱུད་བཞིའི་དཀའ་འཕྲང་འཕྲེངམུན་སེལ། གསོ་ཐབས་སུམ་བརྒྱ་དྲུག་ཅུའི་ངོས་འཛིན། རྩ་བཤད་གསལ་བའི་སྒྲོན་མེ། སྲོག་གཅོད་ནད་དགུའི་དབྱེ་བ། འཚོ་བྱེད་རྣམས་ལ་སྙིང་བརྩེ་བའི་འཕྲུལ་གྱི་ཡིག་ཆུང་། སེང་གེ་རྩེ་འཚོ་བྱེད་ཀྱིས་དྲིས་ལན་སོགས་འཆད་རྩོད་རྩོམ་གསུམ་གྱི་སྒོ་ནས་གསོ་བ་རིག་པའི་སྲོག་འཐུད་བ་ལྟ་བུར་གྱུར། ཕོ་བྲང་དུ་གནམ་ལྕགས་བབས་པ་ཉེ་སྐོར་འཁོརགྱི་མི་ཕལ་ཆེར་བརྒྱལ་པ་དང་དངངས་པ་སོགས་ཟུག་རྔུ་མི་ཟད་པ་བྱུང་རུང་སྐུ་ལ་ཅུང་ཟད་ཀྱང་བརྫི་བར་མ་ནུས་པ་དང་།ཇོ་སྐྱབས་པའི་གཞིས་འཛིན་མ་གདོན་དྲག་པོས་ཟིན་པར་ཕུར་གདབ་ཀྱི་གཟིགས་སྟངས་མཛད་པ་ཙམ་གྱིས་གྲོལ་པ་སོགས་གྲུབ་མཚན་ཀྱང་མང་། དེ་ལྟར་དགུང་ལོ་བརྒྱད་ཅུ་རྩ་གཅིག་གི་བར་བསྟན་པ་དང་འགྲོ་བའི་དོན་རྒྱ་ཆེར་མཛད་ནས། སླར་ཡང་ས་ལ་སྤྱོད་པའི་འོག་མིན་ལྷུན་གྲུབ་སྡིངས་སུ་ཟླ་གཅིག་ཙམ་སྐུ་ཅུང་ཟད་སྙུན་པའི་ཚུལ་བསྟན་པའི་སྐབས་ཉིན་རེ་བཞིན་ཡང་འཆི་བ་མེད་པའི་ལག་པད་ཀྱིས་གཏོར་བ་མདྷ་ར་བའི་ཆར་རྒྱུན་མ་ཆད་པར་བབས་པའི་ངང་ནས། ཤིང་ལུག་སྣྲོན་ཟླའི་གྲལ་ཚེས་དྲུག་གི་ཉིན་སྤྲུལ་སྐུ་རགས་པའི་ཟ་མ་ཏོག་ལས་ལོངས་སྐུ་ཡེ་ཤེས་སྒྱུ་མའི་སྐུ་ཟུང་འཇུག་དུས་ཀྱི་འཁོར་ལོའི་ཐུགས་ཀར་བསྡུས། འཇའ་འོད་དང་མེ་ཏོག་གི་ཆར་དྲི་བཟང་པོའི་ངད་འཐུལ་པ་སོགས་དཔག་གིས་མི་ལང་བ་བྱུང་། རྗེ་གྲོལ་མཆོག་གིས་ཐེག་པའི་མཐར་ཐུག་དུས་ཀྱི་འཁོར་ལོ་ནས།། སྨན་དཔྱད་མོ་རྩིས་བར་གྱི་རིག་གནས་ལ།། གདུལ་བྱ་རང་རང་བསམ་པ་བཞིན་དྲངས་ཏེ།། ཀུན་ཀྱང་མཁས་དང་གྲུབ་པའི་ས་ལ་བཞག། ཅེས་པ་ལྟར་ཞལ་སློབ་བགྲང་བར་མི་ནུས་པ་ཡོད་ཀྱང་གཙོ་བོ་བདག་ཉིད་ཆེན་པོ་དཔལ་ལྡན་ཆོས་སྐྱོང་གིས་དབུ་མཛད་མཁན་སློབ། ཇོ་ནང་གདན་ས་བ་འཇམ་དབྱངས་ནམ་མཁའ་ཆོས་སྐྱོང་། བྱམས་པ་གསེར་མཆོག་འོད་དཔལ། ཚ་སྣུབ་གནུབསབསམ་གཏན་རྒྱ་མཚོ། ཤངས་སྟོན་ཀུན་དགའ་དཔལ་ལྡན་སོགས་རྒྱུད་སྡེའི་སྲོལ་འཛིན་དུ་མ་ཡོད་ལ།

དེའི་ནང་ནས་གསོ་རིག་གི་སློབ་མ་དང་བླ་སྨན་ཟུང་དུ་འབྲེལ་བ་མིའི་ཉི་མ་མཐོང་བ་དོན་ལྡན་ནམ་བྱམས་པ་དཀོན་མཆོག་རིན་ཆེན་ནི། རྒྱལ་བ་ཕྱག་ན་པདྨའི་མི་རྗེའི་ཚུལ་བཟུང་བ་གནམ་ལྷ་བབས་ཀྱི་རྒྱལ་པོ། འགྲེང་མགོ་ནག་མིའི་རྗེ། འཕྲུལ་གྱི་ལྷ་བཙན་པོ་མེས་དཔོན་དབོནརྣམ་པ་གསུམ་ལ་སོགས་པ་བོད་ཆོས་རྒྱལ་གྱི་གདུང་དྲི་མ་མེད་པ་བསོད་ནམས་རྡོ་རྗེ་ཞེས་བྱ་བའི་སྲས་སུ་བལྟམས།ཆུང་ངུ་ནས་དཀོན་ཅོག་གསུམ་བླ་མར་འཛིན་ཅིང་། དད་པ་དང་བརྩོན་འགྲུས་ཆེ་བ། མ་རབས་དབུལ་ཕོངས་རྣམས་སྙིང་རྗེས་སྐྱོང་བ་སོགས་ཕལ་བའི་སྤྱོད་ཚུལ་ལས་འདས། ཡི་གེ་འདྲི་ཀློག་ལ་སོགས་པ་ཚེགས་མེད་དུ་མཁྱེན། སྐུ་ནར་སོན་ནས་འཕགས་ཡུལ་གྱི་པཎྜི་ཏ་ཆེན་པོ་ནགས་ཀྱི་རིན་ཆེན། ལོ་ཆེན་བསོད་ནམས་རྒྱ་མཚོ། བྱང་བདག་པོ་རིགས་ལྡན་རྣམ་རྒྱལ་གྲགས་བཟང་། བྲང་ཏི་དཔལ་ལྡན་འཚོ་བྱེད་ཀྱིས་མཚོན་མཁས་ཤིང་གྲུབ་བརྙེས་ཀྱི་སློབ་དཔོན་དུ་མ་བསྟེན་ཏེ། སྡེ་སྣོད་གསུམ་དང་རྒྱུད་སྡེ་བཞི་དགོངས་འགྲེལ་གྱི་བསྟན་བཅོས་དང་བཅས་པས་གཞི་བཟུང་། རིག་པའི་གནས་སྤྱི་དང་ཁྱད་པར་གསོ་བ་རིག་པ་ལ་ཕུལ་དུ་ཕྱིན་པས་དཔལ་ལྡན་རྒྱུད་བཞི། བརྒྱད་པ་རྩ་འགྲེལ། སྙན་བརྒྱུད་འགྲེལ་ཆེན། ཕྱི་ནང་གསང་གསུམ་གྱི་འགྲེལ་བ། རྒྱས་བཏབ་ཉེར་ལྔ་རྣམས་མཐའ་དྲུག་ཚུལ་བཞིའི་སྒོ་ནས་སྟོན་ཅིང་། གཏེར་རྒྱུད་ལ་ཆ་ལག་བཅོ་བརྒྱད་སོགས་བཤད་སྲོལ་མ་ཉམས་པ་དང་། ཁྱད་པར་རིགས་ལྡན་རྣམ་རྒྱལ་གྲགས་བཟང་ལ་སོ་མ་རཱ་ཛཛཱ ཟླ་ཟེར། བདུད་རྩི་བུམ་པ། སྦྱོར་བ་བརྒྱ་བ། མདོ་ལྔ་སོགས་སྨན་དཔྱད་ཕལ་ཆེ་བ་དང་། ཡབ་བསོད་ནམས་རྡོ་རྗེ་ལ་བཀའ་གཏད་རྒྱའི་དབང་། ཆུའི་ལྷ་མོའི་སྒྲུབ་སྐོར། སྙན་བརྒྱུད་ཀྱི་བྱིན་རླབས་ཚང་བ། བྲང་ཏི་ལ་ཆུའི་ལྷ་མོ་དང་དྲང་སྲོང་གི་སྒྲུབ་སྐོར་སོགས་གསན། མདོར་ན་བོད་གངས་ཅན་ན་དར་སོ་ཅོག་གི་གསོ་དཔྱད་མཐའ་དག་ལ་མཁྱེན་པའི་སྤྱན་རས་མཁའ་ལྟར་ཡངས་པའི་སྙན་གྲགས་ཀྱི་བ་དན་ཕྱོགས་བཅུར་གཡོ་བས། རྗེ་ཟུར་མཁར་བ་མཉམ་ཉིད་རྡོ་རྗེའང་ཐུགས་འཕྲོགས་ཏེ། རིགས་རུས་ཆོ་འབྲང་མིང་སོགས་ལ་བསྙད་ནས་དོན་དབུས་ཕྱོགས་སུ་ཕེབས་ཐུབ་མིན་དང་། བུ་སློབ་འདྲ་ལེགས་བཤད་ཞུ་བར་གཏོང་བཞེད་ཀྱི་དྲི་བ་ཞུས་པའི་ལན་ལ། སྭ་སྟི་སི་དྷཾ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ།། ཉི་མའི་གཉེན་མཆོག་བུ་རམ་ཤིང་བའི་སྲས།། གཽ་ཏམ་ཐུབ་དབང་ལྷ་ཡི་ལྷ་ལ་སོགས།། བགྲང་ཡས་མཚན་མངའ་ཤཱཀྱའི་རྒྱལ་པོ་ལ།། གུས་པས་བཏུད་ནས་བདག་གི་མིང་བཤད་དོ།། ལྷ་རིགས་ཇོ་བོའི་བརྒྱུད་དུ་བལྟམས་པ་ཡིན།། ལེགས་སྦྱངས་གསོ་རིག་དྲང་སྲོང་བརྒྱུད་མར་བྱོན།། གཞན་ཡང་རིག་གནས་མཁས་པའི་བརྒྱུད་པར་སྐྱེས།། མིང་ལ་ལྷ་བཙུན་ཇོ་སྲས་བྱ་བ་ཡིན།། ལེགས་བྱས་དཔལ་གྱིས་མི་དམན་དལ་འབྱོར་ཐོབ།། དད་བརྩོན་བརྩེ་བར་ལྡན་པས་བསྟན་ལ་དགའ།། སྟོན་པར་མི་ཕྱེད་དད་པའི་རྡོ་རྗེ་འཛིན།། ཁོ་བོའི་མིང་ལ་དཔལ་ལྡན་རྡོ་རྗེ་ཟེར།། འགྲོ་ཀུན་སྐྱོང་བའི་ཡིད་སྨོན་ཅི་ཡང་སྐྱེས།། དཀོན་ཅོག་གསུམ་ལས་གཞན་པའི་སྐྱབས་མི་ཚོལ།། དགེ་བའི་བཤེས་གཉེན་རིན་ཆེན་ཅོད་པན་འཛིན།། མིང་ལ་བྱམས་པ་དཀོན་ཅོག་རིན་ཆེན་ཟེར།། རྒྱ་ཆེ་ཐོས་པའི་དཀྱིལ་འཁོར་ཡོངས་གང་ཞིང་།། རིས་མེད་བརྩེ་བའི་བདུད་རྩིས་ཀུན་ནས་གང་།། རྩོད་དུས་མཚན་མོའི་ཀུན་ད་བསྐྱེད་བྱེད་པ།། མིང་ལ་དྲང་སྲོང་ཟླ་བའི་འོད་ཟེར་ཟེར།། གསོ་རིག་གཞུང་ལུགས་པད་ཚལ་ལེགས་པར་འབྱེད།། ཤེས་འདོད་རྣམས་ཀྱི་བློ་མིག་དོན་ལྡན་བྱེད།། ནད་མེད་ཚེ་རིང་ལོ་ཏོག་རྒྱས་བྱེད་པའི།། མིང་ལ་དྲང་སྲོང་མིའི་ཉི་མ་ཟེར།། སྣ་ཚོགས་རིག་པའི་ཁ་དོག་ཅི་ཡང་གསལ།། ཤེས་བྱའི་ཆུ་ཀླུང་འབུམ་ཕྲག་ངོམས་མེད་འཐུང་།། དྲན་དང་ཤེས་བཞིན་གསེར་གྱི་ས་གཞིའི་རྟེན།། མིང་ལ་དྲང་སྲོང་འཚོ་བྱེད་རྒྱ་མཚོ་ཟེར།། ལས་ངན་ཆེ་ལ་ཚོགས་གསོག་སྒྲིབ་སྦྱོང་བསྟན།། གདོན་དུ་ཆེ་ལ་སྒྲིབ་ཤིང་ཡས་སུ་ཆེ།། འཆི་ངེས་རྣམས་ལའང་ཆོས་བཤད་འཕྲལ་ཟུག་གཅོག། མིང་ལ་དྲང་སྲོང་མཐོང་བ་དོན་ལྡན་ཟེར།། རང་སྐྱོན་རྟགས་ནས་ཅི་ནུས་སྤོང་བས་དྲང་།། གཞན་སྐྱོན་རྟགས་ནས་ཅི་ནུས་འཆོས་པས་སྲོང་།། དྲང་སྲོང་ཆེན་པོའི་རིང་ལུགས་འཛིན་པའི་རིགས།། མིང་ལ་དྲང་སྲོང་རྒྱུད་འཛིན་བྱ་བ་ཡིན།། བསྟན་འཛིན་རྣམས་ལ་སྲོག་ལས་གཅེས་པར་འཛིན།། སྡིག་ལྡན་དྲིན་གྱིས་བསྐྱངས་ནས་བདེ་ལ་འགོད།། རང་ལ་གནོད་བྱེད་ལ་ཡང་ཅི་ཕན་བྱེད།། མིང་ལ་དྲང་སྲོང་ཀུན་གྱི་བཤེས་གཉེན་ཟེར།། གཞན་གྱིས་བཏང་བའི་ཡི་ཆད་ནད་པ་གསོ།། དབུལ་ཕོངས་སྐྱབས་མེད་རྣམས་ལ་ལྷག་པར་བྱམས།། མ་འདྲེས་གློ་བུར་མགྲོན་ལ་ཕེབས་པར་སྐྱོང་།། མིང་ལ་འཚོ་བྱེད་སྐྱེ་དགུའི་དཔལ་ཞེས་ཟེར།། ཆེན་པོས་བཀུར་ཡང་ཁེངས་པ་རྣམ་པར་སྤངས།། གཞན་གྱི་དོན་དུ་སྡུག་ཀྱང་སྐྱོ་བ་མེད།། བསྙེན་བཀུར་བསྔགས་པའི་ལན་ལ་རེ་བ་དོར།། མིང་ལ་དྲང་སྲོང་མིའི་དཔག་བསམ་ཟེར།། དེ་ལྟ་མི་རྣམས་འབྲས་བུའི་ནད་ལས་སྐྱོབ།། སླད་ནས་འགྲོ་ཀུན་དུག་གསུམ་འདོན་པར་སྨོན།། རྟག་ཏུ་ཀུན་ལ་ཕན་འདོགས་བསམ་སྦྱོར་ཅན།། མིང་ལ་དྲང་སྲོང་གཞན་ཕན་མཐའ་ཡས་ཟེར།། གསོ་རིག་མདོ་དང་རྒྱུད་སྡེ་འགྱུར་བ་དང་།། ལུགས་སྡེ་བཞི་ཡི་བསྟན་བཅོས་དུ་མ་དང་།། གངས་རིའི་ཁྲོད་ཀྱི་གསོ་དཔྱད་ཕལ་ཆེར་གོ། མིང་ལ་དྲང་སྲོང་གསོ་རིག་རབ་འབྱམས་ཟེར།། རྙེད་དཀའི་སྨན་རྣམས་འབད་རྩོལ་ཚོགས་ཀྱིས་སྒྲུབ།། སྒྲུབ་སླའི་སྨན་རྣམས་ལེ་ལོ་སྤངས་ནས་བསགས།། གསོ་བྱ་ཀུན་གྱི་རེ་བ་ཡིད་བཞིན་སྐོང་།། མིང་ལ་དྲང་སྲོང་སྨན་བྱིན་བྱ་བ་ཡིན།། ཕྱོགས་རིས་མངའ་ཐང་བདག་ཏུ་བཟུང་བ་མེད།། བྱམས་སྡང་མཐོ་དམའ་འབྱོར་རྒུད་མཉམ་པར་བཟུང་།། འོར་ཆེ་ཙམ་ཡང་དོན་དུ་གཉེར་བ་མེད།། མིང་ལ་དགེ་བསྙེན་འཚོ་བྱེད་བྱ་བ་ཡིན།། འཚོ་བྱེད་མཁས་རྣམས་བཀུར་སྟིས་བསྟོད་ཅིང་བསྔགས།། གཞོན་པ་རྣམས་ལ་མ་བརྙས་སྤྲོ་བ་བསྐྱེད།། རང་དང་མཉམ་པ་རྣམས་ལ་ཕྲག་དོག་སྤངས།། མིང་ལ་དྲང་སྲོང་སེམས་དཔའ་ལེགས་སེམས་ཟེར།། འཆི་བདག་ཞགས་པའི་དྲ་བ་དུམ་བུར་གཅོད།། ཟུག་གཟེར་དུག་མདའ་དྲག་པོ་གཅུར་གྱིས་འདོན།། ཟུངས་ཟད་གློ་བུར་རྒས་པ་དར་མར་བསྒྱུར།། མིང་ལ་དྲང་སྲོང་མི་འཇིགས་སྲོག་སྦྱིན་ཟེར།། ནད་པའི་ཚོགས་རྣམས་གསོས་པར་བྱས་པ་ཡི།། དེ་ཡི་གཉེན་དང་མཛའ་བཤེས་འཁོར་རྣམས་ཀུན།། འབྲལ་བར་མི་ཕོད་དེ་ལ་དགའ་སྟོན་བྱེད།། མིང་ལ་དྲང་སྲོང་མྱ་ངན་མེད་ཅེས་ཟེར།། གསོ་སླ་བ་རྣམས་ཟས་སྤྱོད་སྨན་གྱིས་གསོ།། དེ་ལས་ལོག་རྣམས་བྱ་ལོག་ཁྱུག་དཔྱད་བསྔགས།། གཉི་ག་མིན་ལ་འཕྲུལ་འཁོར་སྔགས་དམིགས་བསྟན།། མིང་ལ་དྲང་སྲོང་ཐབས་ཚུལ་དཔག་མེད་ཟེར།། སྨན་བླའི་དགོངས་པ་གསལ་བྱེད་རྩོམ་པ་དང་།། རྗེས་འཇུག་བློ་མིག་འབྱེད་པའི་ལེགས་བཤད་དང་།། ལོག་རྟོག་རྩོད་པ་གཅོད་པའི་རལ་གྲི་འཛིན།། མིང་ལ་དྲང་སྲོང་གསོ་རིག་བསྟན་འཛིན་ཟེར།། ནད་མེད་བསྲུང་དང་ཐབས་ཀྱི་བཅུད་ལེན་འཚོ།། ནད་ལྡན་འདུ་བ་འཁྲུགས་པ་བདེ་བར་འཚོ།། དགེ་སྡིག་བླང་དོར་བསྟན་ནས་ཕྱི་མ་འཚོ།། མིང་ལ་དྲང་སྲོང་རྟག་ཏུ་འཚོ་བྱེད་ཟེར།། ལྷ་རིགས་མིའི་རྒྱལ་པོས་བསྔགས་ཤིང་བཀུར།། བསྟན་ལ་རབ་དགའི་འཆི་མེད་དུ་མས་བསྟོད།། མཁས་པ་དུ་མས་ཡི་རངས་ལེགས་སོ་བྱིན།། མིང་ལ་དྲང་སྲོང་ལྷ་ཡི་རྗེ་བོ་ཟེར།། གང་ནའང་སུ་ཞིག་ཉམ་ཐག་དེ་ཡི་སྐྱབས།། མ་འདྲིས་ཀུན་ལ་ཡིད་གཅུགས་ཕ་མ་བཞིན།། སྒོ་གསུམ་སྤྱོད་པ་གཞན་ཕན་ཉག་གཅིག་སྒྲུབ།། མིང་ལ་དྲང་སྲོང་འགྲོ་བའི་ཕ་མ་ཟེར།། ཉིན་མཚན་མུན་པའི་གླིང་དུ་འཐོམས་པ་རྣམས།། གསེར་གྱི་ཐུར་མས་ཆུ་སྦུར་མིག་ཕྱེ་ནས།། སྣ་ཚོགས་གཟུགས་ཀུན་འཕྲལ་དུ་མཐོང་བྱེད་པ།། མིང་ལ་དྲང་སྲོང་གསལ་བྱེད་སྒྲོན་མེ་ཟེར།། མཐོང་ཐོས་དྲན་དང་རེག་པའི་སེམས་ཅན་ཀུན།། འགལ་རྐྱེན་ཀུན་བྲལ་མཐུན་རྐྱེན་མ་ལུས་འཛོམ།། དྲང་སྲོང་ཆེན་པོའི་གོ་འཕང་ཐོབ་པར་སྨོན།། མིང་ལ་དྲང་སྲོང་སྨོན་ལམ་མཐའ་ཡས་ཟེར།། རྣག་ཁྲག་རྩ་ཆུ་ལ་སོགས་ཁྱི་ཕག་བཞིན།། ནད་པའི་བྱ་བ་ཀུན་ལ་བྲན་གཡོག་བཞིན།། གསོ་བྱའི་གཉེན་པོ་ཀུན་ལ་འདོད་འཇོ་བཞིན།། མིང་ལ་དྲང་སྲོང་འགྲོ་བའི་ཁོལ་བོ་ཟེར།། དོན་དམ་གནས་ལུགས་སྤྲོས་དང་བྲལ་བར་རིག། ཀུན་རྫོབ་རྟེན་འབྲེལ་རྨི་ལམ་ལྟ་བུར་ཤེས།། ཐབས་ཤེས་ཟུང་འཇུག་བགྲོད་གཅིག་ལམ་དུ་མཐོང་།། མིང་ལ་དྲང་སྲོང་རྒྱལ་སྲས་གཞོན་ནུ་ཟེར།། ཉེས་བརྒྱའི་རྩ་བ་ཆང་གི་བཏུང་བ་དོར།། སྙིང་རྗེའི་འགལ་ཟླ་ཤ་ཁྲག་བཟང་བཟའབཏུང་སྤངས།། དགེ་ལེགས་རྩ་བ་ཀུན་ད་དངབྱང་སེམས་བཟུང་།། མིང་ལ་དྲང་སྲོང་དྲི་མེད་བརྟུལ་ཞུགས་ཟེར།། སྣོད་བཅུད་དག་པའི་འཁོར་ལོ་ཡིད་ཆེས་རྙེད།། དབང་དང་དམ་ཚིག་ཐོབ་དང་སྲུང་བྱ་རིག། རིམ་གཉིས་རྡོ་རྗེ་ཐེག་པའི་སྲོག་རྩར་མཐོང་།། མིང་ལ་དྲང་སྲོང་འཆི་མེད་སྙིང་པོ་ཟེར།། སྐྱབས་གནས་འདུས་པ་བླ་མ་གཅིག་པོར་མཐོང་།། མཆོད་འོས་འདུས་པ་ཇོ་བོ་སེམས་ཅན་རྙེདསྙེད།། ཆོས་ལུགས་ཐམས་ཅད་འཁོར་འདས་མཉམ་པར་གོ། མིང་ལ་དྲང་སྲོང་གསང་བའི་མཛོད་འཛིན་ཟེར།། ཚེ་རབས་དུ་མར་གསོ་དཔྱད་གཞུང་ལུགས་བསླབས།། འཕགས་ཡུལ་གངས་རིའི་ཁྲོད་དུ་འགྲོ་ཕན་བྱས།། ཚུལ་འདིས་འགྲོ་བ་འདྲེན་པར་ཡི་དམ་བཅས།། མིང་ལ་དྲང་སྲོང་དེ་དང་དེ་སྐད་ཟེར།། གསོ་རིག་ཤེས་འདོད་ཀུན་ལ་སྤྲོ་བས་སློབ།། གངས་ཅན་ནད་པའི་ཚོགས་ཀུན་འབད་པས་གསོ།། གཞན་ཕན་གང་དུ་ཆེ་སར་ཁོ་བོ་གནས།། མིང་ལ་རྒྱལ་ཁམས་ལྷ་རྗེ་ཟེར་བ་ཡིན།། ཨ་ཀྱང་བདག་ལ་དེ་འདྲའི་ཡོན་ཏན་ནི།། ཉེ་རིང་སྐྱེ་བོ་དབང་གྱུར་ག་ལ་ཞིག། ཕྱིན་ཆད་རང་ཡང་དེ་འདྲར་སྨོན་ཕྱིར་དང་།། རྗེས་འཇུག་རྣམས་ལའང་བསྐུལ་བའི་སླད་དུ་ཡིན།། ཐག་རིང་ཡུལ་ནས་ཤིན་ཏུ་ཉེ་བའི་ཐུགས།། ཆུང་བ་བདག་ལ་ཆེན་པོར་རེ་བ་ཁྱོད།། མིང་མེད་བདག་ལ་མིང་གི་དྲི་བ་མཛད།། སོམ་ཉི་མེད་པར་ཐེ་ཚོམ་གྲོལ་པར་མཛོད།། ཡིད་ལ་སྨོན་པ་རྗེས་མཐུན་རང་གི་མིང་།། མཁས་པ་མགུ་ཕྱིར་ཡི་གེར་བྲིས་འདི་ཡིས།། མ་འོངས་དུས་སུ་མི་རིང་འགྲོ་བ་ཀུན།། དྲང་སྲོང་ཆེན་པོས་ལུང་བསྟན་མིང་ཐོབ་ཤོག། ཅེས་གང་གསུངས་པའི་རིགས་རུས་དང་ཡོན་ཏན་མངའ་ཞིང་། ཐུགས་ལས་འཁྲུངས་པའི་ལེགས་པར་བཤད་པའང་གསོ་དཔྱད་ཀྱི་རྒྱལ་པོ་ཞེས་བྱ་བའི་བསྟན་བཅོས་དང་དཔལ་ལྡན་རྒྱུད་བཞིར་འགྲེལ་བ་བཀོད་པ་རྣམ་བཞི།རྒྱུན་རྒྱུདརྣམ་བཞི་ཞེས་པ་དང་། མངོན་པར་རྟོགས་པའི་གསོལ་འདེབས། རྒྱུད་བཞིའི་རྣམ་ངེས་སམ་བཀའ་སྒྲུབ། མ་ལ་ཡའི་དཀའ་འགྲེལ་འདོད་འཇོ་ཆེ་ཆུང་། ཁྱད་འཕགས་སྤྱི་སྨན་དང་། ངོ་མཚར་སྤྱི་སྨན། རིམ་བཅོས་མི་ལ་སྲོག་སྦྱིན། བཤད་རྒྱུད་ལེའུ་བཞི་པའི་འགྲེལ་བ་གནས་ལུགས་རབ་གསལ། རྩ་མདོའི་འགྲེལ་བ་སྙན་བརྒྱུད་རྡོ་རྗེའི་ཚིག་རྐང་གཅེས་བསྡུས་རིན་ཆེན་འཕྲེང་བ་ལ་སོགས་པ་མཛད་དེ་གསོ་བ་རིག་པའི་གཞུང་ལུགས་མན་ངག་ཐམས་ཅད་དང་། ཁྱད་པར་རིགས་ལྡན་ཟླ་བ་བཟང་པོའི་རྣམ་སྤྲུལ་ཕྱག་ན་པདྨོ་དགེ་འདུན་གྲུབ་སོགས་དམ་པ་དུ་མས་ངོས་བཟུང་བ་རྒྱལ་པོ་པཎྜི་ཏའི་རྟུལ་བརྟུལཞུགས་འཆང་བ་རྣམ་རྒྱལ་གྲགས་བཟང་གི་བཞེད་སྲོལ་དར་རྒྱས་སུ་མཛད་པ་ཡིན་ནོ།། དེའི་སྲས་ལྷ་བཙུན་བཀྲ་ཤིས་དཔལ་བཟང་ནི། སྐུ་ཆུང་ངུའི་དུས་མེས་པོ་བསོད་ནམས་རྡོ་རྗེས་གཅེས་པར་བསྐྱངས་ཤིང་། ཡི་གེ་འབྲོ་འབྲིཀློག་གིས་མཚོན་པའི་ཐོས་བསམ་རྒྱ་ཆེར་མཛད། ཕྱིས་མེས་དང་ཡབ་གཉིས་ཀ་གསོ་བ་རིག་པའི་གཞུང་ལུགས་རབ་འབྱམས་རྒྱ་མཚོ་མཐའ་དག་དང་། ལྷག་པར་རྒྱུད་བཀའ་གཏད་རྒྱའི་དབང་། ཆུའི་ལྷ་མོ། སྙན་བརྒྱུད་འགྲེལ་ཆེན་ཕྱི་ནང་གསང་གསུམ། རྒྱས་བཏབ་ཉེར་ལྔའི་བཤད་སྲོལ་དང་བཅས་པ་གསན་ཅིང་། སྐལ་བ་དང་ལྡན་པའི་རྗེས་འཇུག་རྣམས་ལ་གསོ་དཔྱད་ཀྱི་འཆད་ཉན་ལེགས་པར་བསྐྱངས།པཎྜི་ཏ་ནགས་ཀྱི་རིན་ཆེན། ལོ་ཆེན་བསོད་ནམས་རྒྱ་མཚོ། སེམས་དཔའ་ཆེན་པོ་གཞོན་ནུ་རྒྱལ་མཆོག མུས་ཆེན་དཀོན་ཅོག་རྒྱལ་མཚན། གྲུབ་དབང་ཐང་སྟོང་པ། མཁས་གྲུབ་དོན་ཡོད་དཔལ་བ་དང་། ལེགས་བཤད་བཟང་པོ་དང་། ཆག་ལོ་ཐམས་ཅད་མཁྱེན་པ་སོགས་འཁྲུལ་ཟད་ཀྱི་ཡོངས་འཛིན་དམ་པ་དུ་མའི་ཞབས་པད་བསྟེན་ཏེ་མདོ་སྔགས་རིག་གནས་ཀྱི་བདུད་རྩི་ངོམ་མེད་དུ་བཞེས། འཁོར་བ་ལ་ངེས་པར་ཡིད་བྱུང་སྟེ་པཎ་ཆེན་ཤཱཀྱ་མཆོག་ལྡན་ལ་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས་ནས་འགྲོ་བ་ལྷ་དང་བཅས་པའི་ཡོན་གནས་སུ་གྱུར། གནས་སྐབས་སེམས་ཅན་ཐམས་ཅད་ལ་སྔགས་མིག ཁྱུག་དཔྱད། ཇ་ལོག་ལ་སོགས་རྟེན་འབྲེལ་ཟབ་མོའི་སྒོ་ནས་ཕན་པ་རླབས་ཆེ། བཀའ་རྩོམ་ཡང་བཤད་རྒྱུད་ཀྱི་འགྲེལ་བ་ལེགས་བཤད་ནོར་བུ། ཕྱི་རྒྱུད་འགྲེལ་བ་དགོས་འདོད་འབྱུང་བ་རིན་པོ་ཆེའི་བང་མཛོད་དམ་བཀླགས་པས་ཀུན་ཤེས། ཁོག་འབུབས་འཛུམ་དཀར་བཞད་པའི་ཉི་མ་དང་། རྒྱུད་བཞིའི་རྣམ་ངེས་དཔག་བསམ་ལྗོན་ཤིང་ལ་སོགས་པ་མཛད། རིམ་གཉིས་ཟབ་མོའི་རྣལ་འབྱོར་ལ་ཐུགས་གཞོལ་བའི་ངང་ནས། ང་ནི་བདེ་བ་ཅན་དུ་འགྲོ། ཞེས་སོགས་ཞལ་གདམས་དུ་མ་དང་བཅས་དྲན་དང་ཤེས་བཞིན་དུ་མྱ་ངན་ལས་འདས། མེ་ཏོག་གི་ཆར་བབས། འཇའི་གུར་ཕུབ། བར་སྣང་ནས་རོལ་མོའི་སྒྲ་གྲགས་པ་སོགས་ངོ་མཚར་བའི་ལྟས་དུ་མ་བྱུང་། རྗེ་བཙུན་མ་སྒྲོལ་མས་མ་འོངས་པ་ན་འཇིག་རྟེན་གྱི་ཁམས་སྤྱན་ཡོངས་སུ་དག་པ་ཞེས་བྱ་བར་སངས་རྒྱའོ་ཞེས་ལུང་བསྟན་པ་སོགས་རྣམ་ཐར་འགངས་ཆེ་བ་མང་། དེས་སྐུ་ཚེའི་སྟོད་དུ་བསྐྲུན་པའི་སྲས་དྲང་སྲོང་བསོད་ནམས་ཡེ་ཤེས་རྒྱལ་མཚན་པས་ཡབ་ཀྱི་ཞབས་པད་ཡུན་དུ་བསྟེན་ནས་གསོ་བ་རིག་པར་སྦྱངས། གཞུང་མན་ངག་སྤྱི་དང་ཁྱད་པར་དཔལ་ལྡན་རྒྱུད་བཞིའི་བཀའ་གཏེར་ཆུ་བོ་གཉིས་འདྲེས་ཀྱི་གདམས་ངག་ཞལ་ཤེས། བཀའ་གཏད་རྒྱའི་དབང་། ཆུ་ལྷ་དང་དྲང་སྲོང་གི་སྒྲུབ་སྐོར། སྙན་བརྒྱུད་ཀྱི་ཕྱག་ལེན། འགྲེལ་བཤད་སོགས་བུམ་པ་གང་འཇོའི་ཚུལ་དུ་བཞེས། བྱང་རོང་དུས་འཁྲུག་གི་སྟབས་ཕྱིས་རིན་སྤུངས་པའི་བླ་སྨན་དུ་གྱུར། གཙང་རོང་རལ་ལྔར་སྨན་གྱི་ཁོག་འབུབས་པད་དཀར་རྒྱས་པའི་ཉིན་བྱེད་མཛད། འཇག་ཐང་དུ་སྐུའི་བཀོད་པ་བསྡུས། རིགས་ལྡན་ཆོས་ཀྱི་རྒྱལ་པོ་རྣམ་རྒྱལ་གྲགས་པ་དཔལ་བཟང་པོའི་གསོ་རིག་གཙོ་བོར་གྱུར་པའི་བུ་ཆེན་གཅིག་ནི་གནང་རིགས་རྗེས་སྦྱངས་ཀྱི་སྨན་པ་ལྷུན་སྡིངས་པ་ལེགས་གྲུབ་དཔལ་བ་ཡིན་ཏེ། དེའི་ཐོག་མའི་རིགས་རུས་ལ་སོགས་པ་ནས་ཅུང་ཟད་སྨོས་ན། སྔོན་མདོ་ཁམས་བྱང་ཕྱོགས་གེ་སར་གྱིས་ཡུལ་གྲུར་མངའ་བསྒྱུར་པའི་ཆོས་རྒྱལ་དགེ་བ་འཛིན་ཞེས་བྱ་བ་ལུགས་གཉིས་ཀྱི་མཁྱེན་པ་ཡངས་ཤིང་། སེམས་ཅན་ཐམས་ཅད་ལ་བུ་གཅིག་པ་ལྟར་མཉེན་ཞིང་བྱམས་པས་ཀུན་གྱི་མིག་གི་བདུད་རྩིར་གྱུར་ནས། ཐམས་ཅད་ཀྱིས་ངག་མཐུན་པར་འདི་ནི་ཀུན་གྱི་གཉའ་བར་འཁུར་རིགས་སོ་ཞེས་ཟེར་བ་ལས་གཉའ་བར་གྲགས། དེའི་སྲས་ལྔའི་ཆེ་བ་གཉའ་བ་ཆོས་ཀྱི་བཟང་པོ་སྒོ་བཟང་སྐྱེ་མཆེད་དྭངས་ཤིང་དད་པ་དང་ཤེས་རབ་ཆེ་བའི་སྙན་གྲགས་དང་ལྡན་པ། ལྷ་བཙན་པོ་མངའ་བདག་ཁྲི་སྲོང་ལྡེའུ་བཙན་གྱིས་གསན་ཏེ་མདོ་ཁམས་ནས་དབུས་སུ་འགུགས་པ་མཛད། དེ་ནས་གསེར་གྱི་པ་ཏྲ་མང་པོ་དང་གྲོགས་དུ་མར་བཅས་ཏེ་རྒྱ་གར་དུ་རིག་པ་སློབ་པ་དང་ལོ་པཎ་སྤྱན་འདྲེན་ལ་སོགས་པར་བརྫངས། དེས་ཀྱང་འཕགས་ཡུལ་དུ་ལོ་མང་བཞུགས། རིག་པའི་གནས་ཕལ་ཆེར་སྦྱངས། མཁས་པར་གྱུར་ནས་བོད་དུ་བྱོན། རྒྱལ་པོ་ཤིན་ཏུ་མཉེས་ཏེ་བླ་མཆོད་དང་ལྷ་རྗེ་དུ་དབང་བསྐུར། ཨོ་རྒྱན་སངས་རྒྱས་གཉིས་པ་པདྨ་འབྱུང་གནས་ལ་རྡོ་རྗེ་ཐེག་པའི་སྨིན་གྲོལ་གྱི་གདམས་པ་དུ་མ་གསན། བོད་སྨན་མཁས་པ་མི་དགུའི་གཙུག་རྒྱན་དུ་གྱུར་པ་ནས་མི་རབས་འགའ་ཞིག་གི་མཐར། གཉའ་བ་ནམ་མཁའ་གཞོན་ནུ་གཡས་རུ་བྱང་གི་ཕྱོགས་སུ་བྱོན། བྱང་བདག་ཏ་དབེན་ནམ་བརྟན་པས་ཡ་རོང་དང་གཙང་འོ་ལུང་གི་མི་སྡེ་དང་། རི་ཕུག་གི་དགོན་པ་སོགས་སྦྱོར་འཇགས་གནང་། དེ་སྲས་གཉའ་བ་རྡོ་རྗེ་འབུམ་གྱིས་བྱང་བདག་པོའི་བླ་སྨན་དང་ཕྱག་གཡོག་ནང་མ་བྱས་དེ་སྲས་ལྷའི་རྒྱལ་མཚན་མདོ་སྔགས་ཀྱི་མཁྱེན་པ་རྒྱས་པས་དཔལ་ངམ་རིང་གི་མཁན་སར་འཁོད་ཅིང་། གྲགས་གཞོན་པས་སྨན་དང་སྲིད་བསྐྱངས། དེའི་སྲས་དཀོན་ཅོག་གཞོན་ནུ་གསོ་བ་རིག་པ་དང་སྔགས་རྙིང་མ་ལ་མཁས། སེམས་ཅན་ཐམས་ཅད་ལ་ཐུགས་བརྩེ་བས་བྱང་ཆུབ་སེམས་དཔར་གྲགས། ཐེག་ཆེན་ཆོས་རྗེ་རྒྱའི་བླ་མར་བྱོན་པའི་བླ་སྨན་བགྱིས་ཏེ་རྒྱའི་ལུང་དང་འཇའ་ས་ལོན།དེའི་སྲས་ལེགས་གྲུབ་དཔལ་རིག་གནས་ཕལ་ཆེར་དང་ཁྱད་པར་གསོ་རིག་ལ་མཁས། རྗེ་བཙུན་མ་སྒྲོལ་མའི་བསྙེན་པ་སོང་ཞིང་། གཏེར་སྟོན་དངོས་གྲུབ་རྒྱལ་མཚན་གྱི་ཞབས་ལ་ཐུག ཟབ་པ་དང་རྒྱ་ཆེ་བའི་ཆོས་དུ་མ་ནོས་པ་ལས་གུ་རུ་མཐིང་གར་རྩལ་དུ་ཐོན་པས་གཏོར་མ་དངོས་སུ་ཕྱིན་ཏེ་དགྲ་བོ་ཚར་གཅོད་པ་སོགས་བྱུང་། རིགས་ལྡན་རྣམ་རྒྱལ་གྲགས་བཟང་ལས་གསོ་རིག་གི་གཞུང་བཤད་གདམས་པ་མང་དུ་གསན་ཅིང་བུ་ཆེན་དུ་མངའ་གསོལ། དེའི་སྲས་ཤེས་རབ་དཔལ་ལྡན་འཁྲུངས་རྟགས་ཡ་མཚན་པ་སོགས་བྱུང་བས་རིགས་ལྡན་རྣམ་རྒྱལ་གྲགས་བཟང་ལ་མིང་ཞུས་པར་འཚོ་བྱེད་པད་མ་སྲི་ཐར་དུ་བཏགས། པཎྜི་ཏ་ནགས་ཀྱི་རིན་ཆེན་བོད་ཡུལ་དུ་ལན་གསུམ་བྱོན་པའི་ཕྱི་མའི་སྐབས་ཡར་ལམ་མཇལ། ཤེར་སྙིང་རྒྱ་སྐད་མའི་ལུང་དང་དཔལ་དུས་ཀྱི་འཁོར་ལོའི་དབང་ཡོངས་སུ་རྫོགས་པ་གནང་། དགུང་ལོ་ཉེར་དྲུག་པ་ལ་གྲུབ་པའི་དབང་ཕྱུག་ཐང་སྟོང་རྒྱལ་པོའི་དྲུང་དུ་བྱོན། མཇལ་བའི་མོད་ལ་བྱིན་རླབས་ཁྱད་པར་ཅན་ཞུགས། ལོ་བཅུ་དྲུག་གི་བར་སྐུ་དངོས་ཀྱི་ཉེར་གནས་མཛད། གདམས་པ་མཐའ་ཡས་པ་གསན་ཅིང་ཉམས་སུ་བཞེས་པས་ཐུགས་སྲས་དམ་པར་གྱུར། གྲུབ་དབང་ཉིད་ཞིང་ཁམས་འཕོས་ནས་ལོ་སུམ་ཅུ་སོ་གཉིས་ཀྱི་རིང་གསང་ཁོག་ནས་སྐུ་ཚབ་མཛད་དེ་དངོས་དང་དབྱེར་མེད་པའི་འགྲོ་དོན་དཔག་མེད་བྱུང་། མཁས་གྲུབ་ཤེས་རབ་དཔལ་ལྡན་གྲུབ་ཆེན་ཐང་སྟོང་པའི་དྲུང་དུ་མ་བྱོན་གོང་གི་སྲས་ལྷུན་སྡིངས་དགེ་མས་གསོ་རིག་གི་བཤད་སྲོལ་བསྐྱངས། གཡས་རུ་བྱང་པའི་བླ་སྨན་དུ་གྱུར། དེའི་སྲས་བསྟན་པ་དར་རྒྱས་ཆུང་ངུ་ནས་བཟང་པོའི་ལས་སད་པའི་དད་བརྩོན་ཤེས་རབ་སྙིང་རྗེ་དང་ལྡན། འཛིན་ཤེ་ཤེསཡངས་པས་གོས་ཚགས་བྱེད་རིང་ལ་མདའ་ཚད་མའི་ཤོག་ལོགས་རེ་བློར་ཟིན། བྱང་བདག་པོར་རྒྱུད་བཞི་འགྲེལ་བཅས་དང་སྙིང་པོ་བསྡུས་པའི་རྒྱུགས་ཕུལ། དེ་ཡང་བྱང་སྨན་ལྷའི་བཙུན་པ་བཀྲ་ཤིས་དཔལ་བཟང་གི་སྲས་དྲང་སྲོང་བསོད་ནམས་རྒྱལ་མཚན་འཇག་ཐང་དུ་རིན་སྤུངས་པའི་སྒར་ལ་སྐུ་ཚེའི་འཕེན་པ་བཏང་བས། བྱང་པའི་དཔོན་ཞེན་དང་གདམས་པའི་ཆུ་བོ་ནུབ་ན་འཕངས་པར་དགོངས་བྱང་པར་མི་ཆེད་བསྟོད་ཀྱིས་བརྫངས་ཏེ། བདག་གི་རིགས་ཆོས་གཉི་གའི་བུ་དེ་ནི་ལྔ་ལམ་དུ་སོང་། ཆིག་བརྒྱུད་ཀྱི་གདམས་པ་འདི་བྱང་པ་རང་གི་བླ་སྨན་ཐུགས་བློས་འཁེལ་ཞིང་ཤེས་རབ་ཆེ་བ་ཞིག་ལ་འབུལ་བས་རྫོང་སྟར་གཏེརམཛོད་ཞུས་པ་བཞིན། བསྟན་པ་དར་རྒྱས་བླ་སྨན་གྱི་རྒྱུད་དང་ཤེས་རབ་ཆེ་བ་བཅས་གཏིང་བ་མཛད་པས་ཞབས་པད་ཡུན་དུ་བསྟེན་ཏེ་མདོ་སྔགས་རིག་གནས་དང་།ཁྱད་པར་གསོ་བ་རིག་པའི་གཞུང་མན་ངག་དྲང་སྲོང་ཡིད་ལས་སྐྱེས་ནས་བཟུང་ཡི་གེར་འདྲིར་མ་བཏུབ་པའི་སྙན་བརྒྱུད་ཞལ་ཤེས་དང་བཅས་པ་བུམ་པ་གང་འཇོར་བསྩལ། གཉའ་རིགས་གོང་མ་རྣམས་རིགས་ལྡན་སོགས་ཀྱི་ཞབས་ལ་ཐུག་པའི་མཁས་པ་ཤ་སྟག་ཡིན་ཀྱང་། བྱང་ལུགས་བཀའ་གཏེར་ཆིག་བརྒྱུད་ཀྱི་གདམས་པ་ཟབ་མོ་འདི་ཡན་ལ་མ་བྱུང་བར་གྲགས། བསྟན་དར་བའི་སྲས་བསོད་ནམས་ཆོས་འཕེལ་སྙན་བརྒྱུད་ཞལ་ཤེས་མན་ངག་གི་བདག་པོར་གྱུར་ཞིང་། ངོ་མཚར་རྩ་བདུན་ལ་ནང་བྱན་ཆུད་པས་ཁ་སྨར་དམརཐམས་ཅད་མངོན་ཤེས་ཡོད་པ་ལྟ་བུ་བྱུང་། དེ་སྲས་བདུད་རྩི་འགྱུར་མེད་གསོ་བ་རིག་པར་མཆོག་ཏུ་མཁས་པས་ཇོ་ནང་སྤྲུལ་བའི་སྐུ་ཀུན་དགའ་སྙིང་པོའི་བླ་སྨན་དང་།རྒྱུད་བཞི་པར་དུ་བརྐོ་བའི་དོ་དམ་དང་ཞུས་ཆེན་མཛད། གསོ་དཔྱད་ཀྱི་ལག་ལེན་དགོས་འདོད་ཀུན་འབྱུང་བརྩམས། དེ་སྲས་རྣམ་རྒྱལ་རྡོ་རྗེ་ཞེས་ཤེས་བྱ་སྤྱི་དང་། ཁྱད་པར་འཆི་གསོས་ཀྱི་གཞུང་ཆེན་པོ་འདི་ཉིད་ལ་རྒྱུད་བཞི་བློར་བྱང་། འགྲེལ་བ་མན་ངག་དང་བཅས་པར་གཞིག་པར་ཆུགཆུགས། རང་རིགས་བདུད་རྩི་འགྱུར་མེད་སོགས་མཁས་ནས་མཁས་སུ་བརྒྱུད་པའི་ཆིག་བརྒྱུད་ཀྱི་རིམ་པ་ཉམས་སུ་ལོངས། ན་ཚོད་དྲུག་ཅུར་ཉེ་བའི་བར་ཉིན་སྟར་ལྟརཤློ་ཀ་རེ་བློ་འཛིན་དང་། འབྲུ་བསྣན་རྒྱུད་རྒྱུགས་སོགས་ལ་ཐོགས་པ་མེད་པ་ཞིག་ཡིན་འདུག་ཀྱང་། ལེགས་བཤད་རིན་པོ་ཆེ་ལས། མཁས་པ་རྩད་ཅིང་མ་དྲིས་པ།། དེ་ཡི་བར་དུ་གཏིང་མི་དཔོགས།། རྔ་ལ་དབྱུག་གུས་མ་བསྣུན་པར།། དེ་སྲིད་གཞན་དང་ཁྱད་ཅི་ཡོད།། ཅེས་པ་ལྟར་ལུས་པ་རྡོ་རིང་ལ་ཡི་གེ་སྦྱར་བ་སོགས་ནས་རྗེ་བླ་མ་ལྔ་པ་ཆེན་པོའི་སྐུ་ཚེའི་སྨད་དུ་སྤྱན་སྔར་ཐོགས་ཏེ་འབྲུ་འཛིན་སོགས་བསྩལ། ཡུལ་ཐིག་སྡོང་འགྲེམས་གཉུག་མར་གནས་པ་རྣམས་ལའང་འཁྲིད་དུ་འཇུག་པའི་དགོངས་པ་ཙམ་བསྟང་རྟིངམཚམས་སུ་ལུས་ཤིང་རྗེས་སུ་ཁོ་བོས་ཁེངས་གཅོག་འཇུར་བཀག་གི་དྲི་མལ་མང་བ་དང་། རྣམ་གླིང་པཎ་ཆེན་དང་ཁྱམས་སྟེང་དུ་དྲི་མལ་ཁ་ཡར་བགྱིད་བཅུག་པ་ཧ་ཅང་གི་ཁེངས་པ་དང་ང་རྒྱལ་ཆེ་ཞིང་བཟང་རྩི་ཆུང་བ་ལས་རྗེས་འཛིན་གྱི་རིག་པ་འདིར་གཞུང་བཤད་སྨན་ངོ་རྩ་ཡུལ་སྡོང་འགྲེམས་སོགས་དུས་སྐབས་འདིར་འགྲན་ཟླ་དང་བྲལ་པར་མངོན་ཏེ་ཁོ་བོས་ཀྱང་ཡུལ་ཐིག་སྡོང་འགྲེམས་ལ་སོགས་པ་ཆིག་བརྒྱུད་ཀྱི་ཞལ་ཤེས་མང་དུ་ནོས་པ་ཡིན་ལ། དེའི་བརྒྱུད་འཛིན་དགའ་ལྡན་སྨན་བླ་རྒྱུད་ངེས་ཤིང་སྨན་ངོ་འཇགས་པ་ཙམ་སྣང་ཡང་། སྙོམས་ལས་དང་ལེ་ལོ་ཆེ་ཞིང་བརྩོན་པ་ཆུང་བའི་ས་པཎ་གྱི་ཁུ་བྱུག་རྒྱ་ཁྲའི་དཔེར་གསུངས་པ་ཐོག་ཏུ་བབས་ཀྱི་དོགས། དེ་ལྟར་བྱང་ལུགས་ལ་བཀའ་མ་དང་། གཏེར་མའི་བརྒྱུད་པ་གཉིས་སུ་སྣང་བ།

  གཏེར་བརྒྱུད་ནི། སྟོན་པ་སྨན་བླ། གསུང་སྤྲུལ་ཡིད་ལས་སྐྱེས། འཕགས་པ་ཀུན་དགའ་བོ། འཚོ་བྱེད་གཞོན་ནུ། ཨོ་རྒྱན་པདྨ། མཁས་མཆོག་ཀླུ་སྒྲུབ། སློབ་དཔོན་དཔའ་བོ། ཁ་ཆེ་ཟླ་དགའ། ལོ་ཆེན་བཻ་རོ་ཙ་ན། ཆོས་རྒྱལ་ཁྲི་སྲོང་ལྡེ་བཙན། སྦྲུལ་སྤྲུལབའི་གཏེར་སྟོན་གྲ་གྲྭཔ་མངོན་ཤེས། དབུས་པ་དར་གྲགས། རོག་སྟོན་དཀོན་ཅོག་སྐྱབས། བི་བྱི་སྨན་གཞོན། ཟླ་འོད་གཞན་གཞོནནུ། ཞང་སྨན་ནག རིགས་འདུས་སྨན་པའི་རྒྱལ་པོ་གཡུ་ཐོག་ཡོན་ཏན་མགོན་པོ། དེས་བི་ཇི་སོགས་མ་བརྒྱུད་པར་རོག་སྟོན་དཀོན་ཅོགསྐྱབས་ཁོ་ནར་གསན་པའི་ལུགས་གཅིག་ཀྱང་མཆིས། གཡུ་ཐོག་པར་སྲས་བརྒྱུད་སློབ་རྒྱུད་གཉིས་ཟུར་མཁར་བས་མི་གཅིག་པར་མཛད་འདུག་སྟེ་ཕྱི་མ་རྫའམ་སུམ་སྟོན་ཡེ་ཤེས་གཟུངས། སུམ་སྟོན་ཡེ་ཤེས་ཀུན་དགའ། སུམ་སྟོན་འབུམ་མེ། ལུང་དམར་མགོན་པོ་རིན་ཆེན།སྟག་སྡེ་བ་ཕག་སྟོན་ཤཱཀྱ་མགོན་པོ། སྟག་སྡེ་སྦུག་སྤུགམ་བ། གཡུ་ཐོག་པའི་སྲས་བརྒྱུད་ལ་འབུམ་སེང་། འཇམ་དཔལ། བྲང་ཏི་འཇམ་དཔལ་བཟང་པོ། དེ་སྲས་བྲང་ཏི་རྒྱལ་བཟང་། གཅུང་བྲང་ཏི་དཔལ་ལྡན་འཚོ་བྱེད། བྱང་སྨན་སངས་རྒྱས་རིན་ཆེན། ལྷའི་སྨན་པ་བསོད་ནམས་རྡོ་རྗེ། བྱམས་པ་དཀོན་ཅོག་རིན་ཆེན་ནམ་མིའི་ཉི་མ་མཐོང་བ་དོན་ལྡན། བཀྲ་ཤིས་དཔལ་བཟང་།

  བཀའ་མའི་བརྒྱུད་པ་ནི། ཨོ་རྒྱན་ཆེན་པོས་འཚོ་བྱེད་གཞོན་ནུ་དང་ཀླུ་སྒྲུབ་གཉི་ག་ལ་གསན། དེས་ལྷ་སྲས་མུ་ནེ་བཙན་པོ་ལ་རང་འགྱུར་དུ་གསུངས། དེ་ནས་རིམ་པ་ལྟར་ཁྲི་སྲོང་ལྡེ་བཙན། རལ་བ་ཅན་གཙང་མ། རྒྱལ་པོ་རྡོ་རྗེ། ལྷ་རྗེ་ལྷུན་གྲུབ། རལ་བ་ཅན། ལྷ་ལུང་རྣམ་གཉིས། འོད་སྲུངས། དཔལ་འཁོར་འཁརབཙན། སྐྱིད་དེ་ཉི་མ་མགོན། བཀྲ་ཤིས་བརྩེགས་པའི་དཔལ། བཀྲ་ཤིས་དཔལ་ལྡེ། ལྡེ་གཙུག་ལྡེ། ཡེ་ཤེས་འོད། བྱང་ཆུབ་འོད། རྩེ་ལྡེ། ཟླ་འོད། ཉི་འོད། གྲགས་ལྡན། བསོད་ནམས་རྡོ་རྗེ། ཆོས་རྒྱལ་རྣམ་རྒྱལ་གྲགས་བཟང་། མིའི་ཉི་མའམ་མཐོང་བ་དོན་ལྡན། བཀྲ་ཤིས་དཔལ་བཟང་པོ། འདི་ནས་བཀའ་གཏེར་གྱི་བརྒྱུད་པའི་ཆུ་བོ་གཉིས་འདྲེས་སུ་སོང་བར་བཞེད། དེ་ནས་གཉའ་རིགས་བསྟན་པ་དར་རྒྱས། བསོད་ནམས་ཆོས་འཕེལ། བདུད་རྩི་འགྱུར་མེད། སྨྲ་བའི་དབང་པོ་རྣམ་རྒྱལ་རྡོ་རྗེའི་བར་བོརོ།། ཐང་ཡིག་ཤེལ་བྲག་མའི་ལེའུ་ཉེར་བཞི་པར། དེ་ནས་པདྨ་ཅན་གྱི་ཡུལ་དུ་ཕྱིན༔ སྨན་པ་འཚོ་བྱེད་གཞོན་ནུ་དང་འཕྲད༔ ཁྱོད་ཀྱིས་ཅི་ཤེས་བྱས་དྲིསཔས་སྨན་ཤེས་ཟེར༔ དེ་ལ་སྨན་ཞིག་སློབས་དང་བྱས་པ་ཡིས༔ ད་ནི་རྒས་པས་ལུས་འདིར་མཁས་རྒྱུ་མེད༔ སློབ་དཔོན་མི་ཡོང་ཡོང་ན་བསླབས་ཀྱི་ཟེར༔ ཞེས་སྣང་ཡང་འཚོ་བྱེད་གཞོན་ནུ་རང་ལ་གསན་པ་དྲུག་སྒྲ་སོགས་ཡི་གེ་ཉམས་ཏེ་གཞོན་ནུའི་བུར་སོང་ངོ་སྙམ།

X