//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

དཔལ་མགོན་ཀླུ་སྒྲུབ་ཀྱིས་སྨན་སྤེལ་ཚུལ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 9:46:14 ཀློག་གྲངས། 40 

ལང་ཀར་གཤེགས་པ་ནས། བློ་གྲོས་ཆེན་པོ་ཁྱོད་ཤེས་ཀྱི།། ལྷོ་ཕྱོགས་བཻ་དྷའི་ཡུལ་དུ་ནི།། དགེ་སློང་དཔལ་ལྡན་ཆེར་གྲགས་པ།། དེ་མིང་ཀླུ་ཞེས་འབོད་པ་དེ།། ཡོད་དང་མེད་པའི་ཕྱོགས་འཇིག་པ།། ང་ཡི་ཐེག་པ་འཇིག་རྟེན་དུ།། བླ་མེད་ཐེག་ཆེན་རབ་བཤད་ནས།། རབ་ཏུ་དགའ་བའི་ས་སྒྲུབས་ཏེ།། བདེ་བ་ཅན་དུ་དེ་འགྲོའོ།། ཞེས་དང་། འཇམ་དཔལ་རྩ་རྒྱུད་ལེའུ་རབ་འབྱམས་སོ་དྲུག་པ་ལས། དེ་བཞིན་གཤེགས་པ་ང་འདས་ནས།། ལོ་ནི་བཞི་བརྒྱ་ལོན་པ་ན།། དགེ་སློང་ཀླུ་ཞེས་དེ་འབོད་འབྱུང་།། བསྟན་པ་ལ་ནི་དད་ཅིང་ཕན།། རབ་ཏུ་དགའ་བའི་ས་ཐོབ་པ།། ལོ་ནི་དྲུག་བརྒྱ་དག་ཏུ་འཚོ།། རིག་པ་རྨ་བྱ་ཆེན་མོ་ནི།། བདག་ཉིད་ཆེན་པོ་དེས་གང་འགྲུབ།། བསྟན་བཅོས་སྣ་ཚོགས་དོན་དང་ནི།། དངོས་པོ་མེད་པའི་དོན་དེ་རིག། གང་ཚེ་ལུས་དེ་བོར་པ་ན།། བདེ་བ་ཅན་དུ་སྐྱེ་བར་འགྱུར།། དེ་ནི་མཐར་གྱི་སངས་རྒྱས་ཉིད།། ངེས་པ་ཁོ་ན་ཡང་དག་ཐོབ།། ཅེས་དང་། གཞན་ཡང་སྤྲིན་ཆེན། དུས་འཁོར་གྱི་རྒྱུད་ཕྱི་མ་སོགས་དུ་མ་ནས་ལུང་གིས་ཟིན་ཅིང་། རྒྱལ་བའི་བསྟན་པ་རིན་པོ་ཆེ་ལ་སྟོན་པ་གཉིས་པར་གྲགས་པ་ཤིང་རྟ་ཆེན་པོ་དཔལ་མགོན་ཀླུ་སྒྲུབ་ནི་ལྷོ་ཕྱོགས་བཻ་དརྦྷའི་ཡུལ་དུ་བྲམ་ཟེ་ཕུན་སུམ་ཚོགས་པ་ཞིག་ལ་བུ་མེད་པ་ན་རྨི་ལམ་དུ་བྲམ་ཟེ་བརྒྱ་ལ་ཆོས་སྟོན་དྲངས་ན་བུ་འབྱུང་བར་ལྷས་ལུང་བསྟན་པ་ལྟར་བྱས་པས་ཁྱེའུ་བྱད་གཟུགས་མཚར་བ་ཞིག་བཙས་ཏེ་མཚན་མཁན་ལ་བསྟན་པས་མཚན་བཟང་མོད་ཀྱི་འོན་ཀྱང་ཞག་བདུན་གྱི་ཚེ་ལས་མེད་པར་བསྟན། ཐབས་དྲིས་པ་ན། བྲམ་ཟེ་བརྒྱ་ལ་ཆོས་སྟོན་དྲངས་པས་ཟླ་བདུན། དགེ་སློང་བརྒྱ་ལ་ཆོས་སྟོན་དྲངས་པས་ལོ་བདུན་ཐུབ་ཟེར་བ་ལྟར་བྱས་ལོ་རྫོགས་པར་ཉེ་བས་བུའི་རོ་ཕ་མས་མཐོང་མ་བཟོད་དེ་གཡོག་དང་བཅས་འཁྱམ་དུ་བཏང་བ། ནཱ་ལེནྡའི་སྒོ་དྲུང་ལ་བྱིས་པས་སྙན་ངག་གི་རིག་བྱེད་བསྒྲགས་པ་བྲམ་ཟེ་ས་ར་ཧས་གསན་དེ་ནང་དུ་ཁྲིད་ཚུལ་དེ་བཞིན་དུ་བཤད་ནས། རབ་ཏུ་བྱུང་ན་ཐབས་ཡོད་གསུངས་པ་བཞིན་རབ་ཏུ་བྱུང་། ཚེ་དཔག་མེད་ཀྱི་དཀྱིལ་འཁོར་དུ་བཅུག་ནས་དབང་བསྐུར་གཟུངས་འདོན་བཅུག་པས་འཆི་བདག་ལས་ཐར་བའི་མཚན་རྟགས་ཐོབ། གསང་སྔགས་སྔ་འགྱུར་དུ་གསུང་གི་རིགས་འཛིན་སོགས་གསང་སྔགས་གསར་རྙིང་གི་རྒྱུད་སྡེ་རབ་འབྱམས་རྒྱ་མཚོ་དང་སྡེ་སྣོད་གསུམ་སོགས་ཤེས་བྱ་རིག་པའི་གནས་མཐའ་དག་ལ་མཁས་པར་སྦྱངས་སླར་ཕ་མ་དང་མཇལ་ཏེ་ཐོག་མར་ཕ་མ་ཡིད་མ་ཆེས་ཀྱང་རྗེས་སུ་ལོ་རྒྱུས་བཤད་པས་ཡིད་ཆེས་པར་གྱུར། ནཱ་ལེནྡའི་མཁན་པོ་སྒྲ་གཅན་འཛིན་བཟང་པོ་ལ་བསྙེན་པར་རྫོགས། མཚན་དགེ་སློང་དཔལ་ལྡན་དུ་གྲགས། དེ་ནས་རྨ་བྱ་ཆེན་མོ་དང་། ཀུ་རུ་ཀུ་ལླེ་དང་། གནོད་སྦྱིན་མོ་དགུ་དང་། ནག་པོ་ཆེན་པོ་རྣམས་བསྒྲུབས་པས། རི་ལུ། མིག་སྨན། རལ་གྲི། རྐང་མགྱོགས། བཅུད་ལེན། གཏེར་ལ་སོགས་པ་དངོས་གྲུབ་མང་པོ་དང་། ཚར་གཅོད་པ་དང་། སླར་གསོ་བ་ལ་སོགས་པའི་ནུས་པ་ཐམས་ཅད་གྲུབ། ཀླུ་དང་གནོད་སྦྱིན་ལ་སོགས་པ་མི་མ་ཡིན་ཐམས་ཅད་བྲན་དུ་འཁོལ། ཁྱད་པར་བཅུད་ལེན་གྲུབ་པས་རྡོ་རྗེའི་སྐུར་གྱུར། རྫུ་འཕྲུལ་དང་མངོན་ཤེས་ལ་མངའ་བརྙེས། མགོན་པོའི་རིག་སྔགས་འགྲུབ་ནས་དྷ་ནྱ་ཀ་ཊ་ཀའི་གླིང་ན་ནག་པོ་ཆེན་པོའི་རྒྱུད་བཞུགས་པ་སྤྱན་འདྲེན་པར་དགོངས། གླིང་དེར་མི་གཡོ་བ་ལ་བརྟེན་ཏེ་སྒྱུ་མ་སྒྲུབས། སྒྱུ་མས་མཁའ་འགྲོ་མ་རྣམས་མགོ་འཁོར་བའི་བར་ལ་ལྷ་མོ་ནག་མོ་དང་ནག་པོ་ཆེན་པོའི་རྒྱུད་བརྒྱད་དང་། ཀུ་རུ་ཀུ་ལླེའི་རྟོགས་པ་ལ་སོགས་པ་སྤྱན་དྲངས། ཡེ་ཤེས་ཀྱི་མཁའ་འགྲོ་མ་རྣམས་ཀྱི་གདམས་པ་ཐོབ། སྒྲུབ་ཐབས་མི་གཅིག་པ་བརྒྱ་དྲུག་ཅུ་ཡང་གདན་དྲངས། མ་ག་དྷར་ལོ་བཅུ་གཉིས་སུ་མུ་གེ་བྱུང་སྟེ་གྲོང་ཁྱེར་སྟོངས་པ་ཙམ་དུ་སོང་བ་ན་གསེར་འགྱུར་གྱི་སྦྱོར་བས་དགེ་འདུན་ཤིན་ཏུ་མང་བ་ལ་འཚོ་བ་སྦྱར་བ་སླར་ལོ་བཅུ་གཉིས་ལོན་ནས་སློབ་དཔོན་སྒྲ་གཅན་འཛིན་གྱིས་གསན་པས། མ་ལེགས་ཟས་ཀྱི་ཆར་འབེབས་པའི་ནུས་པ་ང་ལ་ཡོད་བཞིན་དུ་དགེ་འདུན་ལོག་འཚོ་ལ་སྦྱོར་བ་ཁྱོད་སྙིང་རྗེ་ཆུང་། བྱང་ཆུབ་སེམས་དཔའི་སྤྱོད་པ་དང་འགལ། ད་ནི་དེའི་སྡིག་སྦྱོང་ལ་གཙུག་ལག་ཁང་བརྒྱ་རྩ་བརྒྱད། ལྷ་ཁང་སྟོང་། མཆོད་རྟེན་ཁྲི་ཕྲག་བཞེངས་དགོས་གསུང་ལ། དགེ་སློང་མི་གཅིག་གིས་དེ་ལྟར་མི་འགྲུབ་པར་གཟིགས་ནས། གནོད་སྦྱིན་ཛམྦྷ་ལར་ནོར་གང་དགོས་བསླངས། ལས་གྲོགས་ཀླུ་རྣམས་ལ་འཆོལ་དགོངས་ཏེ། ཀུ་རུ་ཀུལླེའི་རིག་སྔགས་ཀྱིས་ཀླུ་རྒྱལ་འཇོག་པོའི་བུ་མོ་འཁོར་དང་བཅས་པ་བཀུག་པས། ཆོས་གསུང་བའི་ཚོགས་སུ་མིའི་བུ་མོའི་རྣམ་པ་གཉིས་འཁོར་མང་པོ་དང་བཅས་བྱུང་བས། དཔག་ཚད་ཙམ་ཙན་དན་ས་མཆོག་གི་དྲིས་ཁྱབ། བུ་མོ་གཉིས་ལ་སྒྲོལ་མའི་སྐུ་བཞེང་བར་ཙན་དན་སྟེར་བ་དང་། གཙུག་ལག་ཁང་བཞེང་བཞེངསཔའི་གྲོགས་བྱེད་དགོས་བསྩལ་པས། ཕ་ལ་དྲིས་ནས་ལན་འབུལ་ཟེར། དེའི་ནང་ནངསཔར་བུ་མོ་གཉིས་སྔར་བཞིན་བྱུང་། ཀླུའི་རྒྱལ་པོའི་མཆིད་ནས། སློབ་དཔོན་ཉིད་ཀླུ་ཡུལ་དུ་ཕེབས་ན་བཀའ་བཞིན་བྱེད། གཞན་སྒྲུབ་པར་མི་ནུས་ཟེར་བའི་ལོན་ཕུལ། ཤེར་ཕྱིན་འབུམ་སྤྱན་འདྲེན་པ་སོགས་དགོས་པ་ཁྱད་པར་ཅན་གཟིགས་ཏེ་ཀླུའི་ཡུལ་དུ་ཕེབས། འོད་སྲུང་དང་གསེར་ཐུབ་ལ་སོགས་པའི་དུས་ཀྱི་དགེ་སློང་ལུས་གཞན་ལས་ཆེ་བ་མང་པོ་དང་། བདག་ཅག་གི་སྟོན་པའི་དགྲ་བཅོམ་པ་དུ་མ་ཀླུའི་མཆོད་གནས་སུ་འདུག་པ་རྣམས་ན་རེ། ངེད་རྣམས་ནི་དགྲ་བཅོམ་པ་ཡིན་ལ། ཁྱོད་དུག་གསུམ་དང་བཅས་པའི་མི་ཞིག་འདིར་འོང་བ་ལ་དུག་གིས་མི་གནོད་པ་ཅི་ཡིན་འདྲི་བར། ངས་རྨ་བྱ་ཆེན་མོའི་རིག་སྔགས་འགྲུབ་པ་ཡིན་གསུངས། ཀླུ་རྣམས་དམ་པའི་ཆོས་ཀྱིས་ཚིམ་པར་མཛད། ཤེར་ཕྱིན་སྟོང་ཕྲག་བརྒྱ་བ་དང་གཟུངས་དང་རྟོག་པའི་རིགས་དུ་མ་སྤྱན་དྲངས།སའི་སྟེང་དུ་ཕེབས། དགེ་སློང་བདེ་བྱེད་ལ་སོགས་པ་ཐེག་ཆེན་ལ་སྡང་བ་རྣམས་རྩོད་པས་སུན་དབྱུངས། ཉན་ཐོས་སེན་དྷ་པ་རྣམས་ཀྱིས་བརྩམས་པའི་རྟོག་གེ་ཐེག་ཆེན་ལ་རྩོད་པའི་གཞུང་མང་པོ་དར་པ་ཐམས་ཅད་ས་འོག་ཏུ་སྦས། ལྷོ་ཕྱོགས་ཛ་ཊ་སཾ་གྷ་རའམ་རལ་བ་འཇོམས་པར་གྲགས་པའི་གནས་སུ་མུ་སྟེགས་ཀྱི་རྒོལ་བ་འདུས་པ་ལྔ་བརྒྱ་ཙམ་ཚར་བཅད་དེ་ནང་པའི་བསྟན་པར་བཅུག དྲིལ་བུའི་བྲག་དང་བྱང་ཕྱོགས་ངྷིང་ཀོ་ཊ་སོགས་རི་མང་དུ་གསེར་དུ་བསྒྱུར་པར་བཞེད་པ་ལ། རྗེ་བཙུན་སྒྲོལ་མས་མ་འོངས་པ་ན་རྩོད་པའི་གཞིར་འགྱུར་བས་མ་བྱེད་གསུངས་ཏེ་བཟློག བྱང་སྒྲ་མི་སྙན་དུ་ཕེབས་པའི་ལམ་ཁར་བྱིས་པ་མང་པོ་རྩེ་བ་ལས་གཅིག་རྒྱལ་པོར་ལུང་བསྟན། མི་དང་མི་མ་ཡིན་གྱི་དོན་དུ་ལོ་བཅུ་གཉིས་ཙམ་ལོན་པ་ན་ཚུར་ཕེབས། སྔར་གྱི་བྱིས་པ་རྒྱལ་པོར་གྱུར་པ་བདེ་སྤྱོད་ཀྱིས་བསྙེན་བཀུར། གཞི་མེད་ཀྱི་སྐུར་བ་ཅུང་ཟད་བྱུང་བ་འཕགས་པ་ལྷའི་ཐབས་མཁས་ཀྱི་འཕྲུལ་ལ་བརྟེན་ནས་སངས། སྒྲོལ་མ་མངོན་སུམ་དུ་ཞལ་གཟིགས་ལུང་བསྟན། ཀླུའི་སྐད་དོད་ནཱ་ག་ནི་ཆོས་དབྱིངས་སུ་སྐྱེས་པ་ལ་རྟག་ཆད་གཉིས་ཀྱི་མཐའ་མི་གནས་པ་དང་གསུང་རབ་རིན་པོ་ཆེའི་བང་མཛོད་ལ་མངའ་བརྙེས་པ་སྲེག་ཅིང་བསལ་པའི་ལྟ་བ་དང་ལྡན་པས་ཀླུའོ།། ཨར་ཛུ་ན་ནི་སྲིད་སྒྲུབ་སྟེ་ཆོས་ཀྱིས་རྒྱལ་སྲིད་སྐྱོང་བ་དང་ཉེས་པའི་དགྲ་ཕྱོགས་འདུལ་པར་སྲིད་སྒྲུབ་སྟེ་དེ་གཉིས་མཚམས་སྦྱར་བས་ནཱ་གཱ་རྫུ་ན་སྟེ་ཀླུ་སྒྲུབ་ཅེས་གྲགས། མཐའ་བྲལ་དབུ་མ་རིག་ཚོགས་དྲུག རྒྱུད་ཀུན་ལས་བཏུས་ལ་སོགས་པས་མཚོན་མདོ་སྔགས་རིག་གནས་ཀུན་ལ་བཀའ་དྲིན་ཆེ་ཞིང་། ཁྱད་པར་གསོ་རིག་ཏུ། རིང་དུ་གྲགས་པའི་གསོ་དཔྱད་ནས།། མཐའ་ཡས་རྒྱུད་ཀྱིས་བཅོས་པ་བླངས།། སྨན་པ་མཁས་པས་རབ་མཆོད་པའི།། སྦྱོར་བ་བརྒྱ་ཡིས་བཅིངས་པར་བྱ།། ཞེས་བསྟན་བཅོས་སྦྱོར་བ་བརྒྱ་བ། སྨན་པའི་མཆོག་སྟེ་ཉོན་མོངས་ནད་སེལ་དེ་ལ་ཕྱག་བཙལ་ནས།། འཕགས་པའི་བརྟུལ་ཞུགས་དྲང་སྲོང་མ་གཏོགས་སྐྱེས་བུ་བློ་ལྡན་པས།། རླུང་མཁྲིས་བད་ཀན་གསུམ་དང་འཕྲོད་སྤྱད་བག་བྱ་སྤྱོད་ལམ་གྱིས།། མི་ལུས་འདི་ཐོབ་དོན་ཡོད་འཚོ་བའི་མདོ་ཙམ་བསྟན་པར་བྱ།། ཞེས་སོགས་འཚོ་བའི་མདོ་ཚིགས་སུ་བཅད་པ། རྩ་ཨ་བའི་ཆོ་ག སྔོ་སྦྱོར་བདུད་རྩི་གསང་བ། སྨན་རིན་པོ་ཆེའི་རིམ་པ། དངུལ་ཆུའི་སྦྱོར་བ་རིན་ཆེན་འཕྲེང་བ་རྣམས་དང་། གཞན་ཡང་ལྷོག་པ་སྤུན་བཞི་གཉན་བཅས་ཀྱི་བཅོས་སོགས་འདིས་མཛད་ཟེར་བ་ཤིན་ཏུ་མང་། མཆོད་རྟེན་དང་ལྷ་ཁང་མང་པོ་བཏབ། རྡོ་རྗེ་གདན་ལ་དྲ་མིག་གི་ར་རྭབས་བསྐོར། ལྷོ་ཕྱོགས་དཔལ་ལྡན་འབྲས་སྤུངས་ཀྱི་བཀོད་པ་བཞེངས། སྤྱི་ལུགས་ལ་ལོ་དྲུག་བརྒྱ་དང་སྔ་འགྱུར་ལྟར་ན་ལོ་སྟོང་གི་རིང་འགྲོ་དོན་མཛད། རྒྱལ་པོ་བདེ་སྤྱོད་ཀྱི་བུ་གཞོན་ནུ་ནུས་ལྡན་ཞེས་པ་རྒྱལ་སྲིད་ལ་རིངས་པའི་གཏམ་མ་ལ་སྨྲས་པ་དང་། དེ་ན་རེ་ཁྱོད་ཀྱི་ཡབ་དང་སློབ་དཔོན་ཀླུ་སྒྲུབ་སྐུ་ཚེའི་བཅུད་ལེན་སྟབས་གཅིག་ཏུ་འགྲུབ་པས་འགྲོངས་རྒྱུ་མེད། རྒྱལ་སྲས་སྔ་མ་རྣམས་ཀྱང་རྒྱལ་སྲིད་མ་ཐོབ་པར་འདས་པ་མང་ཟེར་བས། ཤིན་ཏུ་ཡི་མུག་པའི་ཚེ། མ་ན་རེ། ཁྱོད་དེ་ལྟར་མི་དགའ་ཆེས་ན་སློབ་དཔོན་ལ་དབུ་སློངས། བྱང་ཆུབ་སེམས་དཔའ་ཡིན་པས་སྟེར། ཀླུ་སྒྲུབ་གཤེགས་པ་དང་ཡབ་ཀྱང་འགྲོངས་ཏེ་རྒྱལ་སྲིད་ཐོབ་ངེས་ཞེས་བསླབས་པ་ལྟར་གཞོན་ནུ་ནུས་ལྡན་གྱིས་དབུ་བསླངས་པ་རལ་གྲིས་བཅད་པ་མ་ཆོད་པར་ངས་སྔོན་རྩྭ་སྔོན་པོས་སྲོག་ཆགས་ཀྱི་སྐེ་བཅད་པའི་རྣམ་སྨིན་ཡོད་པས་ཀུ་ཤས་ཆོད་གསུང་བ་ལྟར་བྲེགས་པའི་ཚེ། མགུལ་ནས་བྱང་ཆུབ་ཀྱི་སེམས་འཛགས་ཏེ། ང་ནི་བདེ་བ་ཅན་གྱི་འཇིག་རྟེན་དུ། ཕྱིན་ནས་ལུས་འདི་ལ་ཡང་འཇུག་པར་འགྱུར། ཞེས་གསུངས་ཏེ་སྐུ་ཚེ་འཕོས། སློབ་དཔོན་བཅུད་ལེན་འགྲུབ་པས་འགྲིག་གི་དོགས་ནས་དབུ་དཔག་ཚད་དུ་མའི་སར་འཁྱེར་བ་གནོད་སྦྱིན་མོས་འཕྲོག་ནས་བཤད་ཁུངས་དུ་མ་ཡོད་ཀྱང་ཕ་བོང་གཅིག་གི་ཁར་བཞག་པས་ཕ་བོང་གས་པའི་ས་དེར་འཕགས་པ་སྤྱན་རས་གཟིགས་ལྷ་ལྔའི་རྡོ་སྐུ་རང་བྱོན་བྱུང་། དབུ་དང་སྐུ་ལུས་གཉི་ག་ལ་ཡོན་བདག་གནོད་སྦྱིན་མོ་དེས་སོ་སོར་ལྷ་ཁང་བརྩིགས། དེ་གཉིས་ཀྱི་བར་དུ་སྔོན་དཔག་ཚད་བཞི་ཙམ་ཡོད་པ། ད་ལྟ་རྒྱང་གྲགས་གཅིག་ཀྱང་ཅུང་མི་ལོངས་པའི་ཁད་ཉེ་ཞིང་། ལྷ་ཁང་དེའི་རྡོ་བརྩིགས་རྣམས་འབྲེལ་པས་བྲག་ལྟ་བུར་སོང་བའི་ཆོ་འཕྲུལ་དང་གཉན་ཆ་ཆེ་བ། སྒོ་མེད་པའི་སྐར་ཁུང་ནས་བལྟས་ན། དབུ་དང་སྐུ་རྡོ་སྐུའི་དུམ་བུ་འདྲ་བ་རེ་ཡོད་པར་གྲགས་ལ། རིམ་གྱིས་སྐུ་ལུས་དང་ཇེ་ཉེར་སོང་སྟེ་མ་འོངས་པ་ན་འགྲོ་བའི་དོན་མཛད་པར་འདོད་དོ།།

X