//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་བཅུ་དགུ་པ། སྦྱོངས་ཀྱི་ལོག་གནོན་རྩ་སྦྱོངས།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:24:24 ཀློག་གྲངས། 10 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགསྦྱོངས་ཀྱི་ལོག་གནོན་རྩ་སྦྱོངས་བསྟན་པ་ལ།། སྔོན་འགྲོ་དངོས་གཞི་རྗེས་དང་ཕན་ཡོན་ནོ།། སྔོན་འགྲོ་ཉེ་དང་རིང་བ་རྣམ་པ་གཉིས།། རིང་བ་ནད་གང་ཡིན་པའི་གཉེན་པོ་དང་།། འབྲས་གསུམ་ཆ་མཉམ་བསྡུས་ཐང་དགོངས་དུས་བཏང་།། བྱིས་པ་དགེ་སློང་མཁལ་ནད་ཡོད་པ་ལ།། ད་བྱིད་བརྒྱད་སྦྱོར་ཕྱེ་མས་རྩ་ལམ་སྦྱང་།། ཉེ་བ་གཟའ་སྐར་ཚེས་གྲངས་བཟང་བ་ལ།། མཁན་པ་སྦང་མ་ཆུ་འཇམ་བསྲོས་པ་ཡིས།། ལུས་ཀུན་དག་པར་བཀྲུས་རྗེས་རྩི་མར་དང་།། འབྲུ་མར་སྤང་སྤོས་སྦྱར་བས་ལུས་ཀུན་བྱུག། ཁྱད་པར་སྤྱི་གཙུག་མཚན་ལྤགས་ཚིགས་རྣམས་མཉེ།། གཡེར་མ་ཉི་དགའི་ཐང་གིས་རྩ་ཁ་དབྱེ།། ཕོ་མོ་སྤྲད་དང་ར་ཡི་ཝ་གདོང་དང་།། ཉི་དགའི་འདབ་ཚོད་ཚྭ་གཡེར་བཏབ་པ་བཏང་།། དངོས་གཞི་སྣ་སེལ་མདུང་སྨན་བྱང་པ་དང་།། སྦྱར་ཚད་སྣ་ཁྲིད་བཏང་ཐབས་ཐེབས་པའི་རྟགས།། ལྕག་དང་ལོག་གནོན་རྣམ་པ་དགུ་ཡིས་བསྟན།། སྣ་སེལ་སུག་སྨེལ་སྡིག་སྲིན་རྩ་ཁུ་བྱུག། ཉི་དགའ་ཚ་གྲང་རྟས་བསྒྱུར་མྱུར་དུ་འབིགས།། མདུང་སྨན་རྒྱ་ཚ་ལི་ཤི་སྡིག་སྲིན་མཚལ།། ལྕམ་པ་གོང་གི་རྟ་སྦྱར་ནད་སློང་འཁྲུག། བྱང་པའི་ཆོ་ག་དང་པོ་བཟང་ངན་བརྟག། དུག་དབྱུང་འཇམ་བཙལ་ཟུག་ཆུང་ནད་འདྲོངས་ཆེ།། བཟང་བ་དམར་ཁྲ་སྐྱི་ཚེར་སྲད་གསེབ་གནས།། ཐན་ཆེ་སྟོན་སེར་གྲིར་ཤི་བཟང་བ་ཡིན།། ངན་པ་སེར་ཁྲ་ཡོག་མོ་ལོ་གསེབ་གནས།། ཆར་ཆེ་ནམ་གཞུག་ཆད་དུས་ཤི་བ་ངན།། དུག་ནི་བར་གཤོག་དཀར་པོ་ཟུག་ཆེ་དབྱུང་།། འཇམ་བཙལ་བ་ནི་སྦུར་མགྱོགས་གྲོགས་དང་སྡེབ།། དེ་མ་འཛོམ་ན་ཆ་གའི་མགོ་བོ་བཏང་།། ཡང་ན་ཡོས་སམ་དྲི་ཆུར་བཏུལ་བ་ཤིས།། བྱང་པ་མགོ་རྐང་ཆད་ན་ནད་འདྲོངས་ཆུང་།། བཟང་ཞིང་མགོ་རྐང་ཚང་ན་བཅུ་གཅིག་དང་།། ངན་རྙིང་མགོ་རྐང་མེད་ན་བཅུ་བདུན་བཏང་།། སྦྱར་ཚད་བྱང་པ་རྒྱ་ཚ་སྡིག་སྲིན་མཚལ།། གུར་གུམ་ཧ་ཤིག་དར་ཚུར་རྩི་བཞིན་བཏགས།། ཆང་གི་གིསརིལ་བུ་སྲན་འཕོས་ཙམ་དུ་དྲིལ།། ཡང་ན་རྒྱ་རུ་བྱ་མ་བྱི་རུས་དང་།། བྱི་བཟུང་འོལ་མོ་སེ་དང་རྣོན་པོ་གསུམ།། སུག་སྨེལ་མཚལ་གྱི་རིལ་བུས་རྩ་ནད་སྦྱོང་།། སྣ་ཁྲིད་གློ་སྙིང་མཆིན་མཆེར་མཁལ་མ་དང་།། དུག་དང་ཆུ་སེར་ནད་ལ་སོགས་པ་ཡིས།། གང་ཤིས་སྨན་དང་བསྡེབས་པས་ནད་ཐོག་འཁྲིད།། ཡང་ན་མདུང་བའི་སྨན་དང་སྦྱར་ལ་བཏང་།། བཏང་ཐབས་དགོངས་མོ་ཉི་དགའི་འདབ་ཚོད་བཏང་།། སྲོད་འཁོར་སྣ་སེལ་ནམ་དགུང་མདུང་སྨན་བཏང་།། ཐོ་རངས་དུས་ན་རྩ་སྦྱོངས་རིལ་བུ་དགུ།། ཚ་གྲང་སྦྱར་བའི་རྟ་ཡིས་འཕུལ་ལ་བཏང་།། ཉི་ཤར་དུས་སུ་ཕལ་ཆེར་ཐེབས་པ་ཡིན།། དེ་དུས་མ་ཐེབས་རིལ་བུ་བདུན་བསྣན་བཏང་།། ནམ་ཐེབས་དུས་ན་རིལ་བུ་ལྔ་ལྔ་ཡིས།། སྔ་མ་ཞུ་ཞིང་ཕྱི་མ་བསྟེན་པར་བྱ།། དེ་ལྟར་རིལ་བུ་ཐུབས་སུ་བཅད་བཏང་བས།། བྱང་པའི་དུག་ནད་དུས་གཅིག་མི་འབྱུང་སྟེ།། ནད་པ་ཟུག་ཆུང་འགགས་པའི་དོགས་པ་མེད།། ཡང་ཡང་མནན་པས་མི་ཐེབས་མི་སྲིད་ཅིང་།། འདྲོངས་ཆེར་འབྱུང་བའི་བསམ་འདྲོངས་བར་དུ་བཏང་།། དེ་ལྟར་མི་ཤེས་རིལ་བུ་དུས་གཅིག་བཏང་།། བྱང་པའི་དུག་ལངས་ཆུ་སེར་དུས་གཅིག་འཕུལ།། ཆུ་འགགས་ཟུག་ཆེ་རང་སྡུག་འཆི་ཡང་སྲིད།། ཐེབས་རྟགས་ལུས་སྦྲིད་ནད་གང་ཡོད་སར་ན།། རྒྱུ་ཞབས་ཚ་རུམ་མཚན་མ་ཚ་ཞིང་འགྲེང་།། ཆུ་ངན་ཐིགས་པ་ཐོན་དཀའ་ཡང་ཡང་འབྱུང་།། ལྕག་ཏུ་དེ་དུས་སིངས་པོ་གསར་གླེག་གིས།། ཡང་ཡང་བསྐུལ་བས་རྩ་ལམ་ཆུ་ལམ་འདག། ཚ་བ་ཤས་ཆེ་ཇའམ་ཆུར་ཁུ་བཏང་།། ནད་ཞེན་ཆེ་ན་སྐབས་སུ་མདུང་སྨན་སྤེལ།། གང་ནར་རྡེའུ་ཆང་བྲན་བསྲོས་པས་བདུག། སང་སེང་རྐང་པ་མི་རྐྱང་དྲོད་ལ་བསྒོར།། དེ་ལྟར་ལུས་མ་གྲངས་པར་དུགས་བསྟེན་བྱ།། རྩ་ཁྲུས་མི་ཆད་ནད་འདག་ཐེ་ཚོམ་མེད།། ལུས་གྲངས་ཆུ་སེར་འགྱིངས་ན་ནད་མི་ཐོན།། ཟུག་ཆེ་ལྕག་མ་བྲབས་ན་ནད་མི་འབྱོངས།། དེ་ཕྱིར་ལྕག་དང་དྲོ་བ་ཤིན་ཏུ་གཅེས།། སྣོད་གཅིག་མཚན་མའི་འོག་ཏུ་རྒྱུན་དུ་བཟེད།། སྐབས་སུ་སྔས་ཁར་ཕྲུ་བའི་ནང་དུ་བསག། སེར་པོ་སྨུག་པོ་རྣག་ཁྲག་སྤུ་སོགས་འབྱུང་།། ནད་འདྲོངས་སྨན་འཕྲོ་བཅད་ལ་ལྕག་འགའ་བརྡེག། ལོག་གནོན་དྲུག་སྟེ་རྒལ་བ་མནན་པ་དང་།། སྟོར་བ་བཙལ་དང་འགྱིངས་པ་དྲང་བ་དང་།། གཟེར་བ་བཅག་དང་འགགས་བསལ་འབྱམས་པ་གཅོད།། མ་ཐེབས་སྐྱུག་ན་མནན་ཐབས་བཤལ་དང་འདྲ།། སྟོར་ནས་ཅི་ཡང་མེད་ན་དེ་རྒྱུ་གདོན།། སོ་རྙིངས་གདུལ་དྲགས་ཐུན་ཆུངས་སྨན་རྟ་ལོག། གང་ཡིན་དེ་ཡི་གཉེན་པོས་སྟོར་བ་བཙལ།། འགྱིངས་ནས་ཕོ་བ་རྫིངས་ན་བསྐུ་མཉེ་དུགས།། ཆུ་སྐོལ་ལོ་བརྒྱད་དྲི་ཆུ་ཐེངས་འགའ་བཏུང་།། རྒྱུ་ཞབས་མཚན་མ་ཟུག་ཆེ་དུགས་ཀྱིས་བསྲོ།། དེས་མ་ཆོགས་ན་ཆུ་སེར་འགྱིངས་པ་ཡིན།། རྒྱ་ཚ་སྡིག་སྲིན་དྲོད་སྨན་ཆང་སྦྱར་བཏང་།། ཡང་ན་དྭ་ཚ་མར་གསར་རིལ་བུ་མིད།། དེས་མ་ཆོགས་ན་བྱང་པ་རྩུབ་པ་ཡིན།། ཆ་གའི་མགོ་བོ་གསུམ་དང་སྦུར་འགྱོགས་མགྱོགསདང་།། བོང་ང་དཀར་པོ་ཆང་དང་སྦྱར་ལ་བཏང་།། མ་ཆོགས་རླུང་ཡིན་རུས་རྙིང་ཚ་བ་བཏུང་།། དེ་དག་རྣམས་ཀྱིས་མི་ཆོགས་ག་ལ་སྲིད།། འགགས་ན་ས་བོན་འཁར་དང་སྤུ་འཐུམས་འཆེས།། ཁྲག་ཤ་རྡེལ་འགགས་མཚན་མ་མཉེ་ཞིང་བཞོ།། མ་ཕན་རྒྱ་ཚ་རུ་རྟ་ཤུ་དག་དང་།། ཕོ་བ་རིས་ཁུ་གཅེའུས་ལྒང་པར་བསྐྱལ།། འབྱམས་པ་ལུས་སྟོབས་བཟང་ན་མི་བཅད་བཞག། བཅད་དགོས་ཚོས་ཁུར་དོམ་མཁྲིས་བཏབ་ལ་བཏང་།། མ་ཆོད་དྲི་ཆུ་རང་ལོག་དོམ་མཁྲིས་བཅད།།རྗེས་གཅོད་གྲང་བ་ཤས་ཆེ་གསར་འཇམ་དང་།། ལུག་ཤའི་ཚོ་ཁུ་ཟན་དྲོན་རིམ་བསྐྱེད་བཏང་།། ཚ་བ་ཤས་ཆེ་སྐོམ་ཤའི་ཚོ་ཁུ་དང་།། བསྐོལ་གྲངས་ཆུ་དང་ཆབ་ཚ་ཟན་དྲོན་བཏང་།། མ་གྲངས་བཅད་ཅིང་ཟླ་ཕྱེད་ཟས་སྤྱོད་གཟབ།།ཕན་ཡོན་སྨན་དང་ནད་དུ་ཤེས་པར་བྱ།། དང་པོ་བྱང་པས་རྩ་ཡི་ཆུ་སེར་འདྲེན།། རྒྱ་ཚ་སྡིག་སྲིན་རྩ་ལམ་འབྱེད་པར་བྱེད།། གུར་གུམ་རྩ་མཉེན་མཚལ་གྱིས་དངས་སྙིགས་འབྱེད།། དར་ཚུར་ནད་སྡུད་ཧ་ཤིག་གཏིང་དུ་འཁྲིད།། ནད་ནི་བུ་རྩི་བཏང་དང་སྐྱེ་འཕྲོ་ཆད།། བུ་རོ་ལུས་དང་མངལ་སྐྲན་ཁྲག་ཚབས་བྱེར།། ཁྲག་མཁྲིས་དུག་སོགས་ཚ་བ་རྙིང་པ་དང་།། དྲེག་དང་གྲུམ་བུ་འབྲས་དང་ཟ་འཕྲུག་དང་།། མགོ་ཆག་རྩར་བྱེར་རྨ་རྒན་འཚོར་མི་འདོད།། སུར་ཡ་དམུ་ཆུ་རྩ་སྐྲན་ཆུ་སེར་རྒྱས།། ད་རྒན་མཛེ་ནད་རྩ་འགྲམས་ཐམས་ཅད་སྦྱོང་།། ས་བོན་རླུགས་པ་མ་ཡིན་ཀུན་ལ་བསྔགས།། ཁྱད་པར་རྩར་བབས་ནད་ཀྱི་གཉེན་པོའི་མཆོག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྦྱོངས་ཀྱི་ལོག་གནོན་རྩ་སྦྱོངས་ཀྱི་ལེའུ་སྟེ་བཅུ་དགུ་པའོ།། །།

X