//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་ལྔ་པ། རིལ་བུའི་སྡེ་ཚན་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 15:55:07 ཀློག་གྲངས། 14 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགརིལ་བུའི་སྡེ་ཚན་ཚ་སེལ་གྲང་སེལ་གཉིས།། ཚ་སེལ་དུག་སྨན་དངུལ་ཆུ་མ་གཏོགས་པའི།། སྒོས་ཀྱི་ཚ་སེལ་རིལ་བུ་མེད་ན་ཡང་།། སྨན་ནད་གང་འཕྲོད་རིལ་བུར་དྲིལ་དུ་བཏུབ།། གྲང་སེལ་རིལ་བུ་བི་ཥ་ནག་པོ་དང་།། གླ་རྩི་རུ་རྟ་ཤུ་དག་ཨ་རུ་ར།། སྙིང་ཁྲག་རུས་པ་རྒྱུས་པ་ཤ་དང་ལྔ།། ཚད་དུ་སྦྱར་ཏེ་དྲི་ཆུས་རིལ་བུ་དྲིལ།། བྱ་ཁྱུང་རྣམ་པ་ལྔ་ཡི་རིལ་བུ་འདི།། སྲོད་དུས་ལྔ་བདུན་དགུ་རྣམས་རིམ་པས་བཏང་།། ཕོ་ལོག་སྲིན་ནད་གཉན་གཟེར་གག་ལྷོག་དང་།། ཁྱད་པར་ཆུ་སེར་མཛེ་ནད་འཇོམས་པའི་མཆོག། དེ་ལ་ཛཱ་ཏི་བསྡེབས་པས་སྙིང་རླུང་སེལ།། ཁ་རུ་ཚ་བསྡེབས་ཕོ་བའི་མེ་ཉམས་གསོ།། འགྲོན་བུའི་ཐལ་བ་བསྡེབས་པས་སྐྲན་རྣམས་བཤིག། ད་ལིས་བསྡེབས་པས་སྐྱ་རྦབ་སྦོས་པ་འཇིལ།། ཤ་རུའི་ཐལ་བ་བསྡེབས་པས་དམུ་རྫིང་སྐེམ།། གུ་གུལ་གག་ལྷོག་གཉན་གཟེར་ས་གདོན་འཇོམས།། ཤིང་ཀུན་བསྡེབས་པས་གྲང་རླུང་མ་ལུས་འཇོམས།། བྱི་ཏང་ཀ་དང་བསྡེབས་པས་སྲིན་ནད་སེལ།། རྒྱ་ཚ་རྒྱམ་ཚ་ལྕེ་མྱང་ཁ་རུ་ཚ།། ཙབས་རུ་ཚ་དང་རྭ་ཚ་ཤིང་ཚ་དང་།། མཛེ་ཚ་ཐལ་ཚ་ཡ་བཀྵ་ར་དང་།། ཚ་བ་གསུམ་དང་འབྲས་བུ་གསུམ་པོ་རྣམས།། ཐུན་གསུམ་ཆ་མཉམ་བུ་རམ་རིལ་བུར་དྲིལ།། ལྷེན་སྐྲན་མངལ་སྐྲན་ཁྲག་སྐྲན་ཐལ་བར་རློག། ཚ་བ་གསུམ་དང་སུག་སྨེལ་ཨ་རུ་ར།། འུ་སུ་གཡེར་མ་ཟི་ར་ཁ་རུ་ཚ།། མཚོ་ཚ་ཤིང་ཚ་ཏིག་ཏ་གོ་སྙོད་རྣམས།། བུ་རམ་རིལ་བུས་མ་ཞུ་ལྷེན་སྐྲན་འཇོམས།། གོ་བོ་བྱ་རྒོད་སོ་བྱ་གྲུམ་པ་སོགས།། གྲེ་བ་མཐའ་དག་གཡག་རྒོད་རྐྱང་གི་ཤ། བཟང་དྲུག་ཚ་བ་གསུམ་དང་ཚྭ་སྣ་གསུམ།། གོ་སྙོད་ལ་ལ་ཕུད་དང་ཟི་ར་ནག། བུ་རམ་དྲིལ་བའི་ཟ་བྱེད་རིལ་བུ་སྟེ།། སྐྲན་ནད་ཚ་གྲང་མེད་པར་ཐལ་བར་རློག། འཇམ་འབྲས་སྲ་འབྲས་བསིལ་གསུམ་ཨ་རུ་ར།། ཛཱ་ཏི་ལ་ལ་ཕུད་དང་པི་པི་ལིང་།། བཅའ་སྒ་ཨུཏྦལ་བཙོད་དང་ཙི་ཏྲ་ཀ། ཀ་པེད་མོན་ཆ་ར་དང་ད་ཏྲིག་དང་།། སེ་འབྲུ་ཚད་ལྡན་བུ་རམ་རིལ་བུ་བྱས།། གུ་ལིང་འབྲས་ཀྱི་རིལ་བུས་བད་རླུང་རྒྱས།། སྟོད་ཚ་སྨད་གྲང་འཁྲུ་བ་གསར་རྙིང་གཅོད།། ད་ལིས་དབྱི་མོང་གནྡྷ་པ་ཏྲ་དང་།། ནཱ་ག་པུཥྞཱི་གེ་སར་པུ་ཤེལ་རྩེ།། དྭ་ཚ་ཡ་བཀྵ་ར་བཟང་པོ་གསུམ།། མར་ཆང་བུ་རམ་ཏིང་ཁྲོལ་རིལ་བུ་དྲིལ།། ད་ལིས་འཇུ་བྱེད་རིལ་བུས་སྐྱ་རྦབ་འཇོམས།། གུར་གུམ་མ་ནུ་ཀ་པེད་བྱི་ཏང་ག། པ་ཏྲ་སྦྲང་སྦྱར་རིལ་བུས་སྐྱ་རྦབ་དང་།། ཤ་སེར་མཆིན་ནད་རླན་གྲངས་སྦོས་པ་འཇོམས།། ད་ལིས་དབྱི་མོང་ཕོ་བ་རིས་དང་སྒ།། བྱི་ཚེར་པུ་ཙེ་ཤེལ་དང་དྲི་བཟང་བཞི།། བུ་རམ་རིལ་བུས་མཆིན་སྐྲན་དབུགས་མི་བདེ།། ལུད་པ་གཞང་འབྲུམ་རྟུག་སྐམས་འཇོམས་པར་བྱེད།། ཚ་བ་ལྔ་དང་བུ་རམ་རིལ་བུ་ཡིས།། རྩིབ་ལོགས་གཟེར་དང་སྙིང་འདར་ཡིད་འཆུས་སེལ།། སུག་སྨེལ་ཤིང་མངར་རྒྱམ་ཚ་ཙི་ཏྲ་ཀ། ཚ་བ་གསུམ་དང་ལྕེ་མྱང་ཁ་རུ་ཚ།། བུ་རམ་རིལ་བུས་གྲང་སེལ་སྐྲན་རྣམས་འཇོམས།། སེ་འབྲུ་པི་པི་ལིང་དང་བུ་རམ་སྦྱར།། རིལ་བུས་མ་ཞུ་སྐྱུག་པ་སེལ་བར་བྱེད།། དུར་ཐོད་ཤ་རུ་སྤེན་མའི་ཐལ་བ་གསུམ།། ཙ་བྱ་ཨ་རུའི་རིལ་བུས་དམུ་རྫིང་སྐེམ།། དབྱི་མོང་སུག་སྨེལ་སྡིག་པ་ཚ་བ་གསུམ།། རྒྱ་ཚ་སྦྲང་རྩིའི་རིལ་བུས་ཆུ་སོར་ཟུག། མེ་ཉམས་མཁལ་རྐེད་དཔྱི་མིག་གཟེར་བ་སེལ།། ཟི་ར་བཅའ་སྒ་ཤིང་ཀུན་བྱི་ཏང་ག། རྒྱ་ཚ་སྦྲང་སྦྱར་རིལ་བུ་སོ་སྟེང་བཞག། སྲིན་འཇོམས་ཡུན་བསྟེན་སོ་ཡི་བཅུད་ལེན་འགྱུར།། དེ་སོགས་རིལ་བུ་གང་སྦྱོར་ཞིབ་བཏགས་ལ།། རྟ་མེད་ཐམས་ཅད་རླན་གྱིས་འདམ་བཏགས་བྱ།། ཞིབ་ནས་སྲན་མ་ཕོས་པ་ཙམ་དུ་དྲིལ།། དུག་གིས་གཙོ་བྱས་སྲན་མ་ཆུང་ཤོས་ཙམ།། རྟ་དང་སྦྱོར་ན་མ་སླས་དྲིལ་བཏུབ་ལ།། ལུག་རིལ་ཙམ་དང་སེར་བ་རུས་ཙམ་དྲིལ།། ཆུང་བ་མིད་ལ་ཆེ་བ་མུར་བར་བྱ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རིལ་བུའི་སྡེ་ཚན་བསྟན་པའི་ལེའུ་སྟེ་ལྔ་པའོ།། །།

X