//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་གསུམ་པ། ཐང་གི་སྡེ་ཚན་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 15:51:48 ཀློག་གྲངས། 11 

      དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། ལག་ལེན་བཅོ་བརྒྱད་ནད་ཀྱི་དཔུང་འཇོམས་པའི།། རྐང་གྲངས་ལག་ཏུ་བླང་ཐབས་ཇི་ལྟར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས།། གསོ་ཐབས་ལག་ལེན་རྐང་གྲངས་འདི་ལྟ་སྟེ།། ལག་ཏུ་བླང་བའི་གཉེན་པོ་སྨན་དཔྱད་གཉིས།། སྨན་ལ་ཞི་སྦྱང་གཉིས་ཏེ་ཞི་བྱེད་ལ།། ཐང་ཕྱེ་རིལ་བུ་ལྡེ་གུ་སྨན་མར་ལྔ།། སྡེ་ཚན་ལྔ་ཞེས་སྤྱི་རུ་གྲགས་པ་ཡིན།། འོན་ཀྱང་ཐལ་སྨན་ཁཎྡྲི་སྨན་ཆང་གསུམ།། སྡེ་མཚན་བརྒྱད་ཀྱིས་ཞི་བྱེད་སྦྱོར་བ་བསྟན།། ཞི་བྱེད་ལོག་གནོན་རིན་པོ་ཆེ་དང་དགུ།། གློ་བུར་ཐུག་ཕྲད་སྔོ་སྦྱོར་སྡེ་དང་བཅུ།། དེ་ཡང་སྡེ་ཚན་ལྔ་རུ་མ་འདུས་མེད།། སྦྱོང་བྱེད་ལས་ལྔའི་སྔོན་འགྲོ་སྣུམ་འཆོས་དང་།། བཤལ་སྐྱུག་སྣ་སྨན་འཇམ་རྩི་ནི་རུ་ཧ།། སྦྱོངས་ཀྱི་ལོག་གནོན་རྩ་ནས་སྦྱོང་དང་བདུན།། དཔྱད་ལ་གཏར་བསྲེག་དུགས་ལུམས་བྱུག་པ་ལྔ།། དེ་ཡི་ལོག་གནོན་ཐུར་མའི་དཔྱད་དང་དྲུག། སྤྱི་རུ་སྡོམས་པས་རྒྱས་བཤད་ཉི་ཤུ་གསུམ།། མདོ་རུ་བསྡུས་པའི་ལག་ལེན་བཅོ་བརྒྱད་འདི།། ནད་ཀྱི་དགྲ་དཔུང་འཛོམས་པའི་མཚོན་ཆ་ཡིན།། དེ་རྣམས་ལག་ཏུ་བླང་པའི་རིམ་པ་ནི།། དང་པོ་ཞི་བྱེད་སྨན་གྱི་སྡེ་ཚན་བསྟན།། ཀྱེ་དྲང་སྲོང་ཆེན་པོ་མ་ཡེངས་གུས་པས་ཉོན།། ཐང་སྦྱོར་སྡེ་ཚན་ཚ་སེལ་གྲང་སེལ་གཉིས།། དེ་ལ་ཚ་བ་སེལ་བའི་སྡེ་ཚན་ནི།། མི་ཐོད་རྙིང་པ་འབྲུག་རུས་ཏིག་ཏ་གསུམ།། སུམ་གཉིས་བསྡུས་གྲངས་མགོ་ནད་སེལ་བར་བྱེད།། ལྕགས་ཕྱེ་སྐྱེར་བའི་བར་ཤུན་འབྲས་བུ་གསུམ།། ཁུ་བ་གྲངས་བཏང་མིག་ནད་སེལ་བར་བྱེད།། རུ་རྟ་ཨ་རུ་ར་ཡི་ཁུ་བ་ཡིས།། རྣ་བའི་རྣག་ཁྲག་ཟུག་གཟེར་འཇོམས་པར་བྱེད།། སྐྱེར་པ་མཁན་སྐྱ་བསྡུས་པའི་ཁུ་བ་ལ།། དོམ་མཁྲིས་བཏབ་བཏང་སྣ་ཁྲག་འཛག་པ་གཅོད།། ནག་མཚུར་སེང་ཕྲོམ་ཨ་རུའི་གྲང་ཐང་གིས།། མཁུར་བཀང་ཁ་ཡི་ཁྲག་ནད་ཟུག་གཟེར་འཇོམས།། བོང་ང་ཤིང་མངར་སྤང་རྒྱན་དཀར་བསྡུས་ཁུར།། ཅུ་གང་ཀར་སྦྱར་སྐད་འགགས་ཚ་སྐམས་སེལ།། སོ་ཕག་བསྡུས་ཁུར་འུ་སུ་ཀ་ར་བཏབ།། མཁུར་བཀང་ཁ་ལྕེ་གྲེ་བ་སྐམས་པ་སེལ།། ཙན་དན་ཛཱ་ཏི་སྙིང་ཞོ་ཤ་ཡི་ཐང་།། བསྡུས་གྲངས་སྙིང་གི་ཚ་བ་འཇོམས་པར་བྱེད།། སྲོ་ལོ་ཤིང་མངར་རྒྱ་སྐྱེགས་ག་དུར་ཐང་།། གློ་ཡི་ཁྲག་ཚད་གཟེར་དང་ལུད་པ་སེལ།། བྲག་ཞུན་བ་ལེ་བ་ཤ་ཀ་བསྡུས་ཁུར།། གུར་གུམ་དོམ་མཁྲིས་བཏབ་བཏང་མཆིན་ཚད་སེལ།། ལི་ཤི་གསེར་གྱི་མེ་ཏོག་ཨ་རུ་ར།། ཐང་གིས་མཆེར་ཚད་སྦོ་འཁྲོག་སེལ་བར་བྱེད།། ཨ་རུ་ར་དང་རྒྱ་སྐྱེགས་ཞུ་མཁན་བཙོད།། མཁལ་ཚད་གཟེར་ཁྲིད་རྒྱུ་ལོང་སྨད་ཚད་སེལ།། ལོ་བརྒྱད་དྲི་ཆུ་རྒྱ་སྣག་ཕོ་ཚད་སེལ།། སྙ་ལོ་བཙོད་དང་བོང་ང་དཀར་པོའི་ཐང་།། དུག་ཉུང་བོང་ང་ག་དུར་བ་ལེ་ཀས།། ཐང་གིས་རྒྱུ་ལོང་སྣོད་ཚད་མ་ལུས་སེལ།། དེ་ལ་ཀ་པེད་འབྲས་བཏབ་ཚད་འཁྲུ་གཅོད།། གཟེ་མ་ལྕམ་པ་སྡིག་སྲིན་ཆུ་འགགས་སེལ།། བ་སྤྲུ་ར་མཉེ་གཟེ་མས་མངལ་ཚད་སེལ།། འབྲས་གསུམ་ཐང་གིས་རིམས་འཁྲུགས་ཚ་བའི་ནད།། གསར་རྙིང་མ་ལུས་སེལ་ཞིང་སྨིན་པར་བྱེད།། མ་ནུ་ཀཎྡྲི་ཀ་རི་སླེ་ཏྲེས་དང་།། སྒ་སྐྱའི་ཐང་གིས་རིམས་ཚད་སྨིན་པར་བྱེད།། བད་ཀན་སྐྱ་སྨུག་སྟོངས་ཚད་ཁྲག་གཟེར་སེལ།། ཏིག་ཏ་སླེ་ཏྲེས་གསེར་གྱི་མེ་ཏོག་དང་།། བྱི་ཚེར་ཐང་གིས་རིམས་ཚད་ལྕི་ཐིབས་སེལ།། ཏིག་ཏ་ཧོང་ལེན་སྐྱུ་རུ་བ་ཤ་ཀ། ཁྲག་འཁྲུགས་ཚ་བ་རོལ་གསོད་དངས་སྙིགས་འབྱེད།། ཨ་རུ་ལྡུམ་བུ་བོང་ངའི་བསྡུས་ཁུ་ལ།། ཚ་ལ་བཏབ་བཏང་སྦྱར་དུག་ཤ་དུག་སེལ།། མ་ནུ་རུ་རྟ་པུ་ཤེལ་བ་ཤ་ཀ། བསྡུས་གྲངས་སྨུག་པོ་རྒྱས་བའི་འཕྲལ་ཟུག་གཅོག། སེང་ལྡེང་ཨ་རུ་ར་དང་ཀྱི་ལྕེ་བ།། སྐྱེར་པའི་ཐང་གིས་ཆུ་སེར་ཚ་བ་སྐེམ།། ཏིག་ཏ་ཀྱི་ལྕེ་བོང་ངས་མཁྲིས་ཚད་འཇོམས།། འབྲས་བཀྲུས་ཁུ་བར་པུ་ཤེལ་སྦྲང་རྩི་བཏབ།། ཙེ་གུར་བཏང་བས་སྐྱུགས་པ་གཅོད་པར་བྱེད།། བིལ་བ་མོན་ཆ་ར་དང་ད་ཏྲིག་དང་།། སྐྱེར་པའི་མེ་ཏོག་དར་བར་བཏབ་བྱས་ཏེ།། ཙེ་གུར་བཏང་ན་འཁྲུ་བ་གཅོད་པར་བྱེད།། སོ་མ་ར་ཛ་བོང་ང་དཀར་པོ་ཡི།། བསྡུས་ཐང་དུག་གིས་སྐྱུག་པ་གཅོད་པར་བྱེད།། གུར་གུམ་དོམ་མཁྲིས་ཚོས་ཐང་ཁྲག་སྐྱུགས་གཅོད།། སྤྲུ་རྩ་སྐྱེར་པ་མཁན་སྐྱ་རམ་པ་ཚོས།། བསྡུས་ཁུར་གུར་གུམ་དོམ་མཁྲིས་མི་མཁྲིས་དང་།། སྤྲུ་མའི་འབྲུ་དང་སྲན་མའི་མེ་ཏོག་བཏབ།། ཁྲག་ཤོར་མ་ལུས་ཁོང་དུ་སྦེད་པའི་མཆོག། དབང་པོ་ལག་པ་སླེ་ཏྲེས་ཏིག་ཏ་ཡི།། ཐང་གིས་ཡན་ལག་ཀོ་ལེའི་ཚ་བ་སེལ།། སླེ་ཏྲེས་བྲག་ཞུན་ཨ་རུས་དྲེག་ནད་སེལ།། ཤིང་མངར་ཙན་དན་གླ་རྩི་ག་དུར་བཞིའི།། ཐང་གིས་རྩ་ཡི་ཚད་པ་སེལ་བར་བྱེད།། བ་སྤྲུ་སྐྱེར་པ་སླེ་ཏྲེས་ཨ་རུ་ར།། བསྡུས་ཁུར་གུ་གུལ་དཀར་པོ་ཞོ་གཉིས་བཏབ།། ཤ་མདངས་ཆུ་སེར་པགས་པའི་ནད་ཀུན་སེལ།། ཏིག་ཏ་བྱི་ཚེར་ཛཱ་ཏི་སྐྱུ་རུ་རའི།། ཐང་གིས་མིག་སེར་ཕོ་བའི་ཟུག་གཟེར་འཇོམས།། སེ་འབྲུ་གོ་སྙོད་སྦྲང་བཏབ་དང་ག་འབྱེད།། ཨ་རུའི་ཆིག་ཐང་ཕོ་བའི་མཁྲིས་པ་སེལ།། སྐྱུ་རུའི་ཆིག་ཐང་ཁྲག་ངན་འབྱེད་ཅིང་སྐེམ།། བ་རུའི་ཆིག་ཐང་ཆུ་སེར་ནག་པོ་སྐེམ།། བ་ཤ་ཀ་ཡི་ཆིག་ཐང་ཁྲག་ནད་སེལ།། འུ་སུའི་ཆིག་ཐང་སྨུག་པོ་སྐོམ་དད་སེལ།། ལྕགས་ཁུས་མཆིན་ཚད་མིག་ནད་ཤུ་བ་སེལ།། གླ་སྒང་ག་དུར་སྲོ་ལོ་དཀར་པོ་ཡི།། ཆིག་ཐང་གློ་ཡི་ཚད་པ་མ་ལུས་སེལ།། སེང་ལྡེང་ཆིག་ཐང་ཆུ་སེར་སྐེམ་པར་བྱེད།། སླེ་ཏྲེས་ཆིག་ཐང་རིམས་ནད་མ་སྨིན་འབྱེད།། བཙོད་དང་སྤང་རྒྱན་ཆིག་ཐང་འབྲུམ་ནག་སེལ།། བྲག་ཞུན་ཆིག་ཐང་དྲེག་ནད་ཆུ་འགགས་སེལ།། ཆུ་རུག་ཐང་གིས་རྒྱུས་པའི་ཚད་པ་སེལ།། སྟབ་སེང་ཆིག་ཐང་རུས་པ་གས་པ་སྦྱོར།། ཏིག་ཏའི་ཐང་གིས་བད་ཀན་ཚད་པ་སེལ།། གྲང་སེལ་བཅའ་སྒ་རྒྱམ་ཚ་ཨ་རུ་ར།། ཚན་མོས་དྲོད་ཆུང་གྲང་བ་མ་ལུས་སེལ།། པི་པི་ལིང་བསྣན་སྨན་མ་ཞུ་བ་འཇུ།། སྒ་དང་ཤིང་ཀུན་བསྡུས་པའི་ཁུ་བ་ལ།། ཁ་རུ་ཚ་བཏབ་སྙིང་རླུང་སེལ་བར་བྱེད།། སྒྲོན་ཤིང་གླ་སྒང་ཤིང་ཀུན་ཨ་རུ་ར།། རླུང་རིམས་གྲང་རླུང་ཁ་གདོང་གཡོ་བ་སེལ།། སེ་འབྲུ་པི་པི་ལིང་དང་སྒ་བསྡུས་ཁུར།། འབྲས་ཡོས་སྦྲང་རྩི་ཁ་ཚར་བཏབ་པ་ཡིས།། འཁྲུ་དང་སྐྱུག་པ་སྦོ་སྒྲེག་སྐྱིགས་བུ་སེལ།། ད་ལིས་སུག་སྨེལ་སྒ་ཐང་ལྕེ་མཆུ་དཀར།། སྙིང་འདར་མཆིན་རྒུད་མ་ཞུ་ངལ་བ་སེལ།། ཁ་རུ་ཚ་དང་ཟི་ར་པི་པི་ལིང་།། ཤིང་ཚ་ལ་ལ་ཕུད་དང་ཕོ་བ་རིས།། ཐང་གིས་ཁ་ཟས་མི་འཇུ་སྐྱུག་པ་སེལ།། ཤིང་ཚ་ཁ་རུ་ཚ་དང་ཚ་བ་གསུམ།། འོ་མར་བཏབ་བཏང་གྲང་སེལ་འཁྲུ་བ་གཅོད།། སུག་སྨེལ་ཟི་ར་དཀར་པོ་པི་པི་ལིང་།། འོ་མར་བསྡུས་ཐང་གཉིད་མེད་ཡེར་བ་འགུགས།། སྒོག་སྐྱ་སྲང་བཞི་ཆུ་བོ་བརྒྱད་འགྱུར་དུ།། ཆུ་བསྡུས་འོ་མས་རླུང་སྐྲན་རླུང་རིམས་དང་།། གཟུགས་འཁུམས་ལ་སོགས་རླུང་ནད་མ་ལུས་སེལ།། ཨ་རུ་བསྡུས་ཁུར་དོང་གྲ་བཏབ་བྱས་ནས།། ནང་རེ་བཏང་ན་སྐྲན་མཁྲིས་མིག་སེར་སེལ།། ཐལ་ཚ་ཡ་བཀྵ་ཐང་སྦོས་པ་སེལ།། ཁ་རུ་ཚ་ཡི་ཆིག་ཐང་ཕོ་ལོག་འཇོམས།། རྒྱམ་ཚའི་ཆིག་ཐང་མ་ཞུ་གསར་པ་འཇུ།། རྒྱ་ཚའི་ཆིག་ཐང་དྲི་ཆུ་འགགས་པ་སེལ།། རྡོ་ཐལ་ཆིག་ཐང་ཕོ་བའི་བད་ཀན་བཤིག། སྒ་ཡི་ཆིག་ཐང་དྲོད་སྐྱེད་མ་ཞུ་འཇུ།། སྲད་དཀར་ཆིག་ཐང་མཆེར་ནད་དམུ་རྫིངས་སེལ།། བ་སྤྲུའི་ཆིག་ཐང་སྨད་ཀྱི་གྲང་བ་སེལ།། སོག་ཚིགས་ཆིག་ཐང་ཆང་མ་ཞུ་བ་འཇུ།། སོགས་ཡུའི་ཐང་གིས་ཤ་མ་ཞུ་བ་འཇུ།། ནས་བསྡུས་ཐང་གིས་དང་ག་འགགས་པ་འབྱེད།། སྲེ་ལོང་ཐང་གིས་ཐོར་བུའི་རླུང་སྣ་གནོན།། དེ་སོགས་ཁུ་བའི་སྡེ་ཚན་སྦྱར་བའི་ཐབས།། གྲང་ཐང་ཁུ་བ་ཐོན་པར་སྦང་བ་གཅེས།། བསྡུས་ཐང་ཀུན་ལ་ཁུ་བ་སུམ་གཉིས་བསྡུ།། ཚ་སེལ་གྲང་བཏང་གྲང་སེལ་ཚ་མོར་བཏང་།། ཚ་གྲང་འདྲེས་པའི་ནད་ལ་དྲོ་འཇམ་བསྟེན།། ཟས་དང་སྤྱོད་ལམ་ནད་དང་མཐུན་པ་གཅེས།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཐང་གི་སྡེ་ཚན་བསྟན་པའི་ལེའུ་སྟེ་གསུམ་པའོ།། །།

X