//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > རྩ་རྒྱུད། > ནང་དོན།

ལེའུ་གསུམ་པ། གནས་ལུགས་ནད་གཞི།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 9:41:03 ཀློག་གྲངས། 27 

      དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་དྲང་སྲོང་རིག་པའི་ཡེ་ཤེས་ལ་འདི་སྐད་ཅེས་གསོལ་ཏོ།། ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། གསོ་བ་རིག་པའི་རྒྱུད་སྡེ་རྣམ་བཞི་ལས།། རྩ་བའི་རྒྱུད་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་ལས་ཐུགས་ཀྱི་སྤྲུལ་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཡིད་ལས་སྐྱེས།། དང་པོ་རྩ་རྒྱུད་མདོ་ཡི་གནས་བསྟན་པ།། རྩ་བ་གསུམ་ལ་འདྲིལ་བའི་སྡོང་པོ་དགུ།། གྱེས་པའི་ཡལ་ག་བཞི་བཅུ་རྩ་བདུན་ཏེ།། ལོ་འདབ་ཉིས་བརྒྱ་རྩ་བཞིར་རྒྱས་པ་ཡིན།། གསལ་བའི་མེ་ཏོག་འབྲས་བུ་ལྔ་རུ་སྨིན།། འདི་དག་རྩ་བའི་རྒྱུད་ཀྱི་སྡོམས་སུ་བཤད།།དེ་ཉིད་རྒྱས་བར་བཀྲོལ་ན་འདི་ལྟ་སྟེ།། ནད་དང་ལུས་ཟུངས་དྲི་མ་རྣམ་པ་གསུམ།། རྣམ་པར་མ་གྱུར་པ་དང་གྱུར་པ་ལས།། ལུས་ནི་གནས་དང་འཇོམས་པར་བྱེད་པ་ཡིན།། ནད་ནི་རླུང་དང་མཁྲིས་པ་བད་ཀན་གསུམ།། སྲོག་འཛིན་གྱེན་རྒྱུ་ཁྱབ་བྱེད་མེ་ཐུར་སེལ།། འཇུ་བྱེད་མདངས་སྒྱུར་སྒྲུབ་མཐོང་མདོག་གསལ་ལྔ།། རྟེན་མྱག་མྱོང་ཚིམ་འབྱོར་བྱེད་བཅོ་ལྔ་འོ།། དངས་མ་ཁྲག་ཤ་ཚིལ་རུས་རྐང་ཁུ་བ།། ལུས་ཟུངས་བདུན་ཡིན་དྲི་མ་བཤང་གཅི་རྔུལ།། དེ་ལྟར་རྣམ་གྲངས་ཉི་ཤུ་རྩ་ལྔ་པོ།། རོ་དང་ནུས་པ་སྤྱོད་ལམ་རྣམ་གསུམ་གྱིས།། ཐམས་ཅད་མཉམ་པར་གནས་པས་འཕེལ་འགྱུར་ཞིང་།། དེ་ལས་ལྡོག་པ་གནོད་པར་འགྱུར་བ་ཡིན།། ནད་ནི་སྐྱེད་པར་བྱེད་པའི་རྒྱུ་གསུམ་སྟེ།། དེ་ལ་ལྷན་ཅིག་བསྐྱེད་པའི་རྐྱེན་བཞི་ཡིས།། འཇུག་སྒོ་རྣམ་པ་དྲུག་ཏུ་ཞུགས་ནས་ནི།། ལུས་ཀྱི་སྟོད་སྨད་བར་དུ་གནས་བཅས་ཤིང་།། རྒྱུ་བར་བྱེད་པའི་ལམ་ནི་བཅོ་ལྔ་རུ།། ན་སོ་ཡུལ་དུས་དགུ་རུ་འཕེལ་བྱེད་དེ།། འབྲས་བུ་སྲོག་གཅོད་པ་ཡི་ནད་དགུར་སྨིན།། ལྡོག་པའི་རྒྱུ་ནི་བཅུ་དང་གཉིས་སུ་འགྱུར།། མདོ་དོན་དྲིལ་བས་ཚ་གྲང་གཉིས་སུ་འདུས།། དེ་ལྟར་དྲུག་ཅུ་རྩ་གསུམ་གསོ་བྱའི་ནད།། དེ་ལ་འདོད་ཆགས་ཞེ་སྡང་གཏི་མུག་གསུམ།། རླུང་མཁྲིས་བད་ཀན་རིམ་པས་སྐྱེད་པའི་རྒྱུ།། དེ་ལ་དུས་གདོན་ཟས་དང་སྤྱོད་ལམ་བཞིས།། དེ་དག་འཕེལ་དང་ཟད་པར་གྱུར་ནས་ནི།། པགས་ལ་གྲམ་ཞིང་ཤ་ལ་རྒྱས་པ་དང་།། རྩ་རུ་རྒྱུ་ཞིང་རུས་ལ་ཞེན་པ་དང་།། དོན་ལ་འབབ་ཅིང་སྣོད་དུ་ལྷུང་བར་འགྱུར།། བད་ཀན་ཀླདད་པ་ལ་བརྟེན་སྟོད་ན་གནས།། མཁྲིས་པ་མཆིན་མཁྲིས་ལ་བརྟེན་བར་ན་གནས།། རླུང་ནི་དཔྱི་རྐེད་ལ་བརྟེན་སྨད་ན་གནས།། རུས་པ་རྣ་བ་རེག་བྱ་སྙིང་སྲོག་ལོང་།། ཁྲག་རྔུལ་མིག་དང་མཆིན་མཁྲིས་རྒྱུ་མ་དང་།། དངས་མ་ཤ་ཚིལ་རྐང་ཁུ་བཤང་གཅི་དང་།། སྣ་ལྕེ་གློ་མཆེར་ཕོ་མཁལ་ལྒང་པ་རྣམས།། ལུས་ཟུངས་དྲི་མ་དབང་པོ་དོན་སྣོད་ལྔ།། རླུང་མཁྲིས་བད་ཀན་རྒྱུ་བའི་ལམ་དུ་བཤད།། རྒས་པ་རླུང་མི་དར་མ་མཁྲིས་པའི་མི།། བྱིས་པ་བད་ཀན་མི་ཡིན་ན་སོས་གཉན།། ངད་ཅན་གྲང་བ་རླུང་གི་ཡུལ་ཡིན་ཏེ།། སྐམ་ས་ཚ་གདུང་ཆེ་བ་མཁྲིས་པའི་ཡུལ།། རླན་ཅན་སྣུམ་པ་བད་ཀན་ཡུལ་དུ་བཤད།། རླུང་ནད་དབྱར་དུས་དགོངས་དང་ཐོ་རངས་ལྡང་།། མཁྲིས་པ་སྟོན་དུས་ཉིན་དགུང་མཚན་དགུང་ལྡང་།། བད་ཀན་དཔྱིད་དུས་སྲོད་དང་སྔ་དྲོ་ལྡང་།། འཚོ་བ་གསུམ་ཟད་འདུ་བ་གཤེད་དུ་བབས།། སྦྱོར་བ་མཚུངས་དང་གནད་དུ་བབས་པ་དང་།། དུས་འདས་རླུང་ནད་སྲོག་རྟེན་ཆད་པ་དང་།། ཚ་བ་ལ་འདས་གྲང་བ་གཏིང་འཁར་བ།། ཟུངས་ཀྱིས་མི་ཐུབ་རྣམ་པར་འཚེ་བ་རྣམས།། འབྲས་བུ་སྲོག་གཅོད་ནད་དགུ་ཞེས་སུ་བཤད།། རླུང་མཁྲིས་བད་ཀན་ཞི་དང་མ་ཞི་བ།། གཉིས་གཉིས་བཞི་རུ་ལྡོག་པས་བཅུ་གཉིས་སོ།། རླུང་དང་བད་ཀན་གྲང་བ་ཆུ་ཡིན་ཏེ།། ཁྲག་དང་མཁྲིས་པ་ཚ་བ་མེ་རུ་འདོད།། སྲིན་དང་ཆུ་སེར་ཚ་གྲང་ཐུན་མོང་གནས།། དེ་ལྟར་རྣམ་གྲངས་བརྒྱད་ཅུ་རྩ་བརྒྱད་ཀྱིས།། ནད་གཞིའི་རྣམ་པ་མ་ལུས་ཤེས་པར་འགྱུར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གནས་ལུགས་ནད་གཞིའི་ལེའུ་སྟེ་གསུམ་པའོ།། །།

X