//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་ཉི་ཤུ་པ། སྨན་གྱི་ནུས་པ་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:51:52 ཀློག་གྲངས། 96 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགསྨན་གྱི་ནུས་པ་རོ་ནུས་ངོ་བོ་གཉིས།། སྤྱི་དང་བྱེ་བྲག་ཅེས་སུ་གསུངས་པ་ཡིན།། དང་པོ་ནུས་སྟོབས་ཡོན་ཏན་གསུམ་དུ་བཤད།། ནུས་པ་ལྕི་སྣུམ་བསིལ་དང་རྟུལ་བ་དང་།། ཡང་རྩུབ་ཚ་དང་རྣོ་བ་རྣམ་པ་བརྒྱད།། དང་པོ་བཞི་པོས་རླུང་དང་མཁྲིས་པ་སེལ།། འོག་མ་བཞི་ཡིས་བད་ཀན་སེལ་བར་བྱེད།། ཡང་རྩུབ་བསིལ་བ་གསུམ་གྱིས་རླུང་སྐྱེད་ཅིང་།། ཚ་རྣོ་སྣུམ་པ་གསུམ་གྱིས་མཁྲིས་པ་སྐྱེད།། ལྕི་སྣུམ་བསིལ་རྟུལ་བཞི་ཡིས་བད་ཀན་སྐྱེད།། ཡོན་ཏན་མ་ལུས་སྙིང་པོར་གྱུར་པ་དང་།། ནུས་པའི་ཁྱད་དང་ལྡན་པས་མཐུ་ཞེས་བརྗོད།། གངས་ཅན་འབིགས་བྱེད་ཟླ་ཉིའི་སྟོབས་ཅན་ལས།། བསིལ་དྲོད་ཕུལ་དུ་བྱུང་བས་སྟོབས་ཞེས་བྱ།། དེ་ལ་ཚ་བས་གྲང་བའི་ནད་རྣམས་སེལ།། བསིལ་བས་ཚ་བའི་ནད་རྣམས་སེལ་བར་བྱེད།། ཡོན་ཏན་འཇམ་དང་ལྕི་དྲོ་སྣུམ་དང་བརྟན།། གྲང་དང་རྟུལ་བ་བསིལ་མཉེན་སླ་དང་སྐམ།། སྐྱ་དང་ཚ་བ་ཡང་དང་རྣོ་རྩུབ་གཡོ།། བཅུ་དང་བདུན་གྱིས་མཚན་ཉིད་ཉི་ཤུ་འཇོམས།། དེ་ཕྱིར་ཡོན་ཏན་ཞེས་སུ་བཤད་པ་ཡིན།། དེ་དག་ཕལ་ཆེར་རོ་ལས་རྗེས་འབྱུང་སྟེ།། རོ་ནི་ས་སོགས་རྣམས་ལ་བརྟེན་པའི་ཕྱིར།། ལྕི་སྣུམ་ལ་སོགས་དེ་ལས་འབྱུང་བ་ཡིན།། ལན་ཚ་ཚྭབསྐ་མངར་རྣམ་གསུམ་རིམ་བཞིན་ལྕི།། དེ་བཞིན་ལན་ཚ་ཚྭསྐྱུར་མངར་སྣུམ་པ་ཡིན།། བསྐ་ཁ་མངར་བསིལ་ཁ་བསྐ་མངར་བ་རྟུལ།། སྐྱུར་ཚ་ཁ་བ་རྣམ་གསུམ་ཡང་ལ་རྩུབ།། ཚ་སྐྱུར་ལན་ཚ་ཚྭརྣམ་གསུམ་ཚ་ལ་རྣོ།། རོ་སོགས་མ་བཅོས་གང་ཡང་སྟོབས་ཅན་ཡིན།། རོ་མཉམ་ནུས་པ་སོ་སོ་རྟེན་སྟོབས་དང་།། གྱུར་པ་སྦྱར་བའི་དབང་ལས་འབྱུང་འགྱུར་ཏེ།། མི་མཐུན་འོག་མས་གོང་མ་ཟིལ་གྱིས་གནོན།། ཐམས་ཅད་མཐུན་ན་རོ་ཡིས་ལས་བྱེད་ལ།། རོ་བཞིན་མི་གནོད་ཞུ་རྗེས་ལས་བྱེད་དེ།། རོ་ལས་གོ་ལྡོག་ནུས་པས་ལས་བྱེད་པས།། རོ་བསྡེབས་ནུས་བསྡེབས་ཞུ་རྗེས་བསྡེབས་ཏེ་སྦྱར།། ངོ་བོ་རྫས་རེའི་ནུས་པ་བསྟན་པ་ནི།། རིན་པོ་ཆེ་ཡི་སྨན་དང་ས་རྡོའི་སྨན།། ཤིང་སྨན་རྩི་སྨན་ཐང་སྨན་སྔོ་སྨན་དང་།། སྲོག་ཆགས་སྨན་དང་དབྱེ་བ་བརྒྱད་དུ་བཤད།། དང་པོ་རིན་པོ་ཆེ་ཡི་ནུས་པ་ནི།། གསེར་གྱིས་ཚེ་རིང་རྒས་སྲ་དབྱིག་དུག་སེལ།། དངུལ་གྱིས་ཆུ་སེར་ནད་དང་རྣག་ཁྲག་སྐེམ།། ཟངས་ཀྱིས་རྣག་སྐེམ་གློ་མཆིན་ཚ་བ་སེལ།། ལྕགས་ཀྱིས་མཆིན་དུག་མིག་ནད་སྐྱ་རྦབ་སེལ།། གཡུ་ཡིས་དུག་དང་མཆིན་པའི་ཚ་བ་སེལ།། མུ་ཏིག་ཀླད་པ་འཛག་གཅོད་དུག་ནད་སེལ།། ཉ་ཕྱིས་ནུས་པ་མུ་ཏིག་ཁྱད་པར་མེད།། དུང་གིས་རྣག་སྐེམ་འགྱིངས་འབིགས་རུས་ཚད་སེལ།། བྱུ་རུས་མཆིན་ཚད་རྩ་ཚད་དུག་ཚད་སེལ།། མུ་མེན་དུག་དང་ཆུ་སེར་མཛེ་ནད་སེལ།། རྡོ་ཡི་སྨན་གྱི་ནུས་པ་བསྟན་པ་ནི།། སྨུག་པོ་སྦལ་རྒྱབ་ཕོ་སྦལ་མོ་སྦལ་གཉིས།། ཆུ་སེར་འཕུལ་འདྲེན་སྐེམ་ཞིང་ལྷ་བ་འཛིན།། རུས་པ་ཆག་པ་སྦྱོར་ཞིང་ཀླད་པ་སྡོམ།། དཀར་པོ་སྦལ་རྒྱབ་དཀར་པོ་ཆིག་ཐུབ་དང་།། སྨུག་པོ་ཆིག་ཐུབ་ལ་སོགས་དེ་དང་འདྲ།། གངས་ཐིགས་དེ་བཞིན་མཆིན་པའི་ཚ་བ་སེལ།། ཁབ་ལེན་མདེའུ་འབྱིན་ཀླད་རུས་རྩ་ནད་སེལ།། བེ་སྣབས་རུས་སྦྱོར་རྨེན་གཅོད་ཤའུ་སྐྱེད།། མཉྫི་ར་ཡིས་རུས་པའི་ཚད་པ་སེལ།། ཕག་མགོས་རུས་པ་གསོ་ཞིང་ཆུ་སེར་འདྲེན།། བྱེ་མགོ་དེ་བཞིན་ཤའུ་སྐྱེད་པ་དང་།། གསེར་རྡོ་དངུལ་རྡོ་ཆུ་སེར་འདྲེན་པར་བྱེད།། སྟང་ཟིལ་གསེར་ཟིལ་དངུལ་ཟིལ་རུས་མདོག་འབྱིན།། གྲུ་བཞི་བཞིསཀླད་པ་གསོ་ཞིང་ཆུ་སེར་འདྲེན།། ཅོག་ལ་མ་ཡིས་རྩ་དང་ལྷ་བ་འཛིན།། རྡོ་ཀླད་ཀླད་པ་སྡོམ་ཞིང་ཤའུ་གསོ།། ལི་གྲིས་རུལ་གཅོད་རྡོ་ཆུས་རུས་པ་སྦྱོར།། རྡོ་མཁྲིས་རྩ་སྡོམ་གཤའ་དཀར་ཤའུ་སྐྱེད།། ལྡོང་རོས་བ་བླ་རྨེན་ངན་རུལ་བ་གཅོད།། རྡོ་སོལ་རྡོ་རྣམས་འཇུ་ཞིང་རྩ་ཁ་སྡོམ།། བ་ནུ་རྡོ་རྒྱུས་མཐིང་རྒྱུས་ཆུ་བ་གསོ།། ཏི་ཚ་སེར་པོ་རྨ་འདྲུབ་མིག་ལ་ཕན།། མཚལ་གྱིས་རྨ་འདྲུབ་གློ་མཆིན་རྩ་ཚད་སེལ།། ལིག་བུ་མིག་དང་བཙག་ཡུག་རྣམ་ལ་སོགས།། མིག་ནད་རུས་ཚད་སེལ་ཞིང་ཆུ་སེར་སྐེམ།། ཅོང་ཞིས་འཁྲུ་གཅོད་བད་ཀན་ཚ་བ་སེལ།། རྡོ་ཐལ་ཕོ་བའི་བད་ཀན་འདྲིལ་བ་གཅོད།། ཧ་ཤིག་རྩ་སྦྱོང་མོ་རྡེ་རྡེ་ནད་སེལ།། ས་ཡི་སྨན་གྱི་ནུས་པ་བསྟན་པ་ནི།། གསེར་གྱི་བྱེ་མས་མཁལ་ནད་ཆུ་འགགས་སེལ།། སིནྡྷུ་ར་ཡིས་རྩ་ཚད་དོན་རྨ་གསོ།། རྣག་ཁྲག་སྐེམ་ཞིང་མེས་འཚིག་རྨ་ལ་ཕན།། ཟེ་ཚས་རྡོ་འཇུ་རྡེའུ་རྡོ་སྐྲན་བཤིག། ཡ་བཀྵ་ར་དྲོད་སྐྱེད་སྐྲན་ནད་སྦྱོང་།། བུལ་ཏོག་རུལ་གཅོད་རྩམ་པ་མྱགས་པར་བྱེད།། མུ་ཟི་སེར་པོ་པོསགདོན་འཇོམས་རྣག་ཁྲག་སྐེམ།། ནག་མཚུར་སེར་མཚུར་རུལ་གཅོད་སྐྲན་ལ་བརྐོ།། བིག་པན་འབྲས་གཅོད་སྐྲན་བཤིག་ལིང་ཐོག་ལེན།། རྡོ་དྲེག་དུག་དང་ཚད་པ་རྙིང་པ་སེལ།། བྲག་ཞུན་ཚད་པའི་ནད་རྣམས་ཀུན་ལ་ཕན།། ཁྱད་པར་ཕོ་མཆིན་མཁལ་ཚད་སེལ་བའི་མཆོག། ཤིང་སྨན་རྩ་བ་ལྡུམ་བུ་སྡོང་པོ་དང་།། ཡལ་ག་རྐང་དང་ཤུན་པ་ཐང་ཆུ་དང་།། ལོ་མ་མེ་ཏོག་འབྲས་བུ་བཅུ་རུ་འགྱུར།། རྩི་སྨན་རྩ་ཤིང་སྲོག་ཆགས་ལས་བྱུང་བ།། ཐང་སྨན་རྩ་བ་ངར་པ་ལོ་མ་དང་།། མེ་ཏོག་འབྲས་བུ་ལྔ་རུ་འགྱུར་བ་ཡིན།། དེ་དག་གང་ལ་གང་ཕན་ནུས་པ་ནི།། ག་བུར་ཚ་བ་རྒྱས་པ་ཐོག་བབས་གསོད།། རྙིངས་ཤིང་ཞེན་པའི་ཚ་བ་རྩད་ནས་འབྱིན།། ཙན་དན་དཀར་པོས་གློ་སྙིང་འཁྲུགས་ཚད་སེལ།། ཙན་དན་

X