//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་བཅུ་དགུ་པ། རོ་དང་ཞུ་རྗེས་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:51:01 ཀློག་གྲངས། 16 

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས།། སྦྱོར་བ་སྨན་གྱི་གནས་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག ནད་ལ་གསོ་བར་བྱེད་པའི་གཉེན་པོ་ཡི།། སྦྱོར་བ་སྨན་གྱི་གནས་ལ་བསླབ་བྱ་ན།། རོ་དང་ཞུ་རྗེས་ནུས་པ་སྦྱར་ཐབས་བཞི།། དང་པོ་རོ་ལ་རྟེན་དང་དབྱེ་བ་དང་།། ངོ་བོ་སྡེ་ཚན་ལས་དང་རྣམ་པ་ལྔ།། རྟེན་ནི་འབྱུང་བ་ལྔ་ལས་སྐྱེ་འགྱུར་ཏེ།། ས་ཡིས་གཞི་རྟེན་ཆུས་རླན་མེ་ཡིས་དྲོད།། རླུང་གིས་བསྐྱོད་བྱེད་ནམ་མཁས་གོ་ཕྱེ་བས།། དེས་བསྐྱེད་གྱུར་ཀྱང་ཤས་ཆེར་རོ་གཅིག་མིན།། ས་ཆུ་མེ་ས་ཆུ་མེ་ཆུ་དང་རླུང་།། མེ་རླུང་ས་རླུང་གཉིས་ཀྱིས་རོ་དྲུག་སྐྱེད།། ས་སྨན་ལྕི་བརྟན་རྟུལ་འཇམ་སྣུམ་ལ་སྐམ།། མཁྲང་ལ་བརྟས་དང་སྡུད་བྱེད་རླུང་ནད་སེལ།། ཆུ་སྨན་སླ་བསིལ་ལྕི་རྟུལ་སྣུམ་ལ་མཉེན།། བརླན་ཞིང་འཇམ་ལ་སྡུད་བྱེད་མཁྲིས་ནད་སེལ།། མེ་སྨན་ཚ་རྣོ་སྐམ་རྩུབ་ཡང་སྣུམ་གཡོ།། དྲོད་སྐྱེད་སྨིན་ཅིང་མདོག་བྱེད་བད་ཀན་སེལ།། རླུང་སྨན་ཡང་གཡོ་གྲང་རྩུབ་སྐྱ་ལ་སྐམ།། སྲ་ཞིང་བསྐྱོད་དང་ཁྱབ་བྱེད་བད་མཁྲིས་སེལ།། ནམ་མཁའ་འབྱུང་གཞིའི་སྨན་ལ་སྤྱིར་ཁྱབ་སྟེ།། ཁོང་སྟོང་ཡངས་པའི་གོ་འབྱེད་འདུས་ནད་སེལ།། དེ་བས་དངོས་དང་སྦྱར་བའི་དབང་གྱུར་ལས།། ས་སྟེང་སྨན་མིན་ཅི་ཡང་ཡོད་མ་ཡིན།། གྱེན་འདྲེན་སྨན་ནི་མེ་དང་རླུང་ཡིན་ཏེ།། ཐུར་འགྲོ་ས་དང་ཆུ་ལས་བྱུང་བའི་ཕྱིར།། བཀྲུ་སྨན་ཕལ་ཆེར་དང་པོའི་རོ་ལས་འབྱུང་།། རོ་ནི་མངར་སྐྱུར་ལན་ཚ་ཚྭཁ་ཚ་བསྐ།། གོ་རིམ་བཞིན་དུ་འཚོ་བྱེད་སྟོབས་ཆེན་ཡིན།། ངོ་བོ་ལྕེ་ལ་གསལ་བས་རོ་ཞེས་བྱ།། དེ་ཡང་མངར་བའི་རོ་དེ་མྱངས་པའི་ཚེ།། ཁ་ལ་ཆགས་ཤིང་ཞིམ་པས་སྲེད་པ་སྐྱེ།། སྐྱུར་བ་སོ་བརྩེ་བཞིན་སྡུད་ཁ་ཆུ་འཛག། ལན་ཚ་ཚྭརེག་ན་ཚ་ཞིང་མཆིལ་མ་འདུ།། ཁ་བ་ཁ་ཡི་དྲི་སྦྱོང་ཡི་ག་ལྡོག། ཚ་བ་ཁ་ལྕེ་བསྲེག་ཅིང་མིག་ཆུ་འཛག། བསྐ་བ་ལྕེ་རྐན་ལ་ཆགས་རྩུབ་སྙམ་བྱེད།། རོ་དྲུག་སོ་སོ་སྨན་གྱི་སྡེ་བསྟན་པ།། ཤིང་མངར་རྒུན་འབྲུམ་གུར་གུམ་ཅུ་གང་དང་།། དོང་ག་ར་མཉེ་ཉེ་ཤིང་ལྕ་བ་དང་།། ཀ་ར་བུ་རམ་སྦྲང་དང་ཤ་མར་སོགས།། དེ་དང་དེ་འདྲ་མངར་བའི་སྨན་སྡེ་ཡིན།། སེ་འབྲུ་སྟར་བུ་བསེ་ཡབ་སྐྱུ་རུ་ར།། རྒྱ་ཤུག་ད་ཏྲིག་ཞོ་དར་ཆང་དང་རྩབས།། དེ་དང་དེ་འདྲ་ལ་སོགས་སྐྱུར་བའི་སྡེ།། རྒྱམ་ཚ་རྒྱ་ཚ་ལྕེ་མྱང་ཚ་དང་ནི།། རྭ་ཚ་ཁ་རུ་ཚ་དང་ཙབས་རུ་ཚ།། ཟེ་ཚ་ལྦ་ཚ་མཛེ་ཚ་ཐལ་ཚ་དང་།། ཤིང་ཚ་ཡ་བཀྵ་ར་བུལ་ཏོག་རྣམས།། དེ་དང་དེ་འདྲ་ལ་སོགས་ལན་ཚའི་ཚྭའིསྡེ།། ནིམ་པ་ཏིག་ཏ་བོང་ང་དཀར་པོ་དང་།། ཧོང་ལེན་གསེར་གྱི་མེ་ཏོག་དུག་མོ་ཉུང་།། གླ་རྩི་མཁྲིས་པ་སྐྱེར་པ་བ་ཤ་ཀ། བྲག་ཞུན་ཀྱི་ལྕེ་རེ་སྐོན་ལ་སོགས་པ།། དེ་དང་དེ་འདྲ་ཁ་བའི་སྨན་སྡེ་ཡིན།། ན་ལེ་ཤམ་དང་བཅའ་སྒ་པི་པི་ལིང་།། སྒེ་གཤེར་ཤིང་ཀུན་སྲུབ་ཀ་ལྕེ་ཚ་བ།། དྭ་བ་བཙོང་དང་སྒོག་སྐྱ་ལ་སོགས་པ།། དེ་དང་དེ་འདྲ་ཚ་བའི་སྨན་སྡེ་ཡིན།། ཙན་དན་ཨ་རུ་ར་དང་བ་རུ་ར།། ཨུཏྦལ་ག་དུར་སྨག་དང་མོན་ཆ་ར།། འོམ་བུ་ལ་སོགས་དེ་འདྲ་བསྐ་བའི་སྡེ།། ག་བུར་ཆུ་མ་ཙི་ལ་སོགས་པ་ཡི།། ལྡན་པའི་རོ་རྣམས་དེ་ལས་བསྒྲེས་ཏེ་དཔྱད།། ནད་གང་སེལ་བ་རོ་ཡི་ལས་བསྟན་པ།། མངར་སྐྱུར་ལན་ཚ་ཚྭཚ་བས་རླུང་འཇོམས་ཤིང་།། ཁ་དང་མངར་དང་བསྐ་བས་མཁྲིས་པ་སེལ།། ཚ་སྐྱུར་ལན་ཚས་ཚྭསབད་ཀན་སེལ་བར་བྱེད།། ཁྱད་པར་མངར་བས་འཕྲོད་ཅིང་ཟུངས་སྟོབས་སྐྱེད།། རྒས་བྱིས་སྐེམ་པོ་གྲེ་བ་གློ་ལ་ཕན།། ལུས་བརྟས་རྨ་འབྱོར་མདངས་བཀྲ་དབང་པོ་གསལ།། ཚེ་རིང་འཚོ་བྱེད་དུག་དང་རླུང་མཁྲིས་སེལ།། བསྟེན་དྲགས་བད་ཀན་ཚིལ་སྐྱེད་མེ་དྲོད་འབྲི།། ལུས་སྦོམ་གཅིན་ནད་ལྦ་བ་རྨེན་བུ་སྐྱེད།། སྐྱུར་བས་དྲོད་སྐྱེད་ཡི་ག་འབྱེད་པ་དང་།། ཚིལ་འདྲུལ་གཅོད་བྱེད་འཇུ་ཞིང་རེག་པ་སེལབསིལ།། རླུང་འགགས་རྒྱུ་ཞིང་བསྟེན་དྲགས་ཁྲག་མཁྲིས་སྐྱེད།། ལུས་ལྷོད་རབ་རིབ་མགོ་འཁོར་སྐྱ་རྦབ་འོར།། མེ་དབལ་གཡན་པ་ཐོར་བུ་སྐོམ་རིམས་སྐྱེད།། ལན་ཚས་ཚྭསསྲ་འཁྱིལ་འགགས་པ་འབྱིན་པ་དང་།། དུགས་ཀྱིས་རྔུལ་དང་དྲོད་སྐྱེད་ཡི་ག་འབྱེད།། བསྟེན་དྲགས་སྐྲ་འབྱི་སྐྲ་དཀར་གཉེར་མ་མང་།། སྟོབས་འབྲི་སྐོམ་མཛེ་མེ་དབལ་ཁྲག་མཁྲིས་སྐྱེད།། ཁ་བས་ཡི་ག་འཆུས་དང་སྲིན་སྐོམ་དུག། མཛེ་དང་བརྒྱལ་དང་རིམས་རློན་མཁྲིས་པ་འཇོམས།། འདྲུལ་དང་ཚིལ་ཞག་རྐང་མར་བཤང་གཅི་སྐེམ།། ཡིད་གཞུངས་ནུ་མའི་ནད་དང་སྐད་འགགས་སེལ།། བསྟེན་དྲགས་གཟུངས་ཟུངསའཛད་རླུང་དང་བད་ཀན་སྐྱེད།། ཚ་བས་ལྐོག་ནད་གག་པ་མཛེ་འོར་སེལ།། རྨ་འཇིག་དྲོད་སྐྱེད་འཇུ་བྱེད་ཡི་ག་འབྱེད།། ཚིལ་དང་འདྲུལ་བག་སྐེམ་སྦྱོང་རྩ་སྦུབས་འབྱེད།། བསྟེན་དྲགས་ཁུ་བ་སྟོབས་ཟད་ལུས་འཁུམས་འདར།། བརྒྱལ་ཞིང་རྐེད་པ་རྒྱབ་སོགས་ན་བར་བྱེད།། བསྐ་བས་ཁྲག་མཁྲིས་ཚིལ་དང་འདྲུལ་བག་སྐེམ།། རྨ་འཚོ་ཚིལ་དང་ལྤགས་མདོག་དངས་པར་བྱེད།། བསྟེན་དྲགས་བེ་སྣབས་འཁྱིལ་དང་བཤང་བ་སྲི།། ལྟོ་སྦོ་སྙིང་ནད་སྐེམ་དང་རྩ་སྒོ་འགག། མདོར་བསྡུས་མངར་བའི་རོ་ཡིས་རླུང་མཁྲིས་སེལ།། ནས་རྙིང་སྐམ་སའི་ཤ་རྣམས་མ་གཏོགས་པ།། ཕལ་ཆེར་བད་ཀན་སྐྱེད་པར་བྱེད་ན་ཡང་།། གཡག་རྒོད་ཉ་ལུག་ཤ་དང་སྦྲང་རྩི་ཕན།། སྐྱུར་བས་བད་ཀན་སེལ་བྱེད་མཁྲིས་སྐྱེད་ཀྱང་།། སྐྱུ་རུ་ར་ཡིས་ཁྲག་མཁྲིས་ཚ་བ་སེལ།། ལན་ཚས་ཚྭསརླུང་དང་བད་ཀན་སེལ་བྱེད་ཅིང་།། ལྕེ་མྱང་རྒྱམ་ཚ་མ་གཏོགས་མཁྲིས་པ་སྐྱེད།། ཧ་ཅང་ཐལ་དྲགས་ལྕི་བས་བད་ཀན་སྐྱེད།། ཁ་བས་མཁྲིས་སེལ་བད་རླུང་སྐྱེད་ན་ཡང་།། ཀ་རཉྫ་དང་སླེ་ཏྲེས་བད་རླུང་སེལ།། ཚ་བས་རླུང་དང་བད་ཀན་སེལ་བྱེད་ལ།། སྒོག་སྐྱ་པི་པི་ལིང་མིན་མཁྲིས་པ་སྐྱེད།། ཧ་ཅང་ཐལ་དྲགས་ཡང་རྩུབ་རླུང་ཡང་སྐྱེད།། བསྐ་བས་མཁྲིས་སེལ་ཨ་རུ་བ་རུ་ར།། མ་གཏོགས་ཕལ་ཆེར་བད་རླུང་གཉིས་ལ་གནོད།། ཞུ་རྗེས་ཕོ་བའི་མེ་དང་ཕྲད་པའི་ཚེ།། བད་མཁྲིས་རླུང་གིས་རིམ་པར་ཞུ་བ་ལས།། མངར་དང་ལན་ཚའི་ཚུའིཞུ་རྗེས་མངར་བར་ཞུ།། སྐྱུར་བ་རོ་མཚུངས་ཁ་ཚ་བསྐ་གསུམ་ཁ།། ཉེས་པ་གསུམ་པོ་གཉིས་གཉིས་རེ་རེས་སེལ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རོ་དང་ཞུ་རྗེས་བསྟན་པའི་ལེའུ་སྟེ་བཅུ་དགུ་པའོ།། །།

X