//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་བཅུ་བདུན་པ། ཁ་ཟས་བསྡམ་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:49:46 ཀློག་གྲངས། 24 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགཟས་སྐོམ་བསྡམ་བྱ་དུག་ལྡན་མི་འཕྲོད་ཟས།། འཕྲལ་དུ་སྲོག་འདོར་ཉེས་པ་འཁྲུག་ཕྱིར་བསྲུང་།། རྒྱལ་པོའི་ཕོ་བྲང་སྲོག་འཚོའི་སློབ་དཔོན་བཞག། དེས་ནི་ཟས་སྐོམ་དུག་ལས་ཐར་བར་འགྱུར།། དུག་ལྡན་ཟས་དེ་ཁ་དོག་དྲི་རོ་ལྡོག། མེར་བསྲེགས་དུ་བ་རྨ་བྱའི་མགྲིན་འདྲ་འབྱུང་།། མེ་ལྕེ་གཅིག་ཏུ་འཁྱིལ་ཞིང་མེ་སྟག་རྒལ།། མཐོང་ན་བྱ་རོག་སྐད་འདོན་རྨ་བྱ་དགའ།། ཁྱི་ལ་བྱིན་ན་ལྟོ་བ་དྲོས་ནས་སྐྱུག། ཤ་ལ་དུག་ཡོད་དམར་ལ་ལྕགས་མི་ལེན།། སྦོས་ཤིང་ཆང་སྦྱར་མིག་བདུགས་ཚ་ཞིང་འཁྲུག། དུག་སྟེར་ཆག་ཚང་མི་དེ་ཁ་སྐམ་ཞིང་།། རྔུལ་ཞིང་འདར་ལ་སྐྲག་ཅིང་འདུག་མི་ཚུགས།། གནོང་བག་གིས་ནི་ཕྱོགས་སུ་བལྟ་བར་བྱེད།། ཤེས་ནས་ཀུན་ལ་གནོད་པར་འགྱུར་ཕྱིར་དོར།། ཁ་ཟས་མི་འཕྲོད་ཟོས་པས་སྦྱར་དུག་མཚུངས།། ཞོ་མ་ལངས་དང་ཆང་གསར་མི་འཕྲོད་དེ།། ཉ་ཡི་ཤ་དང་འོ་མ་འཕྲོད་པ་མིན།། དེ་བཞིན་འོ་མ་ཤིང་ཐོག་གཉིས་མི་འཕྲོད།། བྱ་ཡི་སྒོ་ང་ཉ་ཡི་ཤ་མི་འཕྲོད།། སྲན་མའི་ཚོད་མ་བུ་རམ་ཞོ་མི་འཕྲོད།། ཤ་མོ་ཡུངས་ཀར་མར་ལ་བརྡོས་བརྔོསཔ་དང་།། ཁྱིམ་བྱའི་ཤ་དང་ཞོ་བསྲེས་ཟ་བ་དང་།། སྦྲང་རྩི་མར་ནག་ཆ་མཉམ་འཕྲོད་མི་འགྱུར།། མར་གསར་འཁར་བའི་སྣོད་དུ་ཞག་བཅུ་ལས།། སྐྱེར་པའི་མེ་ལ་ཧ་རི་ཏྲ་ཤ་བསྲེགས།། ཅོང་ཞི་ཟོས་རྗེས་ཤ་མོ་ཁུར་བ་ཟ།། ཞུན་མར་ཟོས་རྗེས་ཆུ་གྲང་འཐུང་བ་དང་།། ཤ་ལ་དཀར་སྐྱུར་རྩམ་དྲིས་ཕོག་པ་དང་།། བཙོས་པའི་རླངས་བསྲུབས་ཞག་བདུན་ལོན་པ་དང་།། སྐྱུར་དང་འོ་མ་ལྷན་ཅིག་ཟ་བ་དང་།། སྔ་མ་མ་ཞུ་ཕྱི་མ་ཟོས་པ་ཡིས།། ཁ་ཟས་མི་འཕྲོད་ཟོས་པས་འཐབ་པ་དང་།། མ་གོམས་དུས་མིན་ཟོས་པས་དུག་ཏུ་འགྱུར།། རྩོལ་བཅས་སྣུམ་བསྟེན་དྲོད་ཆེ་དར་ལ་བབ།། སྟོབས་ལྡན་གོམས་པར་ཟོས་ལ་གནོད་མི་འགྱུར།། མི་འཕྲོད་འཕྲོད་པ་བསྟེན་ནམ་སྤང་བྱེད་ན།། འདྲིས་གོམས་སྒོ་ནས་ཆ་ཡིས་བསླབ་པར་བྱ།། འཕྲལ་དུ་སྤང་བསྟེན་ཉེས་པ་མྱུར་དུ་འཁྲུག། གནོད་པ་གནོད་བྱའི་བདག་ཉིད་ཉེར་གྱུར་པས།། ཕན་མེད་གནོད་པར་བྱེད་པ་མཁས་པས་སྤང་།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་ཟས་བསྡམ་པའི་ལེའུ་སྟེ་བཅུ་བདུན་པའོ།། །།

X