//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་བཅུ་བཞི་པ། དུས་སུ་སྤྱོད་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:47:06 ཀློག་གྲངས། 31 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགགཉིས་པ་དུས་སུ་སྤྱོད་པའི་སྤྱོད་ལམ་ནི།། དགུན་སྟོད་དགུན་སྨད་དཔྱིད་དང་སོ་ག་དང་།། དབྱར་སྟོན་དགུན་ཟླ་ར་སོགས་གཉིས་རིམ་བཞིན།། སྐད་ཅིག་ལ་སོགས་ཐང་ཅིག་ཡུད་ཙམ་ལ།། ཉིན་ཞག་ཟླ་བ་དུས་དང་ལོར་འགྱུར་ཏེ།། ཉི་མ་བརྒྱད་གསུམ་དབྱར་དགུན་དབུས་སུའང་ལྡོག། གསུམ་ནི་ལྷོ་དང་བྱང་དུ་འགྲོ་ཞེས་བྱ།། ནམ་དང་ཉི་མ་ཕྱེད་ན་མཉམ་པ་ཡིན།། བརྒྱད་དང་བཅུ་ན་སྒྲ་སྒྲོགས་ཆད་པར་འགྱུར།། དེ་ལ་དགུན་ཟླ་ཐ་ཆུང་ལ་སོགས་པ།། ཉི་མ་བྱང་དུ་འགྲོ་བའི་དུས་ཀྱི་ཚེ།། ཤིན་ཏུ་རྣོ་ཚ་རྩུབ་པའི་ངོ་བོར་འགྱུར།། རླུང་དང་ཉི་མ་དག་གི་ནུས་སྟོབས་ཀྱིས།། ཟླ་བ་ས་ཡི་ཡོན་ཏན་ཟད་པར་བྱེད།། འདིར་ནི་ཚ་བསྐ་ཁ་བའི་རོ་སྟོབས་ཆེ།། མི་རྣམས་ཀྱི་ནི་མཐུ་སྟོབས་ཉིན་རེ་འཕྲོག། ཆར་དུས་ལྷོ་ཕྱོགས་འགྲོ་ཚེ་སླར་སྟོབས་སྐྱེད།། བསིལ་བ་ཟླ་བའི་སྟོབས་ལྡན་ཉི་མ་འབྲི།། ཆར་བབས་རླུང་གིས་ས་སྟེང་ཚ་བ་ཞི།། སྐྱུར་དང་ལན་ཚ་ཚྭམངར་བའི་རོ་སྟོབས་སྐྱེད།། དགུན་ཆེ་སོས་དང་དབྱར་ཆུང་སྟོན་དཔྱིད་འབྲིང་།།དེ་ལྟར་བགྲོད་དུས་རྣམ་པ་གཉིས་བསྟན་ནས།། ད་ནི་ནམ་ཟླ་དུས་དྲུག་སྤྱོད་ལམ་ནི།། དགུན་སྟོད་གྲང་བས་བ་སྤུའི་སྒོ་བཀག་སྟེ།། མེ་ཡི་སྟོབས་ལྡན་རླུང་གིས་སྦར་བ་ཡིས།། ཟས་ཉུང་གྱུར་ན་ལུས་ཟུངས་འགྲིབ་བར་འགྱུར།། དེ་ཕྱིར་དང་པོའི་རོ་གསུམ་བསྟེན་པར་བྱ།། དེ་ཚེ་མཚན་མོ་རིང་བས་བཀྲེས་གྱུར་ཏེ།། དེ་ཡིས་ལུས་ཟུངས་འབྲི་བར་འགྱུར་བའི་ཕྱིར།། ཏིལ་མར་གྱིས་བྱུག་ཤ་ཁུ་སྣུམ་པ་བཟའ།། ལྤགས་པའི་གོས་དང་ལྷམ་ནི་རྟག་ཏུ་བགོ།། དུགས་དང་མེ་ཉིའི་འོད་ལ་རན་པར་བསྲོ།། ས་ཡི་ཁང་པ་ཉིས་རིམ་ནང་དུ་བསྡད།། དགུན་སྨད་དུས་ན་ལྷག་པར་གྲང་བས་ན།། དེར་ཡང་སྤྱོད་ལམ་འདི་ཉིད་སྤྱད་པར་བསྔགས།། དགུན་དུས་བད་ཀན་ཁོག་ཏུ་གསོག་པ་སྟེ།། དཔྱིད་དུས་ཉི་འོད་དྲོས་པས་མེ་དྲོད་ཉམས།། བད་ཀན་ལྡང་ཞིང་ཐ་མའི་རོ་གསུམ་བསྟེན།། ནས་རྙིང་སྐམ་སའི་ཤ་དང་སྦྲང་རྩི་དང་།། ཆུ་སྐོལ་སྒ་ཐང་བཏང་ཞིང་རྩུབ་པ་བསྟེན།། རྩོལ་བས་བཅག་དང་དྲིལ་ཕྱིས་བད་ཀན་བསལ།། དྲི་ཞིམ་སྐྱེད་མོས་ཚལ་གྱི་ཉི་གྲིབ་འདུག། སོ་ག་ཉི་མའི་འོད་ཟེར་རབ་ཚ་བས།། སྟོབས་འཕྲོག་ཕྱིར་ན་མངར་ཡང་སྣུམ་བསིལ་བཟའ།། ལན་ཚ་ཚྭཚ་སྐྱུར་རྩོལ་བ་ཉི་འོད་སྤང་།། བསིལ་ཆུས་ལུས་བཀྲུ་ཆང་ཆུ་བསྲེས་བ་བཏུང་།། རབ་ཕྲའི་གོས་བགོ་བསིལ་ཁང་དྲི་བཟང་བསྟེན།། ཤིང་གྲིབ་རྫི་ཆར་བསེར་བུ་ངད་ལྡན་བྱ།། དབྱར་དུས་མཁའ་ལ་སྤྲིན་འདུས་ཆུ་ཡིས་བརླན།། རླུང་དང་གྲང་བ་ས་རླང་རླངསཆུ་རྙོག་ཅན།། མེ་དྲོད་གནོད་པས་མེ་དྲོད་སྐྱེད་པ་བསྟེན།། དང་པོའི་རོ་གསུམ་ཡང་དྲོ་སྣུམ་བཅས་བཟའ།། སྐམ་སའི་ཆང་བཏུང་ཁང་སྟེང་བསིལ་སྤངས་གནས།། དབྱར་བསིལ་འཕྲལ་དུ་ལུས་ལ་ཉི་ཟེར་གདུངས།། ཆར་དུས་བསགས་པའི་མཁྲིས་པ་སྟོན་ན་ལྡང་།། དེ་བསལ་ཕྱིར་ན་མངར་ཁ་བསྐ་བ་བསྟེན།། ག་བུར་ཙན་དན་ཨུ་ཤིར་དྲི་ལྡན་པའི།། གོས་བགོ་ཁང་པ་ཆག་ཆག་བཏབ་པར་འདུག། མདོར་ན་ཟས་སྐོམ་དབྱར་དགུན་དྲོ་བ་བསྟེན།། དཔྱིད་རྩུབ་སོས་དང་སྟོན་ག་བསིལ་བར་བྱ།། དབྱར་དང་དགུན་ནི་དང་པོའི་རོ་གསུམ་བསྟེན།། དཔྱིད་ཀ་ཐ་མའི་རོ་གསུམ་སོ་ག་མངར།། སྟོན་ཀ་མངར་ཁ་བསྐ་བ་བསྟེན་པར་བྱ།། སྟོན་དཔྱིད་བཤལ་སྐྱུགས་དབྱར་ག་འཇམ་རྩི་བསྔགས།། དམན་ལྷག་ལོག་ན་དེ་དང་འཚམ་པར་དཔྱད།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུས་སུ་སྤྱད་པའི་ལེའུ་སྟེ་བཅུ་བཞི་པའོ།། །།

X