//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་བཅུ་གཅིག་པ། ནད་ཀྱི་མཚན་ཉིད་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:42:17 ཀློག་གྲངས། 34 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགཉེས་པའི་མཚན་ཉིད་འཕེལ་ཟད་འཁྲུགས་པ་གསུམ།། འཕེལ་ཟད་ནད་ཟུངས་དྲི་མ་རྣམ་གསུམ་སྟེ།། དེ་ལ་རྒྱུ་དང་མཚན་མ་རྟགས་བསྟན་པའོ།། དང་པོ་ཉེས་པ་འཕེལ་དང་ཟད་པའི་རྒྱུ།། ཟས་སྤྱོད་མི་འདོད་སློང་དང་མི་འཕྲོད་འཕྲད།། སྤངས་བྱིན་དེ་དང་དེ་འཕེལ་ཟད་པར་འགྱུར།། གཉིས་པ་ལུས་ཀྱི་མེ་དྲོད་རང་གནས་འདུག། ཆ་ཤས་ལུས་ཟུངས་ཀུན་ལ་གནས་པ་དེ།། འབར་དང་བྲི་བས་འཕེལ་དང་ཟད་པར་འགྱུར།། དང་པོས་ཕྱི་མ་རྒྱས་དང་འགྲིབ་བྱེད་ཡིན།། དྲི་མ་ཐོགས་དང་ཤིན་ཏུ་འབྱུང་ལས་ཤེས།། དེ་རྟགས་རླུང་འཕེལ་སྐེམ་ནག་དྲོད་ལ་དགའ།། ལུས་འདར་ལྟོ་བ་སྦོ་ཞིང་བཤང་བ་སྲི།། སྨྲ་མང་མགོ་འཁོར་སྟོབས་གཉིད་དབང་པོ་ཉམས།། མཁྲིས་པ་འཕེལ་བས་བཤང་གཅི་ལྤགས་མིག་སེར།། བཀྲེས་སྐོམ་ལུས་ཚ་གཉིད་ཆུང་འཁྲུ་བར་བྱེད།། བད་ཀན་འཕེལ་བས་དྲོད་ཉམས་ཟས་མི་འཇུ།། ལུས་ལྕི་མདོག་དཀར་ཁོང་སྙོམ་ཡན་ལག་ལྷོད།། མཆིལ་མང་ལུད་པ་གཉིད་ཆེ་དབུགས་མི་བདེ།། དངས་མ་འཕེལ་བས་བད་ཀན་དང་འདྲ་ལ།། ཁྲག་འཕེལ་མེ་དབལ་ཁོང་འབྲས་མཆེར་པའི་ནད།། མཛེ་སྐྲན་ཁྲག་མཁྲིས་ནད་དང་མིག་སེར་དང་།། རྙིལ་ནད་བསྐྱོད་དཀའ་མིག་དང་གཅིན་ལྤགས་དམར།། ཤ་འཕེལ་ལྦ་བ་རྨེན་བུ་ཤ་རྒྱས་འགྱུར།། ཚིལ་འཕེལ་ངལ་དང་ནུ་མ་གསུས་ཚིལ་སྐྱེ།། རུས་པ་འཕེལ་བས་རུས་ལྷག་སོ་ལྷག་འབྱུང་།། རྐང་འཕེལ་ལུས་ལྕི་མིག་གཡུང་ཚིགས་ཁ་སྦོམ།། ཁུ་འཕེལ་ཁུ་བའི་རྡེ་འགྱུར་བུད་མེད་དད།། བཤང་འཕེལ་ལུས་ལྕི་ལྟོ་སྦོ་རྒྱུ་མ་འཁྲུག། གཅིན་འཕེལ་ཆུ་སོར་ཟུག་ཅིང་མ་གཅིས་སེམསེམས།། རྔུལ་འཕེལ་རྔུལ་ཆེ་དྲི་ལྡོག་ལྤགས་ནད་འབྱུང་།། ཕྲ་མོ་འཕེལ་བས་ལྕི་ཞིང་གཡའ་འདྲུལ་བྱེད།། རླུང་ཟད་རྩོལ་ཆུང་སྨྲ་ཉམས་ལུས་མི་བདེ།། དྲན་པ་མི་གསལ་བད་ཀན་འཕེལ་རྟགས་འབྱུང་།། མཁྲིས་ཟད་དྲོད་མདོག་ཉམས་པས་དྲང་གྲངདང་ནག། བད་ཀན་ཟད་པས་རང་གི་གནས་སྟོངས་ཤིང་།། མགོ་འཁོར་སྙིང་འདར་ཚིགས་མཚམས་ལྷོད་པར་འགྱུར།། དངས་མ་ཟད་པས་ཤ་སྐམ་ཟས་མིད་དཀའ།། ལྤགས་རྩུབ་སྒྲ་ཆེར་མི་བཟོད་ན་བར་འགྱུར།། ཁྲག་ཟད་རྩ་ལྷོད་ལྤགས་རྩུབ་བསིལ་སྐྱུར་དད།། ཤ་ཟད་ལྷུ་ཚིགས་ན་ཞིང་རུས་པགས་འབྱར།། ཚིལ་ཟད་གཉིད་ཆུང་ཤ་སྐམ་སྔོ་སྐྱར་འགྱུར།། རུས་པ་ཟད་པས་སྐྲ་འབྱི་སོ་སེན་ཕྱུང་།། རྐང་ཟད་སྦུབས་སྟོང་མགོ་འཁོར་མིག་འགྲིབ་འགྱུར།། ཁུ་བ་ཟད་པས་ཁྲག་འབྱུང་འཚིག་གམ་སེམསེམས།། བཤང་ཟད་རྒྱུ་མའི་ནང་དུ་སྒྲ་བཅས་འཁྱིལ།། གྱེན་དུ་འགྲོ་ཞིང་རྩིབ་ལོགས་སྙིང་ག་ན།། གཅིན་ཟད་མདོག་འགྱུར་སྲི་དང་ཉུང་ངུར་འགྱུར།། རྔུལ་ཟད་ལྤགས་འགས་བ་སྤུ་འགྲེང་དང་འབྱི།། ཕྲན་བུ་རང་གནས་སྟོངས་དང་ཡང་ལས་ཤེས།། ལུས་ཟུངས་དྲི་མ་ལ་ནི་བརྟེན་པའི་ཕྱིར།། འཕེལ་བསྐྱེད་ཟད་པས་སྟོབས་ལ་གནོད་པ་ཡིན།། མདངས་ནི་སེམས་ལ་སྡུག་བསྔལ་གྱིས་ཟད་དེ།། དངངས་རིད་ཉམ་ཆུང་མི་དགའ་གཟི་མདངས་ཉམས།། འཚོ་བྱེད་འོ་མ་ཤ་ཁུ་དེ་སྨན་ཡིན།། འཁྲུགས་རྟགས་རླུང་གི་རྩ་ནི་སྟོང་ལ་རྐྱལ།། ཆུ་ནི་ཆུ་འདྲ་དངས་ལ་ལོག་རྗེས་སླ།། འགྲོ་འདོད་ཤུས་འདེབས་ཤེས་པ་ཡང་ལ་འཕྱོ།། མགོ་བོ་ཟི་འཁོར་རྣ་བ་འུར་ལ་འཁྲོག། ལྕེ་སྐམ་དམར་རྩུབ་ཁ་རོ་བསྐ་བ་བྲོ།། གཟེར་འཕོ་གྲང་འདར་འགུལ་རྒྱབ་ཟུག་དང་སྙོམ།། རེངས་འཁུམས་བྱེ་ཆག་འབྱིན་དང་དཀྲིས་སྙམ་བྱེད།། འགུལ་ན་ཟུག་ཆེ་སྤུ་བརྩེ་ཕྲུམ་སེར་ཁྱེར།། གཉིད་མེད་གཡལ་འདར་རྐྱོང་འདོད་ཚིག་པ་ཟ།། དཔྱི་རྐེད་རུས་ཚིགས་མ་ལུས་བརྡུངས་སྙམ་བྱེད།། ལྟག་པ་བྲང་དང་མུར་འགྲམ་ཟུག་ཅིང་གཟེར།། རླུང་གསང་རྣམས་ནི་ཁ་བྱེ་མནན་ན་ན།། སྟོང་སྐྱུགས་བྱེད་ཅིང་ཐོ་རངས་ལྦུ་གསོབ་ལུ།། སྦོ་འཁྲོག་དགོངས་དང་ཐོ་རངས་ཞུ་རྗེས་ན།། མཁྲིས་པ་འཁྲུགས་རྟགས་རྩ་རྒྱས་ཕྲ་གྲིམས་མགྱོགས།། ཆུ་མདོག་དམར་སེར་དྲི་དུགས་རླངས་པ་ཆེ།། མགོ་ན་ཤ་ཚ་ཁ་རོ་སྐྱུར་ལ་ཁ།། ལྕེ་སྟེང་བད་ཀན་ཆེ་ལ་སྣ་སྒོ་སྐམ།། མིག་སྤྲིན་དམར་སེར་གཟེར་བ་གཅིག་ཏུ་འདྲིལ།། ནུབ་གཉིད་ཆུང་ལ་ཉིན་པར་གཉིད་མི་ཐུབ།། ལུད་པ་དམར་སེར་ཚ་ཚྭབྲོ་སྐོམ་དད་ཆེ།། ཁྲག་མཁྲིས་འཁྲུ་སྐྱུག་རྔུལ་ཆེ་དྲི་མ་མནམ།། ཁ་དོག་དམར་སེར་སྨིན་ཅིང་འདྲུལ་བར་བྱེད།། ཉིན་དགུང་མཚན་དགུང་ཞུ་བའི་དུས་ན་ན།། བད་ཀན་འཁྲུགས་རྟགས་རྩ་ནི་བྱིང་རྒུད་དལ།། ཆུ་ནི་མདོག་དཀར་དྲི་དང་རླངས་པ་ཆུང་།། ཁ་མངལ་ལྕེ་རྙིལ་སྐྱ་ལ་མིག་དཀར་སྐྲང་།། སྣབས་ལུད་མང་ཞིང་མགོ་འཐོམ་ལུས་སེམས་ལྕི།། དང་ག་མི་བདེ་དྲོད་མེད་འཇུ་སྟོབས་ཆུང་།། མཁལ་རྐེད་ན་ཞིང་ལུས་སྦོ་ལྦ་བ་སྐྱེ།། ཁ་ཟས་བད་ཀན་སྐྱུག་ཅིང་འཁྲུ་བ་དང་།། དྲན་པ་མི་གསལ་གཉིད་ཆེ་སྒྱིད་པ་སྐྱུར།། གཡའ་མཁྲང་ཚིགས་དམ་ཤ་རྒྱས་ལས་མཐའ་རིང་།། ནམ་ཞོད་སྲོད་དང་སྔ་དྲོ་ཟོས་ཐོག་ལྡང་།། དེ་ལྟར་མཚན་ཉིད་འཕེལ་ཟད་འཁྲུགས་གསུམ་གྱི།། ཇི་ལྟར་བཤད་པའི་རྟགས་ཀྱིས་ནད་ཀུན་ཁྱབ།། ལྡན་འདུས་འདྲེས་པའི་རྟགས་ལས་ཤེས་པར་བྱ།། འདིར་མ་འདུས་པའི་ནད་རྟགས་ཡོད་མི་སྲིད།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་ཀྱི་མཚན་ཉིད་བསྟན་པའི་ལེའུ་སྟེ་བཅུ་གཅིག་པའོ།། །།

X