//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་གཉིས་པ། ལུས་ཀྱི་ཆགས་ཚུལ་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:22:34 ཀློག་གྲངས། 42 

དེ་ནས་དྲང་སྲོང་ཡིད་ལས་སྐྱེས་ཀྱིས་སྟོན་པ་དྲང་སྲོང་རིག་པའི་ཡེ་ཤེས་ལ་འདི་སྐད་ཅེས་ཞུས་སོ།། ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས།། གྲུབ་པ་ལུས་ཀྱི་གནས་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག། དང་པོ་གང་གི་དོན་དུ་གསོ་བ་ལུས།། གྲུབ་པ་ལུས་གནས་བསྟན་པ་འདི་ལྟ་སྟེ།། ཆགས་ཚུལ་འདྲ་དཔེ་གནས་ལུགས་མཚན་ཉིད་དང་།། དབྱེ་བ་ལས་དང་འཇིག་ལྟས་བདུན་དུ་བཤད།། དེ་ལ་དང་པོ་ཆགས་པའི་ཚུལ་བསྟན་པ།། ཆགས་རྒྱུ་འཕེལ་རྐྱེན་བཙའ་རྟགས་རྣམ་པ་གསུམ། དང་པོ་ཕ་མའི་ཁུ་ཁྲག་སྐྱོན་མེད་པ།། རྣམ་ཤེས་ལས་དང་ཉོན་མོངས་ཀྱིས་བསྐུལ་ནས།། འབྱུང་ལྔ་ཚོགས་པ་མངལ་དུ་ཆགས་པའི་རྒྱུ།། དཔེར་ན་གཙུབས་ཤིང་དག་ལས་མེ་འབྱུང་མཚུངས།། ཁུ་ཁྲག་རླུང་གིས་རྩུབ་ནག་རོ་བསྐ་ལ། མཁྲིས་པས་རོ་སྐྱུར་མདོག་སེར་དྲི་མ་མནམ།། བད་ཀན་སྐྱ་འབྱར་རོ་མངར་བསིལ་བ་སྟེ།། ཁྲག་གིས་རུལ་ཏེ་བད་རླུང་དུམ་བུར་ཆད།། ཁྲག་མཁྲིས་རྣག་འདྲ་བད་མཁྲིས་མདུད་པ་ཅན།། རླུང་མཁྲིས་སྐམ་ཞིང་འདུས་པ་བཤང་གཅི་འདྲ།། འདི་དག་སྐྱོན་རེས་ས་བོན་བྱེད་མི་ནུས།། ལས་མ་འཛོམ་ན་རྣམ་ཤེས་མི་འཇུག་སྟེ།། ས་མེད་མི་འགྲུབ་ཆུ་མེད་སྡུད་མི་ནུས།། མེ་མེད་མི་སྨིན་རླུང་མེད་འཕེལ་མི་འགྱུར།། ནམ་མཁའ་མེད་པར་འཕེལ་བའི་གོ་མི་ཕྱེད།། ཁུ་བ་དཀར་ལྕི་མངར་ལ་མང་བ་དང་།། ཟླ་མཚན་ཚོས་ཁུ་རི་བོང་ཁྲག་འདྲ་བ།། བཀྲུས་ན་དག་འགྱུར་སྐྱོན་མེད་མངལ་ཆགས་བྱེད།། བུད་མེད་བཅུ་གཉིས་ལོན་ནས་ལྔ་བཅུའི་བར།། དངས་མ་ལས་བྱུང་ཟླ་རེར་བསགས་པའི་ཁྲག། རྩ་ཆེན་གཉིས་ནས་ནག་ཅིང་དྲི་བྲལ་བ།། རླུང་གིས་མངལ་གྱི་སྒོར་འབྱིན་ཞག་གསུམ་འཛག། དེ་རྟགས་ཉམས་ཆུང་བཞིན་རས་ངན་པ་དང་།། ནུ་མ་རྐེད་པ་མགུལ་པ་མིག་དཀུ་གཡོ།། ཟླ་མཚན་ལྡན་པ་སྐྱེས་པ་འདོད་པའི་རྟགས།། མངལ་ཁ་བྱེ་ནས་ཞག་ནི་བཅུ་གཉིས་བར།། དང་པོའི་ཞག་གསུམ་བཅུ་གཅིག་བུ་མི་ལེན།། གཅིག་གསུམ་ལྔ་བདུན་དགུ་ལ་བུར་འགྱུར་ཏེ།། གཉིས་དང་བཞི་དྲུག་བརྒྱད་པ་བུ་མོར་འགྱུར།། ཉི་མ་ནུབ་པས་པདྨའི་ཁ་ཟུམ་བཞིན།། བཅུ་གཉིས་འདས་ནས་ཁུ་བ་མངལ་མི་སྡང་།། ཁུ་བ་མང་བ་བུ་རུ་སྐྱེ་འགྱུར་གྱི།། ཟླ་མཚན་མང་བ་བུ་མོར་སྐྱེ་བར་འགྱུར།། ཆ་མཉམ་མ་ནིང་བྱེ་ལས་མཚེ་མར་སྐྱེ།། སྐྱེ་གནས་མི་མཐུན་པ་དང་གཟུགས་མི་སྡུག། འདི་དག་གནོད་པའི་དྲི་མས་སྐྱེ་བར་འགྱུར།། མངལ་ཆགས་མཚན་མས་ས་བོན་འཛིན་པ་དང་།། འདོད་པ་ངོམས་ཤིང་ལུས་སྙོམ་ལྕི་བ་ཡིན།། ཕ་ཡི་ཁུ་བས་རུས་པ་ཀླད་གཞུང་སྐྱེད།། མ་ཡི་ཟླ་མཚན་ཤ་ཁྲག་དོན་སྣོད་སྐྱེད།། རང་གི་སེམས་ལས་དབང་པོའི་རྣམ་ཤེས་འབྱུང།། ས་ལས་ཤ་དང་རུས་པ་སྣ་དྲི་སྐྱེད།། ཆུ་ལས་ཁྲག་དང་ལྕེ་རོ་རླན་པ་སྐྱེད།། མེ་ལས་དྲོད་དང་མདོག་གསལ་མིག་གཟུགས་སྐྱེད།། རླུང་ལས་དབུགས་དང་པགས་པ་རེག་བྱ་སྐྱེད།། མཁའ་ལས་བུ་ག་རྣ་བ་སྒྲ་སྐྱེད་འགྱུར།། གོམས་པས་བྱ་བ་ལ་འཇུག་སྣང་བ་མཆེད།། རྒྱུ་རྐྱེན་རྟེན་འབྲེལ་འཛོམ་པས་ལུས་སུ་འགྲུབ།། དེ་ལྟར་ཆགས་ནས་འཕེལ་བའི་ཚུལ་བསྟན་པ།། མངལ་ཆགས་འཕེལ་བའི་རྒྱུ་ནི་ལྟེ་བ་སྟེ།། བུ་སྣོད་གཡས་གཡོན་རྩ་དང་ལྟེ་བར་འབྲེལ།། རྩ་གཉིས་བསམ་སེ་བཅུད་ཀྱི་རྟེན་དང་འབྲེལ།། དེ་ཕྱིར་མ་ཡི་ཁ་ཟས་དངས་མ་ཡིས།། རིམ་གྱིས་མངལ་དུ་རྣམ་པར་འཕེལ་འགྱུར་ཏེ།། དཔེར་ན་རྫིང་ཡུར་ཆུ་ཡིས་ཞིང་སྐྱེད་འདྲ།། དེ་ཡང་བདུན་ཕྲག་སུམ་ཅུ་རྩ་བརྒྱད་ཀྱི།། རླུང་གིས་བསྒྱུར་ནས་ཟླ་དགུར་འཕེལ་འགྱུར་ཏེ།། ཟླ་བ་དང་པོ་བདུན་ཕྲག་དང་པོའི་དུས།། འོ་མར་རུ་མ་བླུག་འདྲ་ཁུ་ཁྲག་འདྲེས།། བདུན་ཕྲག་གཉིས་པ་ནུར་ནུར་པོ་རུ་འགྱུར།། བདུན་ཕྲག་གསུམ་པ་ཞོ་ཆགས་ལྟ་བུར་སྣང།། སྐྱེས་བུ་འདོད་པས་དུས་འདིར་ཐབས་བསྟེན་ཏེ།། མཚན་མ་གསལ་བར་མ་གྱུར་གོང་དུ་བྱ།། འདི་སྟོབས་ལྡན་པས་ལས་ཀྱང་ཟིལ་གནོན་ནུས།། སྐར་མ་རྒྱལ་ལ་སྐྱེས་པ་བུ་ཡི་གཟུགས།། ལྕགས་སྣ་ཁ་ཡར་ལས་བརྡུངས་སོལ་མེ་ལ།། མདོག་འགྱུར་བསྲེགས་པ་བ་ཡི་འོ་མའི་ནང་།། གོང་གི་གྲངས་གསུར་ཁུ་བ་སྙིམ་གང་བླུད།། ཉི་མ་ཟླ་བའི་དངས་མ་བཟའ་བ་དང་།། བཅིངས་དང་གདགས་པའི་རྟེན་འབྲེལ་བསྟེན་པར་བྱ།། ཉལ་པོ་རྩོལ་དྲག་མཚན་མོ་གཉིད་མི་ལོག། ཉིན་གཉིད་ཤུགས་བཀག་ཚ་རྣོ་ལྕི་བ་དང་།། བཤང་དགག་ཟས་དང་རློན་ཁྲུས་མས་བཏང་དང་།། གཏར་ག་ལ་སོགས་ཟླ་བརྒྱད་བར་དུ་སྤང།། ཅི་ཕྱིར་མངལ་འཇིག་འཆི་འམ་དཀུ་སྐམས་འགྱུར།། བཞི་པ་གོར་གོར་མེར་མེར་ནར་ནར་པོ།། དེ་ལས་ཕོ་མོ་མ་ནིང་རིམ་པར་འགྱུར།། དེ་རྟགས་དཀུ་ལྕི་ལུས་རིད་ཡི་ག་འགག། གཡལ་རྨྱང་སྒྱིད་སྐྱུར་ནུ་མ་སྐྱེ་བ་དང་།། སྐྱུར་ལ་དགའ་ཞིང་སྙིང་ལ་སྣ་ཚོགས་འདོད།། དེ་བཀག་མངལ་འཇིག་གཟུགས་མི་སྡུག་པར་འགྱུར།། དེ་བས་གནོད་པའང་ཕན་བསྲེས་ཅུང་ཟད་བྱིན།། ཟླ་བ་གཉིས་པ་བདུན་ཕྲག་ལྔ་པ་ལ།། མངལ་གནས་ལུས་ཀྱི་དང་པོ་ལྟེ་བ་ཆགས།། དྲུག་པ་ལྟེ་བ་ལ་བརྟེན་སྲོག་རྩ་ཆགས། བདུན་པར་མིག་གི་དབང་པོ་གཟུགས་སུ་དོད།། བརྒྱད་པ་དེ་ལ་བརྟེན་ནས་མགོ་དབྱིབས་ཆགས།། དགུ་པར་ལུས་དབྱིབས་ཁོག་པ་སྟོད་སྨད་ཆགས།། ཟླ་བ་གསུམ་པ་བདུན་ཕྲག་བཅུ་པ་ལ།། དཔུང་པ་གཉིས་དང་དཔྱི་གཉིས་འབུར་དུ་དོད།། བཅུ་གཅིག་དབང་པོ་དགུ་ཡི་གཟུགས་དབྱིབས་དོད། བཅུ་གཉིས་པ་ལ་དོན་ལྔའི་གཟུགས་དབྱིབས་དོད།། བཅུ་གསུམ་པ་ལ་སྣོད་དྲུག་གཟུགས་དབྱིབས་དོད།། ཟླ་བ་བཞི་པ་བདུན་ཕྲག་བཅུ་བཞི་ལ།། དཔུང་རྐང་བརླ་རྐང་བཞི་པོའི་གཟུགས་དབྱིབས་དོད།། བཅོ་ལྔ་པ་ལ་རྐང་ལག་རྗེ་ངར་དོད།། བཅུ་དྲུག་པ་ལ་སོར་མོ་ཉི་ཤུ་དོད།། བཅུ་བདུན་ཕྱི་ནང་འབྲེལ་པའི་རྩ་རྣམས་ཆགས།། ཟླ་ལྔ་བདུན་ཕྲག་བཅོ་བརྒྱད་ཤ་ཚིལ་ཆགས།། བཅུ་དགུ་པ་ལ་ཆུ་བ་རྒྱུས་པ་ཆགས།། ཉི་ཤུ་པ་ལ་རུས་དང་རྐང་མར་ཆགས།། རྩ་གཅིག་པ་ལ་ཕྱི་ཡི་པགས་པ་གཡོགས།། དེ་ནས་ཟླ་དྲུག་བདུན་ཕྲག་རྩ་གཉིས་ལ།། དབང་པོ་སྒོ་དགུའི་བུ་ག་རྣམ་པར་བྱེ།། རྩ་གསུམ་སྐྲ་དང་བ་སྤུ་སེན་མོ་སྐྱེ།། རྩ་བཞི་པ་ལ་དོན་སྣོད་གསལ་བར་སྨིན།། དེ་དུས་བདེ་དང་སྡུག་བསྔལ་ཤེས་པར་འགྱུར།། རྩ་ལྔ་པ་ལ་རླུང་གི་རྒྱུ་བ་འབྱུང་།། རྩ་དྲུག་པ་ལ་སེམས་ཀྱི་དྲན་པ་གསལ།། དེ་ནས་ཟླ་བདུན་བདུན་ཕྲག་རྩ་བདུན་ནས།། སུམ་ཅུའི་བར་གྱིས་ཐམས་ཅད་གསལ་རྫོགས་འགྱུར།། ཟླ་བ་བརྒྱད་པ་བདུན་ཕྲག་སོ་གཅིག་ནས།། སོ་ལྔའི་བར་དུ་ཐམས་ཅད་ཆེར་འཕེལ་བྱེད།། མ་དང་བུ་གཉིས་ཐང་རེ་གཟི་མདངས་འཕོ།། ཟླ་བ་དགུ་པ་བདུན་ཕྲག་སོ་དྲུག་ནས།། མངོན་པར་མི་དགའ་སྐྱོ་བའི་འདུ་ཤེས་འབྱུང་།། སོ་བདུན་པ་ལ་ལོག་པའི་འདུ་ཤེས་སྐྱེ།། སོ་བརྒྱད་མགོ་མཇུག་ལོག་སྟེ་མངལ་ནས་འབྱིན།། འོན་ཀྱང་ཁྲག་ཟགས་པ་ན་འཕེལ་མི་ནུས།། མངལ་རྒྱས་ཟླ་བ་ཚང་ཡང་བཙའ་བ་དཀའ།། རླུང་གིས་དཀུ་བཀག་ཟླ་བ་ཚང་ཡང་འགོར།། དེ་ལྟར་མངལ་དུ་འཕེལ་ཞིང་སྨིན་པའི་ཚེ།། ཟླ་དགུ་འདས་ནས་བཙའ་བའི་དུས་ཡིན་ཏེ།། དེ་ཡང་གཡས་ལོགས་ལ་བརྟེན་དཀུ་གཡས་མཐོ།། ལུས་ཡང་རྨི་ལམ་དག་ན་སྐྱེས་པ་མཐོང།། ནུ་ཞོ་གཡས་པ་སྔར་འབྱུང་ཁྱེ་འུ་སྐྱེ།། སྐྱེས་པ་ཕྲད་འདོད་གླུ་གར་རྒྱན་ལ་དགའ།། གོང་ལས་ལྡོག་པ་བུ་མོ་སྐྱེ་བའི་རྟགས།། དེ་དག་འདྲེས་ལས་མ་ནིང་འབྱུང་བ་སྟེ།། དབུས་དམའ་མཐའ་གཉིས་མཐོ་ན་མཚེ་མར་སྐྱེ།། དེ་ནས་མྱུར་དུ་བཙའ་རྟགས་ལུས་སྙོམ་ཞིང།། དཀུ་ལྷོད་སྨད་ལྕི་ཚང་ར་རྐེད་པ་ན།། ལྟོ་བ་ཆུ་སོ་ན་ཞིང་ལྡང་དུབ་བྱེད།། མཚན་བྱེ་གཅིན་མང་དབང་མེད་ནད་ཟུག་ལྡང།། བུད་མེད་བཙའ་མྱོང་གིས་བསྐོར་བཙའ་བར་བྱ།། སྲོག་འབྲལ་འདྲ་བའི་ནད་སོས་ཚས་ཀྱིས་གསོ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་ཆགས་ཚུལ་བསྟན་པའི་ལེའུ་སྟེ་གཉིས་པའོ།། །།

X