>
ཁྱེད་ཀྱི་གནས་ཡུལ། > གཙོ་ངོས། > སྨན་རྫས། > ཤིང་གི་སྨན། > > ནང་དོན།

ཨ་རུ་ར།

ཇུས་འགོད་པ། སྒྲོལ་མ་མཚོ། རྩོམ་སྒྲིག་པ། བོད་གཞུག་སྐྱིད། དུས་ཚོད། 2015-06-08 10:44:14 ཀློག་གྲངས། 258

     བདུད་རྩི་སྨན་གྱི་རྣམ་དབྱེ་ངོ་བོ་ནུས་མིང་རྒྱས་པར་བཤད་པ་དྲི་མེད་ཤེལ་ཕྲེང་ལས། ཨ་རུ་ར་ནི་ནད་རྣམས་ཀུན་ལ་མཆོག། ཅེས་པ་འདི་སྨོན་ལམ་གྱི་མཐུ་དང་ངོ་བོའི་རོ་ནུས་པ་གང་ཐད་ནས་ནད་དོ་ཅོག་གི་གཉེན་པོ་ཡིན་པས་སྨན་མཐའ་དག་གི་རྒྱལ་པོར་གྱུར་ཕྱིར། རྒྱུད་དང་མན་ངག་ཐམས་ཅད་དུ།། སྨན་མཆོག་རྒྱལ་པོ་ཨ་རུ་ར།། ཞེས་བསྔགས་པ་འདི་ནི། སྔོན་ལྷ་དང་ལྷ་མ་ཡིན་གྱིས་བདུད་རྩི་ལོངས་སྤྱོད་པའི་དུས་སུ། ཚངས་པའི་ཞལ་ནས་ཐིགས་པ་སར་ལྷུང་བ་ལས་འཁྲུངས་པ་དང་། སྒྲ་གཅན་གྱི་མགྲིན་པ་ལ་འཁོར་ལོས་བཅད་པ་ནས་སར་ལྷུང་བ་ལས་འཁྲུངས་པ་གང་ཡང་རི་རབ་ཀྱི་རྩེར་ལྷའི་གནས་སུ་འཁྲུངས་པ་ཡིན་ཏེ། གསོ་དཔྱད་ཕྲན་བུ་ལས། རྣམ་པར་རྒྱལ་བ་ཞེས་བྱ་བ།། རྣམ་སྲས་ལ་སོགས་གནོད་སྦྱིན་གྱི།། གཞལ་མེད་ཁང་གི་ལོགས་སུ་སྐྱེ།། སྡོང་པོ་རིན་ཆེན་ལྔ་ལས་གྲུབ།། ལོ་མ་པཉྪ་ལི་ཀ་དང་།། མེ་ཏོག་ཨུ་དུམ་ཝཱ་ར་འདྲ།། འབྲས་བུ་ཨ་རུ་རྣམ་རྒྱལ་ཞེས། ཞེས་གསུངས་སོ།། དེ་ཡང་ལྷའི་བཙུན་མོ་བློ་གྲོས་བདེ་བྱེད་མས་ཨ་རུ་ར་རྣམ་པར་རྒྱལ་བ་སྔོན་པོ་རྟའི་མགོ་ཙམ་པ་ཞིག་སེམས་ཅན་གྱི་དོན་དུ་བཏུས་ནས། དེ་སྨན་གྱི་ལྷ་མོ་བདུད་རྩི་མའི་སྤྲུལ་པ་གྲུབ་པའི་ལྷ་མོ་ཡིད་འཕྲོག་མ་ལ་ཕུལ་ནས། ཡིད་འཕྲོག་ལྷ་མོ་བདག་ལ་གསོན།། དབྱིབས་ལེགས་མཛེས་ཤིང་ཡོན་ཏན་རྫོགས།། སྨན་མཆོག་རྣམ་རྒྱལ་རྡོག་པོ་འདི།། གྲུབ་པའི་ལྷ་མོ་ཁྱོད་ལ་འབུལ།། བདག་ལ་བརྩེ་བས་ལེགས་བཞེས་ནས།། ཕྱི་རབས་སེམས་ཅན་དོན་ཕྱིར་དུ།། སྨོན་ལམ་ས་བོན་འདེབས་པར་མཛོད།། འབྲས་བཟང་སྨིན་པར་གདོན་མི་ཟ།། ཞེས་ཞུས་པ་བཞིན་ཡིད་འཕྲོག་མས་ཨ་རུ་ར་དེ་བསྣམས་ནས་རྒྱ་གར་རྡོ་རྗེ་གདན་དུ་བྱོན་ཏེ། ཕྱོགས་བཅུའི་རྒྱལ་བ་རབ་འབྱམས་སྤྱན་དྲངས་ལ་མཆོད་བསྟོད་ཀྱིས་མདུན་བསུས་ཏེ། བླ་མ་དཀོན་མཆོག་ཐུགས་རྗེ་དང་།། བདག་གི་ལྷག་བསམ་རྣམ་དག་མཐུས།། རྒྱུ་འབྲས་བསླུ་མེད་བདེན་སྟོབས་ཀྱིས།། སྨོན་ལམ་བཏབ་བཞིན་འགྲུབ་པར་ཤོག། བདུད་རྩིའི་མཆོག་གྱུར་རྣམ་རྒྱལ་འདི།། ཤར་ཕྱོགས་སྤོས་ངད་ལྡན་འཁྲུངས་ནས།། རྩ་སྡོང་ཡལ་ག་ལོ་མ་དང་།། པགས་པ་མེ་ཏོག་འབྲས་བུ་ཡིས།། འགྲོ་བའི་རུས་པ་ཤ་ཡན་ལག། རྩ་རྒྱུས་པགས་པ་དོན་སྣོད་དང་།། དབང་པོའི་ནད་རྣམས་སེལ་བྱེད་ཤོག། ཨ་རུ་རིགས་ལྔ་འཁྲུངས་པའི་གཙོར།། རོ་དྲུག་ནུས་བརྒྱད་ཞུ་རྗེས་གསུམ།། ཡོན་ཏན་བཅུ་བདུན་ཀུན་རྫོགས་པས།། ཉེས་གསུམ་མཚན་ཉིད་ཉི་ཤུ་དང་།། ཁྱད་པར་བཞི་ཡི་ནད་སེལ་ཤོག། སྨན་རྒྱལ་ནོར་བུ་དེ་ཡི་འཁོར།། ཨ་རུ་རིགས་བཞི་ལེགས་འཁྲུངས་ནས།། སྨན་སྦྱོར་གང་བྱེད་དེ་ཡི་གཙོར།། སྨན་མཆོག་འདི་ཉིད་བྱེད་གྱུར་ཅིག། སྤྲུལ་པའི་རི་བོ་སྤོས་ངད་ལྡན།། འཕགས་མིན་སོ་སྐྱེས་བགྲོད་པར་དཀའ།། དེ་ཕྱིར་ས་ཕྱོགས་གཞན་ཀུན་ཏུ།། རིགས་ལྔའི་ས་བོན་ཐེབས་སྨིན་ཤོག།  སྨན་མཆོག་རྣམ་རྒྱལ་འདི་ལ་སོགས།། ནུས་ལྡན་སྨན་རིགས་ཐམས་ཅད་ཀྱིས།། མི་མཇེད་འཇིག་རྟེན་ཁམས་ཁྱབ་ནས།། འགྲོ་བའི་ནད་ཀུན་ཞི་བྱེད་ཤོག། ཅེས་སྨོན་ལམ་བཏབ་བཞིན་སྐྱེས་པར་བཤད་པ་འདི་ནི་གཡུ་ཐོག་རྙིང་མའི་རྣམ་ཐར་ལས་བཤད་པ། དེ་ལྟར་ཡིད་འཕྲོག་ལྷ་མོའི་སྨོན་ལམ་གྱི་མཐུས་སྤྲུལ་པའི་གནས་ཆེན་ལྟ་ན་སྡུག་གི་ཤར་ཕྱོགས་སྤོས་ངད་ལྡན་གྱི་རི་ལ་ཨ་རུ་རྣམ་པར་རྒྱལ་བ་གཙོ་བོར་གྱུར་པའི་རིགས་ལྔ་ཤིང་གཅིག་ལ་ཚང་བར་སྐྱེས་ལ། རྣམ་པར་རྒྱལ་བ་ནི་སྤོས་ངད་ལྡན་ལས་ཡུལ་གཞན་དུ་མི་སྐྱེ་ཡང་། སྨོན་ལམ་གྱི་མཐུས་རིགས་གཞན་ནི་ཡུལ་ཕལ་ཆེར་དུ་སྐྱེ་བ་ཡིན།
     དེ་ཡང་འཚོ་མཛད་གཞོན་ནུའི་སྨན་གྱི་སྡེབ་སྦྱོར་ལས། རྒྱ་གར་གནས་བཟང་སེམས་ཅན་བསོད་ནམས་ཆེ།། འཕགས་པའི་བྱིན་རླབས་ཡིད་འཕྲོག་སྨོན་ལམ་མཐུས།། ཤར་ཕྱོགས་སྤྲུལ་པའི་རི་བོ་སྤོས་ངད་ལྡན།། སྨན་མཆོག་རྒྱལ་པོ་ཨ་རུ་རྣམ་རྒྱལ་འཁྲུངས།། དྲི་ཡིས་ཁྱབ་པའི་ས་ཕྱོགས་ནད་མེད་ཅིང་།། སྨན་པའི་རྒྱལ་པོས་བྱིན་རླབས་སྤྲུལ་པའི་སྨན།། རྒྱ་གར་ལི་ཡུལ་བལ་ཡུལ་ལ་སོགས་པའི།། ཡུལ་ཁམས་གཞན་དུ་སྨན་མཆོག་འདི་མི་སྐྱེ།། ཆ་འདྲ་ཙམ་རེ་སྨོན་ལམ་སྟོབས་ལས་འབྱུང་། དེ་ལ་ནུས་པའང་ཆ་འདྲ་ཡོད་པར་གསུངས།། ཞེས་དང་། གསོ་དཔྱད་ཕྲན་བུ་ལས། གསེར་མདོག་ཤ་ཆེན་འབིགས་བྱེད་དང་།། རྩ་སྙུང་རྩེ་སྙུང་ཟར་མ་རྣམས།། རྒྱ་གར་བལ་ཡུལ་གར་ཡང་སྐྱེ།། ཞེས་དང་།ཟུར་རྡོལ་ལས། ཡིད་འཕྲོག་མ་དེའི་སྨོན་ལམ་མཐུ་སྟོབས་ཀྱིས།། ས་ཕྱོགས་གཞན་དུ་ཆ་འདྲ་ཡོད་པར་སྲིད།། སྨན་སྡོང་འདི་ཡིས་ཁྱད་ཆོས་བཅོ་བརྒྱད་པོ།། ཨ་རུ་གཞན་རྣམས་ཡོན་ཏན་ལྡན་ན་ཡང་།། རང་རང་སྐབས་སུ་བབ་པའི་ཡོན་ཏན་ལས།། རྣམ་པར་རྒྱལ་བའི་ཡོན་ཏན་ཆ་འདྲ་བ།། ཆོས་ཀྱི་སྤྱན་ལྡན་མཁས་གྲུབ་དམ་པ་རྣམས།། སྨན་མཆོག་ཨ་རུའི་ཡོན་ཏན་བརྗོད་པ་ནི།། བདུད་རྩི་རྣམ་པར་རྒྱལ་བ་ཁོ་ནར་དགོངས།། མི་ཤེས་ཤེས་རབ་འཆལ་བའི་བླུན་པོ་རྣམས།། རྣམ་པར་རྒྱལ་བའི་ཁྱད་ཆོས་བཅོ་བརྒྱད་དེ།། ཨ་རུ་རིགས་བཞི་དག་ལ་ཚང་བར་འདོད།། རྨོངས་པའི་ཆོས་ལུགས་མཁས་རྣམས་བཞད་གད་གནས།། ཅི་ཕྱིར་རྣམ་པར་རྒྱལ་བའི་ཡོན་ཏན་རྣམས།། ཨ་རུ་རིགས་བཞི་དག་ལ་ཚང་ཞེས་དང་།། མཁས་པའི་ཡོན་ཏན་བླུན་རྨོངས་སྐྱེ་བོ་ལ།། ཚང་ཞེས་བརྗོད་དང་ཁྱད་པར་ཅི་ཞིག་ཡོད།། གསེར་དང་ར་གན་མཉམ་པ་ཇི་ལྟར་འདོད།། ཅེས་གསུངས་སོ།། ཟུར་མཁར་དྷརྨ་སཽ་མིས། ལྟ་ན་སྡུག་གི་ཤར་ཕྱོགས་སུ།། སྤོས་ངད་ལྡན་པའི་རི་བོ་ལ།། ས་བདག་ལག་པ་ཆེན་པོ་དང་།། ཆུ་ཡི་ལྷ་མོ་གཙང་ཆེན་གཉིས།། ཆགས་སྤྱད་སྐུ་ལ་འཁྱུད་པ་ལས།། ནུས་པ་ཟླ་མཚན་ས་ལ་འཁྱིལ།། ཨ་རུ་ར་ཡི་ནགས་ཚལ་འཁྲུངས།། རྒྱ་གར་ཡུལ་དུ་ཤིང་སྐྱེས་པ།། ཏྲ་ལ་ཧ་ཞེས་བྱ་བར་གྲགས།། བོད་ཀྱི་ཡུལ་དུ་ཤིང་སྐྱེས་པ།། ཀླུ་ཤིང་འོམ་བུ་ཞེས་བྱར་གྲགས།། རྩ་བས་རུས་པའི་ནད་རྣམས་སེལ།། སྡོང་པོས་ཤ་ཡི་ནད་རྣམས་སེལ།། ཤུན་པས་པགས་པའི་ནད་རྣམས་སེལ།། ཡལ་གས་རྩ་རྒྱུས་ནད་རྣམས་སེལ།། ལོ་མས་སྣོད་ཀྱི་ནད་རྣམས་སེལ།། མེ་ཏོག་དབང་པོའི་ནད་རྣམས་སེལ།། འབྲས་བུས་དོན་སྙིང་ནད་རྣམས་སེལ།། རིགས་ནི་རྣམ་པ་ལྔ་ཡོད་དེ།། ཞེས་གསུངས། རིགས་ལྔ་བཅས་སྐྱེ་ཚུལ་ཡང་། ཟུར་རྡོལ་ལས། སྡོང་པོའི་དབུས་ན་ཨ་རུ་རྣམ་པར་རྒྱལ།། ཤར་ཕྱོགས་འཇིགས་མེད་ལྷོ་ཕྱོགས་ཤ་མཐུག་དང་།། ནུབ་ཕྱོགས་འཕེལ་བྱེད་ཟླུམ་པོ་ཞེས་བྱ་དང་།། བྱང་ཕྱོགས་སྐེམ་པོ་སུལ་མང་རིམ་བཞིན་འཁྲུངས།། ཞེས་སོ།། སྐྱེ་ཚུལ་བཅས་ངོས་འཛིན་ཡང་། བྲང་ཏི་པས། དབུས་ཀྱི་ཕྱོགས་ཀྱི་ཤིང་རྩེ་ལས།། རྣམ་པར་རྒྱལ་བའི་འབྲས་བུ་འཁྲུངས།། ཁ་ནི་ཟུམ་ལ་གྲེ་བ་ཕྲ།། རྩ་བའི་གོ་སུལ་རེ་རེ་ལ།། ཉི་མའི་འོད་ཟེར་ཤར་བ་འདྲ།། ཤར་གྱི་ཕྱོགས་ཀྱི་ཤིང་རྩེ་ལས།། གསེར་མདོག་ཅེས་བྱའི་འབྲས་བུ་འཁྲུངས།། གསེར་གྱི་མདོག་ཅན་ངང་སྒོང་འདྲ།། སུལ་ནི་ལྔ་འམ་བརྒྱད་ཡོད་དོ།། ལྷོ་ཡི་ཕྱོགས་ཀྱི་ཤིང་རྩེ་ལས།། ཤ་ཆེན་ཞེས་བྱའི་འབྲས་བུ་འཁྲུངས།། སྦྲང་བུར་ཆངས་པར་བཅང་པ་འདྲ།། ནུབ་ཀྱི་ཕྱོགས་ཀྱི་ཤིང་རྩེ་ལས།། འབིགས་བྱེད་ཅེས་བྱའི་འབྲས་བུ་འཁྲུངས།། ནག་ཅིང་དཀྱིལ་དུ་རུས་པ་མེད།། བྱང་གི་ཕྱོགས་ཀྱི་ཤིང་རྩེ་ལས།། རྩེ་སྙུང་ཞེས་བྱའི་འབྲས་བུ་འཁྲུངས།། སེར་ནག་སུལ་ཅན་ལྕང་མོ་འདྲ།། ཨ་རུ་ར་དེ་རྣམ་ལྔ་པོ།། སོ་སོའི་ཤིང་ལས་སྐྱེ་བའང་ཡོད།། ཅེས་དང་། དྷརྨ་སཽ་མིས། ཨ་རུ་རྣམ་པར་རྒྱལ་བ་ནི། ཀུ་བའི་མཇུག་འདྲ་ཁྱད་པར་དུ།། བཀྲ་ཤིས་དོན་ཀུན་འགྲུབ་ཅེས་པ།། ཨ་རུའི་ནང་ན་ཨ་རུ་ཡོད།། བསྐྱོད་ན་ཁྲོག་ཁྲོག་ཟེར་བ་ཡོད།། དེ་ནི་ཡིད་བཞིན་ནོར་བུ་ཡིན།། རྣམ་པར་རྒྱལ་བ་དག་ཏུ་འདོད།། རབ་འབྲིང་ཐ་མའི་དབྱེ་བ་ནི།། ཀུ་བའི་མཇུག་འདྲ་རབ་ཏུ་བཤད།། གསུམ་འབྲེལ་དག་ཏུ་ཡོང་བ་དེ།། རྣམ་པར་རྒྱལ་བ་འབྲིང་དུ་བཤད།། གཉིས་འབྲེལ་རྣམ་རྒྱལ་ཐ་མ་ཡིན།། འཕེལ་བྱེད་ཟླུམ་པོ་ཞེས་བྱ་བ།། ད་ལྟ་གསེར་མདོག་ཅེས་སུ་གྲགས།། བདུད་རྩི་ཤ་མཐུག་ཅེས་བྱ་བ།། ཁ་དོག་དམར་སེར་དག་ཏུ་འདོད།། ད་ལྟ་ཤ་ཆེན་ཞེས་སུ་གྲགས།། སྐེམ་པོ་སུལ་མང་ཞེས་བྱ་བ།། མཆུ་སྙུང་ཞེས་སུ་བཤད་པ་ཡིན།། འཇིགས་མེད་ནག་པོ་གླ་རིལ་འདྲ།། འབིགས་བྱེད་དཀྱིལ་དུ་རུས་པ་མེད།། ད་ལྟ་ནག་ཆུང་དག་ཏུ་འདོད།། ཅེས་གསུངས། དེ་ལྟ་བུའི་ཨ་རུ་དེའི་ཁྱད་པར་གྱི་ཆོས་ཡང་།།རྩ་རྒྱུད་ལས། རོ་དྲུག་དང་ལྡན་པ། ནུས་པ་བརྒྱད་དང་ལྡན། ཞུ་རྗེས་གསུམ་དང་ལྡན། ཡོན་ཏན་བཅུ་བདུན་རྫོགས་པ།། ཞེས་བཤད་པ་དང་། བཤད་རྒྱུད་དུ། ཨ་རུ་ལན་ཚྭ་མ་གཏོགས་རོ་ལྔ་ལྡན།། ཞེས་ལན་ཚྭ་བའི་རོ་མེད།། དེ་མ་གཏོགས་པའི་རོ་ལྔ་ཡོད་ཅེས་པ་འདི་འགྲེལ་བྱེད་དག་སྣ་ཚོགས་གསུངས་པར་སྣང་ལ། ཁོ་བོས་ཀྱང་། མཁས་པར་ཞལ་བཞེས་པ་འགའ་ལ་དྲི་བ་ཕུལ་ཡང་ཐོག་འགྲོ་དོན་གསལ་གསུང་མཁན་མ་བྱུང་བས། དེ་ནི་ཁོ་བོས་དབྱེ་བར་བྱ་སྟེ། རོ་དྲུག་ལྡན་པར་བཤད་པ་ནི། ཡན་ལག་ནག་པོའི་རྒྱུད་ལས། ཨ་རུ་ར་ནི་རིགས་ལྔ་སྟེ། རོ་དྲུག་ནུས་པ་བརྒྱད་དང་ལྡན། ཞེས་དང་། བདུད་རྩི་བུམ་པ་ལས། རིགས་ལྔ་རོ་དྲུག་ནུས་པ་བརྒྱད།། ཞུ་རྗེས་གསུམ་ལྡན་ནད་རིགས་འཇོམས།། ཞེས་གསུངས་པ་ནི། ཨ་རུའི་རིགས་སྤྱིར་བཤད་པ་དང་གཙོ་བོའི་ཡོན་ཏན་བྱེ་བྲག་བཤད་དེ་སོ་སོར་མ་ཕྱེས་པར་སྡོམ་དུ་བཤད་པ་སྟེ། མི་ཕྱེ་བའི་དོན་ཡང་ལན་ཚྭ་མ་གཏོགས་ཐུན་མོང་ཡིན་ཕྱིར། རོ་དྲུག་ལྡན་སོགས་གསུངས་པ་དེ་ནི་ཨ་རུ་རྣམ་རྒྱལ་ཁོ་ན་ལ་གསུངས་པ་ཡིན་ལས་གཞན་ལ་མིན་ཕྱིར། རྩ་རྒྱུད་དུ་གསུངས་པ་ནི། རྣམ་པར་རྒྱལ་བའི་ཁྱད་ཆོས་ཡིན་ལ། གསེར་འོད་དུ། ཨ་རུ་ར་ནི་རྣམ་གཅིག་ལ།། རོ་ནི་རྣམ་པ་དྲུག་དང་ལྡན།།ཞེས་དང་། དྲང་སྲོང་ཙ་ར་ཀས། དེ་ཡང་རྣམ་པར་རྒྱལ་བ་རོ་ལྔ་ལྡན།། ཅུང་ཟད་ཙམ་ནི་ལན་ཚྭའི་བག་དང་བཅས།། བཀྲ་ཤིས་དོན་ལྡན་འདུ་བའི་ནད་རྣམས་སེལ།། ཞེས་དང་། ཨ་ཙ་རའི་རྡེ་སྐོར་ལས། ཨ་རུ་ར་ནི་རྣམ་གཅིག་ལ།། རོ་དྲུག་ནུས་བརྒྱད་ཡོན་ཏན་ལྡན།། ཞུ་རྗེས་གསུམ་ཚང་ནད་ཀུན་འཇོམས།། འདི་ནི་རྣམ་པར་རྒྱལ་བ། ཞེས་གསལ་བར་གསུངས་པས་རྣམ་རྒྱལ་གྱི་ཁྱད་ཆོས་རོ་དྲུག་ནི། མངར་བ། སྐྱུར་བ། ལན་ཚྭ་བ། ཁ་བ། ཚ་བ། བསྐ་བའོ།། ནུས་པ་བརྒྱད་ནི། ལྕི་བ། སྣུམ་པ། བསིལ་བ། རྟུལ་བ། ཡང་བ། རྩུབ་པ། ཚ་བ། རྣོ་བའོ།། ཞུ་རྗེས་གསུམ་ནི། མངར་བ། སྐྱུར་བ། ཁ་བའོ།། ཡོན་ཏན་བཅུ་བདུན་ནི། འཇམ་པ། ལྕི་བ། དྲོ་བ། སྣུམ་པ། བརྟན་པ། གྲང་བ། རྟུལ་བ། བསིལ་བ། མཉེན་པ། སླ་བ། སྐམ་པ། སྐྱ་བ། ཚ་བ། ཡང་བ། རྣོ་བ། རྩུབ་པ། གཡོ་བ། ནད་ཀུན་འཇོམས་པའི་དོན་ཡང་། བཤད་རྒྱུད་ལས། བཅུ་དང་བདུན་གྱིས་མཚན་ཉིད་ཉི་ཤུ་འཇོམས་གསུངས་པས་སྨན་གྱི་ཡོན་ཏན་བཅུ་བདུན་གྱིས་ནད་ཀྱི་མཚན་ཉིད་ཉི་ཤུ་འཇོམས་པ་སྟེ། ནད་ཀྱི་མཚན་ཉིད་ཉི་ཤུ་ནི།། རླུང་གི་མཚན་ཉིད་རྩུབ་ཅིང་ཡང་བ་དང་།། གྲང་ཞིང་ཕྲ་ལ་སྲ་ཞིང་གཡོ་བ་དྲུག། མཁྲིས་པའི་མཚན་ཉིད་སྣུམ་བཅས་རྣོ་ཞིང་ཚ།། ཡང་ཞིང་དྲི་མནམ་འཁྲུ་ཞིང་གཤེར་བ་བདུན།། བད་ཀན་མཚན་ཉིད་སྣུམ་ཞིང་གཤེར་བ་དང་།། ལྕི་རྟུལ་འཇམ་བརྟན་འབྱར་བག་ཅན་དང་བདུན།། ཞེས་སོ།། འཇོམས་ཚུལ་ནི། རླུང་ལ། འཇམ་པས་རྩུབ་པ་བཅོམ་པ་དང་། དེ་བཞིན་དུ། ལྕི་བས་ཡང་བ། དྲོ་བས་གྲང་བ། བརྟན་པས་གཡོ་བ། སྣུམ་པས་ཕྲ་བ་དང་། མཉེན་པས་སྲ་བ་བཅོམ། མཁྲིས་པ་ལ། སྐྱ་བས་སྣུམ་པ། རྟུལ་བས་རྣོ་བ། བསིལ་བས་ཚ་བ། ལྕི་བས་ཡང་བ། སླ་བས་དྲི་མནམ་པ། སྐམ་པས་འཁྲུ་བ་དང་། གཤེར་བ་འཇོམས། བད་ཀན་ལ། སྐྱ་བས་སྣུམ་པ། ཚ་བས་བསིལ་བ། ཡང་བས་ལྕི་བ། རྣོ་བས་རྟུལ་བ། གཡོ་བས་བརྟན་པ། རྩུབ་པས་འཇམ་པ་དང་། སྲ་བས་འབྱར་བག་ཅན་འཇོམས་པ། ཕྱི་རབས་པ་ཁ་ཅིག་ནི། འདི་བཞིན་གཉེན་པོ་མ་སྤྲད་པར།། ཡོན་ཏན་བཅུ་བདུན་ནད་ཀྱི་མཚན་ཉིད་ཉི་ཤུའི་གཉེན་པོར་མ་འདང་བས། དྲི་མ་མནམ་བའི་གཉེན་པོར་གཤེར་བ་དང་། འབྱར་བག་གི་གཉེན་པོར་གྱོང་བ་དང་། ཕྲ་བའི་གཉེན་པོར་སྦོམ་པ་གསུམ་གློ་བུར་དུ་བསྣན་ནས་ཡོན་ཏན་ཉི་ཤུ་ཁ་བསྐང་འདུག་པ་ཁྱབ་ཆུང་ལ། ཡོན་ཏན་བཅུ་བདུན་ལས་ལྷག་པའི་གཤེར་བ་གྱོང་བ་སྦོམ་པ་ཟེར་བ་འདི་འདྲ་མ་བཤད་པར་སྣོན་པ་མི་འཐད་ལ་སྣོན་ཡང་མི་དགོས་ཏེ། སླ་བ་ལས་གཤེར་བ་དོན་གཅིག་པས་མི་དགོས། རྩུབ་པ་དང་གྱོང་བ་དོན་གཅིག་པས་མི་དགོས། སྲ་བ་དང་གྱོང་པ་དོན་གཅིག་པས་མི་དགོས། ཨ་རུ་ར་གཞན་བཞི་ལ་དགོངས་ནས། བཤད་རྒྱུད་དུ། ཨ་རུ་ལན་ཚྭ་མ་གཏོགས་རོ་ལྔ་ལྡན།། ཞེས་དང་། ཡན་ལག་བརྒྱད་པར། ཨ་རུ་རོ་བསྐ་ཞུ་རྗེས་མངར། རྩུབ་ཅིང་ལན་ཚྭའི་རོ་མེད་ཀྱང་།། དྲོད་ཆེ་ཟས་འཇུ་ཡིད་གཞུངས་བྱེད།། ཞེས་གསུངས་པས་བཞི་པོ་ལ་ལན་ཚྭ་བའི་རོ་མེད་པ། ཨ་རུ་རོ་བསྐ་ཞེས་པ་ཡང་། བསྐ་བ་རྐྱང་པ་ཡིན་ཏེ། བསྐ་བ་ཤས་ཆེ་བ་ལས་རོ་གཞན་རྗེས་སུ་འབྲང་བ་ནི་སོ་སོའི་སྐབས་སུ་གསལ་བ། ལྔ་པོའི་ངོས་འཛིན་དང་དབྱེ་བ་སླར་ཡང་ནི། བཤད་རྒྱུད་དུ། དེ་ལ་རིགས་ལྔ་རྣམས་རྒྱལ་འཇིག་མེད་དང་།། བདུད་རྩི་འཕེལ་བྱེད་སྐེམ་པོ་ལྔ་ཡིན་ཏེ།། ཞེས་གྲངས་དང་། ངོ་བོ་ནི། རྣམ་པར་རྒྱལ་བ་ཀུ་བའི་མཇུག་མ་འདྲ།། ཞེས་དཔེར་མཛད་བཞིན་ཆག་ཚང་ཀུ་བ་ལྟར་སེར་ལ་དམར་མདངས་བཅས་མཇུག་མ་རིང་ལྟོ་བ་ལྡིར་བ། དེ་ཡང་རྣམ་པར་རྒྱལ་བ་ཆེ་བ་དངོས་ནི་ལྷ་ཡུལ་ནས་འཕོས་པའི་ནོར་བུ་ཡིན་པ་རྒྱལ་ཆེན་བསོད་ནམས་ཅན་རེ་རེ་ལས་མི་རྙེད་ལ། སྤོས་ངད་ལྡན་དུ་ཡང་ཤིང་གི་རྩེར་རེ་ཟུང་ལས་མི་འབྱུང་བ་བུམ་པའི་ཁར་འཇོག་པའི་དུང་ཆོས་འབྲིང་པོ་ཙམ་འབྱུང་བ་ཡང་རྒྱལ་ཕྲན་རྣམས་ཀྱིས་ཚགས་ནས་ཚོང་པས་ཁྱེར་དབང་མེད། གཞན་བཞི་མང་པོར་སྐྱེ་བ་ལོ་རེ་བཞིན་སྐྱེ་བས་མོད། རྣམ་རྒྱལ་ལོ་དུས་བསྐལ་པ་དགེ་བའི་དུས་མ་གཏོགས་ལོ་གཅིག་ཅིག་མི་འབྱུང་ཞེས་ཛོ་ཀི་རྣམས་སྨྲ་བར་འདུག། རྣམ་རྒྱལ་བསྟེན་པའི་ཕན་ཡོན་ཡང་། རླུང་མཁྲིས་བད་ཀན་འདུ་བའི་ནད་རྣམས་སེལ།། ཞེས་དང་། འཆང་བའི་ཕན་ཡོན་ནི། ཁྱད་པར་བཀྲ་ཤིས་དོན་ཀུན་འགྲུབ་པས་བཟང་།། ཞེས་སོ།། གཞན་བཞི་ནི། འཇིགས་མེད་ཟུར་ལྔ་མིག་ནད་གདོན་ལ་བསྔགས།། ཞེས་པ་ཟུར་ལྔ་པ་འཇོང་མོ། བདུད་རྩི་ཤ་མཐུག་སྐེམ་པོ་ཤ་འཕེལ་བྱེད།། ཅེས་ཤ་ཆེ་ལ་མཐུག་པ། འདྲ་དཔེར་ཡང་། ཤ་ཆེན་ཟན་རློན་ཆངས་བཅངས་འདྲ།། ཟེར། འཕེལ་བྱེད་ཟླུམ་པོ་བུམ་འདྲ་རྨ་ལ་བསྔགས།། ཞེས་བུམ་པའི་ལྟོ་བ་ལྟར་ལྡིར་བ་སྟེ་བ་རུ་རའི་དབྱིབས་ཅན། སྐེམ་པོ་སུལ་མང་བྱིས་པའི་མཁྲིས་ནད་སེལ།། ཞེས་ཤ་ཆུང་བས་སྐེམ་པོ་སྟེ་སུལ་མང་པོ་ཅན་ཏེ་འདི་རིགས་རྩ་བ་ཕྲ་རིངས་ལ་རྩ་སྙུང་རྩེ་མོ་ཕྲ་རིངས་ལ་མཆུ་སྙུང་ཟེར་བ་དབྱེ། དེ་ལྔ་ཀའང་གསེར་མདོག་འབའ་ཞིག་ཡིན་པར་གསུངས། ལར་ཨ་རུ་རྒྱ་གར་མ་ཐམས་ཅད་གསེར་མདོག་ལྟ་བུའི་ཁ་དོག་དང་རྩིང་ལ་ཤ་ཆེ་བ་ཤ་སྟག་གོ། བལ་པོ་སོགས་རོང་གཞན་དུ་སྐྱེ་བ་ནི་ཕལ་བ་སྟེ་ཞིབ་ལ་ཤ་ཆུང་མདོག་ནག་པ་ཁོ་ན། གང་ཡང་མ་སྨིན་པ་སྔོ་ཞིང་ཆུང་ལ་སྐྱུར་བ་དང་། རྔོས་ཕོག་པས་ཚིག་ལ་གསོབ་པ་རུལ་བ་རྣམས་ནི་ངན་ལ། ཤ་ཆེ་བ་རུས་སྲ་བ་བཅད་འཕྲོ་འོད་དང་ལྡན་ལ་མཁྲེགས་པ། དབྱིབས་རྩིང་བ་བཟང་། ཡང་ཨ་རུ་ར་རིགས་བདུན་དུ་དབྱེ་བ་ནི། བདུད་རྩི་བམ་པོ་བརྒྱད་པ་ལས། ལྷ་རྫས་དགེ་བ་ཨ་རུ་ར།། རིགས་བདུན་ས་ལ་ལྷུང་བ་ནི།། བརྒྱ་བྱིན་བདུད་རྩི་འཐུངས་པའི་ཚེ།། ཐིགས་པ་བདུན་ནི་ས་ལ་ལྷུང་།། རླུང་གིས་ཁྱེར་ཏེ་ས་ལས་སྐྱེས།། བདུད་རྩིའི་གཙོ་བོར་རབ་ཏུ་གྲགས།། ཞེས་དང་། ཀླུ་སྒྲུབ་ཀྱིས། སྒྲ་གཅན་བདུད་རྩི་རྐུས་པ་དང་། སྐེ་བཅད་ས་ལ་འཛག་གྱུར་པའི།། བདུད་རྩི་ཐིགས་པ་སར་ལྷུང་བ།། རླུང་གིས་རྣམ་པ་བདུན་དུ་ཕྱེས།། ཞེས་དང་། བདུན་པོ་དེ་ཡང་སོ་སོར་བཤད་པ་ནི།། བདུད་རྩི་སྙིང་པོར། ཨ་རུ་ར་ནི་རྣམ་པ་བདུན།། རྣམ་པར་རྒྱལ་བ་བུམ་གྱི་མགྲིན།། གསོ་བྱེད་བདུད་རྩི་འཇིགས་མེད་དང་།། འཕེལ་བྱེད་སྐེམ་པོ་རྣམ་བདུན། དེ་དག་རོ་ནི་རྣམ་ལྔར་ལྡན།། ཞེས་སོ།། དེ་བདུན་ཡང་ངོས་འཛིན་པ་ནི།། གསོ་དཔྱད་ཕྲན་བུ་ལས། རྣམ་པར་རྒྱལ་བའི་ཁ་དོག་ནི།། ཏྲི་བྱ་ཁ་ལྟར་ལྟ་ན་སྡུག། མགྲིན་པ་ཕྲ་ལ་ལྟོ་བ་ལྡིར།། འཇའ་ཚོན་སྣ་ལྔ་འཁྱུག་པ་ཡོད།། གསེར་མདོག་སེར་ལ་ལྕི་བར་གནས།། ཤ་ཆེན་མཐུག་ལ་ཤ་ཡང་ཆེ།། འབིགས་བྱེད་དཀྱིལ་དུ་རུས་པ་མེད།། རྩ་སྙུང་རྩ་ངོས་རིང་བ་ཡིན།། དེ་བཞིན་མཆུ་སྙུང་མཆུ་ངོས་རིང་།། དེ་གཉིས་ཡོད་ན་ཟར་མར་འདོད།། ཅེས་སོ།། བདུན་པོ་དེའི་བྱེད་ལས་གང་ཞེ་ན། བདུད་རྩི་བམ་པོ་བརྒྱད་པ་ལས། རྣམ་རྒྱལ་ཀུ་བའི་མཇུག་མ་འདྲ།། བུམ་གྱི་མགྲིན་ནི་སྨན་དུ་ཤིས།། གསོ་བྱེད་ཀྱིས་ནི་དབང་པོ་གསོ།། འཇིགས་མེད་ཀྱིས་ནི་སྨྱོ་འདྲེ་ཐུབ།། རྩི་བྱེད་ཀྱིས་ནི་རྨ་རྣམས་འདྲུབ།། སྐྱེད་བྱེད་ཀྱིས་ནི་སྲིད་འཕེལ་བྱེད།། འབེབས་བྱེད་ཀྱིས་ནི་ནད་ཀུན་བཤལ།། གསེར་འདྲ་ཆུར་བཅུག་གཏིང་འགྲོ་བདུན།། ཞེས་གསེར་མདོག་ཆུའི་སྣོད་དུ་བསྐྱུར་ཚེ་གཏིང་པར་བྱིང་བ་དགོས། རྗེ་རང་བྱུང་རྡོ་རྗེས། ཨ་རུ་ར་ལ་རིགས་བདུན་ཡོད།། བཅུད་ཀྱིས་ལེན་པར་ཤ་ཆེན་ཏེ།། དྲི་དང་བཤལ་ལ་སྙུང་པོ་མཆོག། རྣམ་རྒྱལ་འཇིགས་མེད་གདོན་ལ་བསྔགས།། འཚོ་བ་གཙང་བ་འཕེལ་བ་གསུམ།། ཐ་མར་ཤེས་བྱ་དེ་རྣམས། ཞེས་གསུངས་སོ།། ཡང་དེ་ལས་ཕྲ་བ་རིགས་བརྒྱད་དུ་ཕྱེ་བ་ནི། དྲང་སྲོང་ཙ་ར་ཀའི་བདུད་རྩི་བམ་པོ་བཞི་པར། ལྷ་མིན་གྱིས་བརྐུས་བདུད་རྩི་ཟེགས་མ་ནི། ས་ལ་ལྷུང་བ་རླུང་གིས་བརྒྱད་དུ་ཕྱེས།། དེ་ནི་ཧ་རི་ཏ་ཀ་བརྒྱད་གྱུར་པ།། རྣམ་པར་རྒྱལ་བ་བདུད་རྩི་གསེར་མདོག་ཅན།། འཆི་བ་མེད་དང་ཀུན་ནས་ཤ་རྒྱས་དང་།། འཇིགས་མེད་འཕེལ་བྱེད་སྐེམ་པོ་མཆུ་རིངས་བརྒྱད།། དེ་ཡང་རྣམ་པར་རྒྱལ་བ་རོ་ལྔ་ལྡན།། ཅུང་ཟད་ཙམ་ནི་ལན་ཚྭའི་བག་དང་བཅས།། བཀྲ་ཤིས་དོན་ལྡན་འདུ་བའི་ནད་རྣམས་སེལ།། བདུད་རྩི་སྐྱུར་ཞིང་དྲོད་སྐྱེད་གསེར་མདོག་འབྱིན།། འཆི་མེད་མངར་ཁ་མཁྲིས་སེལ་མིའི་ཚེ་རིང་དུ་འཚོ་ཞིང་གནས།། ཤ་ཆེན་མངར་སྐྱུར་ལུས་ཀྱི་ཤ་ཚིལ་སྐྱེད།། འཇིགས་མེད་ཚ་ཁ་གདོན་དང་མིག་ནད་སེལ།། འཕེལ་བྱེད་མངར་བག་རྨ་རྣམས་འདྲུབ་ཅིང་བརྟས།། སྐེམ་པོ་ཁ་བསྐ་བྱིས་པའི་ནད་གདོན་འཇོམས།། མཆུ་རིང་མཆུ་ནི་མངར་ཁ་ནད་རྣམས་འཁྲུ།། རྩ་བ་བསྐ་ཚ་སྐྱུར་བས་འཁྲུ་བ་གཅོད།། ཅེས་གསུངས་སོ།། དེ་ལྟར་ཨ་རུ་སོ་སོར་རོ་ནུས་ཕྱེ་ལ་གང་ལ་གང་དམིགས་པའི་གཏོང་ལུགས་དགོས་ལ། དེ་ཙམ་དུའང་མ་ཟད་ཤིན་ཏུ་ཕྲ་བའི་སྒོ་ནས་ཨ་རུ་ར་རེ་རེ་ལའང་ཕྱི་ནང་སོགས་ཀྱི་ཁྱད་པར་ལ་རོའི་དབྱེ་བ་ཡང་ཡོད་པ་འབྱེད་ནས་གཏོང་ལུགས་དགོས་ཏེ། བདུད་རྩི་སྙིང་པོར། དེ་ཡི་བྱེ་བྲག་གནས་པའི་ས།། ཁ་བ་དང་ནི་ཚ་བའི་རོ།། དེ་ཡི་རྩ་རྩེ་གཉིས་ལ་གནས། སྐྱུར་བའི་རོ་ནི་དབུས་ཀྱི་ཤ། བསྐ་བ་ཡང་ནི་ཕྱི་ཤུན་ལ།། མངར་བ་རུས་ལ་ཉེ་ལས་བྱུང་།། ཞེས་དང་།བདུད་རྩི་བུམ་པར། རོ་དྲུག་བསྟན་པ་འདི་ལྟ་སྟེ།། དཀྱིལ་དང་མཐའ་ནས་མངར་སྐྱུར་བ།། སུལ་ནི་ཁ་ལ་རྩ་རྩེ་རྩུབ།། ཞབས་ནི་བསྐ་ལ་ལན་ཚྭ་བྲོ།། ཞེས་གསུངས་པའི་ཕྱི་མ་འདི་རྣམ་པར་རྒྱལ་བ་ལ་དགོངས་པ། དེ་ལྟ་བུའི་དབྱེ་བ་ཤེས་པས་ཨ་རུ་སྨན་ལ་གཏོང་ཚེ། སྤྱང་ལྟོགས་ལུག་རོ་དང་འཕྲད་པ་ལྟར་གར་ཟིན་གང་ཐོད་ནས་མི་གཏོང་བར། སྨན་པས་ནད་པ་དྲང་པོར་བཅོས་བསམ་པ་རྣམས་ཀྱིས་ཚིག་འདི་ཡིད་ལ་ངེས་པར་གྱིས་ལ། ཨ་རུ་ཕྱག་ཏུ་ཟིན་པ་ནས་ཚིག་འདི་ཞེ་གཤར་གྱིས་ལ་དྲན་པ་ཁོང་དུ་ཡོད་པ་ལྟར་མཛོད་ལགས།རླུང་ནད་རྐྱང་པར་རྩེ་མོ་ཚ་བས་གཏོང་།། མཁྲིས་ལྡན་རླུང་ལ་མངར་བས་རུས་ཉེ་གཏོང་།། བད་ལྡན་རླུང་ལ་སྐྱུར་བས་དབུས་ཤ་གཏོང་།། མཁྲིས་ནད་རྐྱང་པར་རྩ་བ་ཁ་བས་ཐོངས།། མཁྲིས་པ་བད་ལྡན་བསྐ་བས་ཕྱི་ཤུན་གཏོང་།། བད་ཀན་རྐྱང་པར་ཚ་བས་རྩེ་མོ་གཏོང་།། བད་མཁྲིས་ལྡན་ལ་བསྐ་བས་ཕྱི་ལྤགས་སམ།། རྣམ་པར་རྒྱལ་བའི་རྩ་བ་ལན་ཚྭ་གཏོང་།། འདུས་པའི་ནད་ལ་ཀུན་ཚང་གཏོང་བ་ཡིན།། དེར་ལྡོག་སྙུང་པོའི་རྩེ་མོ་སྦྱོང་ལ་གཏོང་།། འཁྲུ་བ་གཅོད་ན་རྩ་སྙུང་གཏོང་བ་གཅེས།། ཅེས་པ་འདི་ནི་ཁོ་བོས་ཚིགས་སུ་བཅད་པ། དེར་ཡང་ནམ་མཁའི་མཚན་འཆང་བས།། རྩེ་ཚ་བ་དང་ཤུན་ལྤགས་བསྐ་བས་རླུང་སེལ།། རུས་ཉེ་མངར་བས་མཁྲིས་པ་སེལ། རྩ་བ་ཁ་བས་བད་ཀན་སེལ། དབུས་སྐྱུར་བས་ཆུ་སེར་སེལ། དེ་ཀུན་སྤྱིར་འདུས་པས་ལུས་ཀྱི་རྒས་ནད་སེལ། འགྲུབ་ནས་ཚེའི་རིག་འཛིན་བརྙེས་པས་དུས་མ་ཡིན་པའི་འཆི་བ་སེལ། ཞེས་གསུངས། ཁོ་བོའི་མྱེས་རབས་གོང་བྱུང་རིན་པོ་ཆེ་ཙན་པ་ཤི་ལ་ཧས། ཨ་རུ་རོ་ལྔ་ལན་ཚྭ་མེད་ཀྱང་དྲོ།། མངར་དང་ཁ་བས་རླན་ཅིང་འཁྲུ་བར་བྱེད།། སྐྱུར་དང་ཚ་བས་གྲང་རླུང་ནད་ཀུན་སེལ།། ཕྱི་ཤུན་པགས་པས་སྐེམ་པར་བྱེད་པ་ཡིན།། ཞེས་གསུངས། ཡང་ཨ་རུ་ར་རྩ་རྩེ་སྙུང་པོ་གཏོང་བ་འདིར་ཡང་། འཁྲུ་བར་བྱེད་པ་དང་། འཁྲུ་བ་གཅོད་པར་བྱེད་པ་གཉིས་ཀ་ཨ་རུ་ར་ལ་ཚང་བས། དེ་གོ་མི་འབྱེད་པར་སྨན་པ་ཕལ་ཆེར་ནི་གོ་བའི་ཤེས་རབ་གོང་མའི་ཞལ་རྒྱུན་གང་ནས་ཀྱང་ཤིན་ཏུ་དམན་པའི་བདག་ཉིད་ཁོ་བོ་དང་སྐལ་བ་མཉམ་པས་རིག་པ་འདིར་ཐ་ཆད་པ་དག་ནི་ཨ་རུའི་མགོ་མཇུག་ཀྱང་མི་འབྱེད་པར། གང་རིང་བ་ལ་མཆུ་སྙུང་ཞེས་འབོད་པ་མཐོང་བས་དམན་པ་བདག་གིས་ཀྱང་དམན་པ་བདག་འདྲ་ལ་མཆི་མ་འཁྲུགས་པར་འགྱུར་ཏེ། དེ་ལ་དབང་མེད་སྙིང་རྗེས་འདི་ཟློ། ཁྱོད་དག་ལེགས་པར་གཟིགས་དང་། ཨ་རུའི་རྩེ་མོ་མཁྲང་ལ་ཕུག་རྡུགས་པ་དང་། རྩ་བ་སྐྱེས་པའི་ཤིང་གི་ངར་པ་གོག་ཤུལ་ཡོད་པས་གསལ་མོད། དེས་ན་རིང་ཐུང་ལ་ངེས་པ་མ་མཆིས། འོ་ན་རྩ་རྩེ་ནོར་བ་ལ་སྐྱོན་ཅི་ཡོད་སྙམ་ན། བཤད་དེ། ཨ་རུའི་རྩེ་མོ་ཕུག་རྡུགས་པ་ངོས་ལ་རོ་ཁ་མངར་ཤས་ཆེ་བས་འཁྲུ་བར་བྱེད་དེ། རྒྱུ་མཚན། རྒྱུད་ལས། ཐུར་འགྲོ་ས་དང་ཆུ་ལས་འབྱུང་བའི་ཕྱིར།། ཞེས་བཞིན། ས་ཆུ་གཉིས་གྱེན་དུ་བཏེག་ཀྱང་རང་གཤིས་ཀྱི་ནུས་པས་ཐུར་དུ་འབབ་པ་ལས་མེད་པ་ནི། ཨ་རུ་རྩ་བ་ནས་མེ་རླུང་གི་ནུས་པ་གྱེན་དུ་འབར་བས། ལྕི་བ་ས་དང་རླན་པ་ཆུ་བཅས་གྱེན་དུ་འདེད་པར་བྱས་པས་འབྲས་བུ་དེ་རབ་ཏུ་རྒྱས་པར་བྱས། རང་ལྗིད་ཀྱིས་རྩེ་མོ་ཐུར་དུ་གུག་ཚེ་ས་ཆུའི་རང་བཞིན་རང་ལྗིད་ཀྱིས་མཆུ་སྣེར་མར་ལྷུང་བས་ས་དང་ཆུས་བསྐྱེད་པའི་རོ་མངར་བ་ཤས་ཆེ་བ་དང་། ཆུ་རླུང་གིས་བསྐྱེད་པའི་རོ་ཁ་བ་ཡང་ཡོད་པས། མངར་བའི་ཆ་དེ་ས་ཆུས་བསྐྱེད་པ་ལ་ནུས་པ་སྣུམ་ལྕི་འཇམ་བརྟན་སླ་བསིལ་རྟུལ་མཉེན་བརྒྱད་དང་ལྡན་ལ། ཁ་བའི་ཆ་དེ་ཆུ་རླུང་གིས་བསྐྱེད་པས། ནུས་པ་སླ་བསིལ་རྟུལ་མཉེན་ཡང་རྩུབ་གཡོ་བ་བདུན་དང་ལྡན་ཏེ། མངར་ཁ་གཉིས་ཀྱི་ནུས་པ་བཅོ་ལྔ་པོ་དེ་རྫས་གཅིག་གི་སྟེང་དུ་ཚོགས་པས། སླ་བསིལ་རྟུལ་མཉེན་བཞི་གཉིས་ཀ་ལ་ཡོད་པ་འཕྲད་པས་གཅིག་གྲོགས་གཅིག་གིས་བྱེད་པས་སྟོབས་ཆེར་གྱུར་ལ། མངར་བའི་ལྕི་འཇམ་བརྟན་གསུམ་ཐོག་མའི་ནུས་པ་ཡིན་པས། ཁ་བའི་ཐ་མའི་ཡང་རྩུབ་གཡོ་གསུམ་བཅོམ་པས་བཤལ་མི་འབབ་པར་བྱེད་ནས་གྱེན་དུ་འདེགས་བྱེད་ཀྱི་དགྲ་རླུང་རྩུབ་པ་སོགས་མཚན་ཉིད་དྲུག་ལྡན་དེ་མི་ལྡང་བར་བྱས་པས། སྦྱོང་སྨན་རྣོ་ལ་འཇམ་པའི་རྒྱུ་མཚན་དུ་གྱུར་པའོ།། དེས་ན་ཀླུ་རྒྱུད་ལས། མཆུ་སྙུང་བྱང་མ་ཁ་ཤོར་འདྲ།། ཞེས་དང་། ཕྱི་རྒྱུད་དུ། དེད་དཔོན་ཨ་རུ་མཆུ་རིངས་དན་རོག་དང་། ཞེས་དང་། ལྟོ་བ་སྲ་ན་ཨ་རུ་མཆུ་རིངས་མུར།། ཞེས་དང་།འཁྲུ་བའི་ཤུགས་དལ་ཨ་རུ་མཆུ་རིངས་ལྕག ཅེས་འབྱུང་བས་སོ།། དེས་ན་རོ་ནུས་བྱེད་ལས་འདི་ཤེས་བཞིན་ཨ་རུའི་མཆུ་འཁྲུ་གཅོད་ལ་བཏང་ན་ཆོད་ཨེ་སྲིད། ཕན་པ་ལས་གནོད་པ་ཆེ་བར་མི་འཛེམ་མམ་གཞིག་པ་གནང་དང་། ཡང་བཤད་དེ། མཆུ་རིངས་ཀྱི་རྩ་བ་ཤིང་ལ་ཟུག་པ་ངོས་ལ། རོ་བསྐ་བ་དང་ཚ་སྐྱུར་ཤས་ཆེ་བས་འཁྲུ་བ་གཅོད་དེ། རྒྱུ་མཚན། རྒྱུད་ལས། གྱེན་འདྲེན་སྨན་ནི་མེ་དང་རླུང་ཡིན་ཏེ།། ཞེས་བཞིན། མེ་རླུང་གཉིས་ཐུར་དུ་བུབ་ཀྱང་རང་གཤིས་ཀྱི་ནུས་པ་གྱེན་དུ་འབར་བ་ལས་མེད་ཕྱིར། མེ་རླུང་གི་ནུས་པ་གྱེན་དུ་ཕྱུར་པ་ཨ་རུའི་རྟིང་པ་ནས་ཡར་འགྲོ་བས་འབྲས་བུ་རྒྱས་པར་བྱེད་པ་སྟེ། བསྐ་བའི་ཆ་ནི་ས་རླུང་གིས་བསྐྱེད་པས། དེ་ལ་ནང་འཆམས་པར་བྱས་པས། གྲང་རྟུལ་སྐམ་རྩུབ་ལྔའི་ནུས་པ་ཡོད་ལ། ཚ་བའི་ཆ་ནི་མེ་རླུང་གིས་བསྐྱེད་པས། ཡང་རྩུབ་རྣོ་ཚ་སྐྱ་གཡོ་སྐམ་པ་བདུན་དང་ལྡན་ལ་སྐྱུར་བའི་ཆ་ནི། མེ་ས་གཉིས་ཀྱིས་བསྐྱེད་པས། ཚ་རྣོ་རྩུབ་གཡོ་སྣུམ་ལྕི་བརྟན་སྐམ་བརྒྱད་དང་ལྡན་པའོ།། རོ་འདི་གསུམ་ཀ་ལ་སྐམ་པའི་ནུས་པ་ཡོད་པ་རྫས་གཅིག་གི་སྟེང་དུ་ཚོགས་པས། གཅིག་གྲོགས་གཅིག་གིས་བྱེད་པས་མཆོག་གི་སྟོབས་ཀྱིས་འཁྲུ་བའི་སླ་གཤེར་སྐམ་པར་བྱེད་དེ། བསྐ་བ་ལ། ཊཱཀཱམུན་སེལ་སྒྲོན་མེ་ལས། སྐམ་པ་ནང་འཕྲད་ཤིན་ཏུ་སྐམ།། ཞེས་དང་། ཤིན་ཏུ་སྐམ་ཕྱིར་འཁྲུ་མི་སྲིད།། ཅེས་དང་། ཚ་སྐྱུར་གཉིས་ལ། དེ་ཕྱིར་འཁྲུ་གཅོད་ཚ་སྐྱུར་མང་།། ཞེས་དང་། ཀླུ་རྒྱུད་ལས། ཐུགས་ཀར་དོམ་དང་རྩ་སྙུང་གཉིས།། རྩ་སྡོམ་འཁྲུ་གཅོད་ནུས་པ་མཚུངས།། ཞེས་གསུངས། དེས་ན་རོ་ནུས་བྱེད་ལས་འདི་ཤེས་བཞིན་སྦྱོང་སྨན་དུ་བཏང་ན་འཁྲུ་ཨེ་སྲིད་སོམས་དང་། ཕན་པ་ལས་གནོད་པ་སྟོབས་མི་ཆེ་འམ། ལར་སྨན་ཚད་ལྡན་ཞིག་མཛད་ན་རྡེའུ་འགྲེལ་རྒྱས་ཚད་བྱ་དགོས་པ་མི་མཛད་ཀྱང་ཨ་རུ་རྡོག་པོ་གཅིག་གི་རྡེའུ་འགྲེལ་མ་མཛད་པས་སྨན་པ་ཡོད་ཚོད་དུ་མི་འདུག། འདི་བཞིན་སྨན་སྣ་རེ་ལ་བྲི་བཤད་ཉབ་ཉོབ་འདི་ལྟར་ན་སྨན་སྣ་བརྒྱ་ཕྲག་མང་པོའི་འགྲེལ་པ་ཐོག་མཐའ་མེད་པར་ཤེས་ཀྱང་འདི་ནི་གནད་ཀྱི་སྐབས་སུ་བབས་པ་དང་། འདིས་འགྲེས་པའི་རིགས་ཀྱིས་གཞན་དག་ཅུང་གོ་བར་ཕན་སེམས་དཀར་པོས་སྤྲོས་པ་མང་སྐྱོན་དུ་མི་འགྲོ་བར་སེམས། ཡང་ཨ་རུའི་ཆེ་བ་ནི། དྷརྨ་སཽ་མིས། ལྷ་རྣམས་ཀུན་གྱི་བདུད་རྩི་ཨ་རུ་ར།། དེ་ཕྱིར་ཨེ་ལའི་རྒྱལ་པོ་ཟེར།། གནོད་སྦྱིན་རྣམས་ཀྱི་ནོར་བུ་སྟེ།། དེ་ཕྱིར་གཙུག་གི་ནོར་བུ་ཟེར།། མི་རྣམས་ཀུན་གྱི་ནད་སེལ་སྨན།། དེ་ཕྱིར་སྨན་མཆོག་རྒྱལ་པོ་ཟེར།། ཀླུ་རྣམས་ཀུན་གྱི་མྱོས་སེལ་རྩི།། དེ་ཕྱིར་ཤིང་སྒོང་ཟུར་མང་ཟེར།། འགྲོ་དྲུག་སྡུག་བསྔལ་སྐྱོབ་པའི་མ།། དེ་ཕྱིར་ཤིང་གི་ལྷ་མོར་གྲགས།། ཞེས་གསུངས། ངེས་ཚིག་ནི། ཙ་ར་ཀའི་འགྲེལ་པ་ལས། ཨ་ཞེས་བྱ་བ་ཡི་གེ་ཀུན་གྱི་མཆོག། རླུང་མཁྲིས་བད་ཀན་ལས་གྱུར་ནད་རྣམས་སེལ།། རུ་ཞེས་བྱ་བ་ཤ་རུས་པགས་པར་ལྡན།། ཉེས་པ་རྣམ་གསུམ་སེལ་བར་བྱེད་པ་ཡིན།། ར་ཞེས་བྱ་བ་བསེ་རུ་ལྟ་བུ་སྟེ། ལུས་ཟུངས་བདུན་གྱི་ནད་རྣམས་སེལ་བར་བྱེད། ཨ་རུ་ར་ཞེས་དེ་ཕྱིར་བརྗོད། ཅེས་གསུངས་སོ།། ཨ་རུའི་མིང་གི་རྣམ་གྲངས་མངོན་བརྗོད་ནི། རྒྱ་གར་དང་བོད་སྐད་སྤེལ་བ་སྟེ། བི་ཛ་ཡ། རྣམ་པར་རྒྱལ་བ། ཨ་བྷ་ཡ། འཇིགས་མེད། ཨ་མྲྀ་ཏ། འཆི་མེད་དམ་བདུད་རྩི། ཝརྔྷ་ཀ་ར། འཕེལ་བྱེད། ཀྲྀ་ཤཱ་ལཱ་ཀཿ། སྐེམ་པོ། ཀྲྀ་ཤཱ། སྐེམ་པོ། མ་ཧཱ་བ་ལམ། ཤ་ཆེན། ཨ་རོ་ཧ་དཱིརྒྷ། མཆུ་སྙུང་། དཱིརྒྷ་མརྔྷ་ཐ། མཆུ་རིངས། མཱུ་ལཱ་ར་རཱ། རྩ་སྙུང་། མཱུ་ལ་དཱིརྒྷ། རྩ་རིང་། ཀུམྦྷ་ཀཎྚྀ། བུམ་མགྲིན། ཛ་ཝནྟི། འཚོ་བྱེད། ཨ་བྱ་ཐཱཿ། ནད་སེལ། བ་ཡ་སྠོཿ། ན་ཚོད་གནས། སཱི་ཏ་ནཾ། ཚི་ཅན། ཧ་རཱི་ཏ་ཀཱི། ཚད་པའི་མདངས་འཕྲོག མ་ཧཱ་བ་ཏི། གསེར་ལྡན། སོ་ན་བརྞ། གསེར་མདོག ར་སཡ་ན། བཅུད་ལེན། ཕ་ལཱཿ། འབྲས་བུ་ཅན། ཤི་བཱ། ཞི་བ། ཙི་ཏ་ཀཱི། སེམས་བྱེད།ཤྲེ་ཡ་སཱཾ། དགེ་ལེགས་ཅན། དྷ་ནྱཱ། དཔལ་ཡོན་ཅན། ཤ་ཀྲ་པྲྀཥྚཱཿ། བརྒྱ་བྱིན་སྤྲོས། པྲྀ་ཎི། ནང་འདོར། ཧྭ་བ། བདེ་བྱེད། ཨ་མོ་གྷ། དོན་ཡོད། སྭོ་བ་ནཱི། དག་བྱེད། དི་ནྱཱཿ། ལྷ་རྫས། ཀཱ་ཡསྠོ། ལུས་གནས་བྱེད། པྲ་མ་ཐཱ། ནད་རབ་འཇོམས། རས་བ་ཏི། རོ་ལྡན། ས་མཱརྠ་ཀཾ ནུས་ལྡན། ར་ས་ཀསྐ་ལ། རོ་བསྐ། ཀ་ཥྭ་ཡ་ཀཾ བསྐ་ཤས་ལྡན། རཱ་ཛ་ཧུ་ཏི་ར། རྒྱལ་པོ་སྐེམ་པོ་རྣམས་ཟེར་ལ། གབ་མིང་དུ་ཡང་། ཨ་བྷྱ་དྷ། ཨེ་ལ། གསེར་རོག གསེར་སྒོང་ཟུར་མང་། ཤིང་སྒོང་སེར་པོ། ཤིང་གི་ནོར་བུ། སྨན་མཆོག་རྒྱལ་པོ། དུག་འཇོམས། དུག་སེལ། རྒྱ་ནག་སྐད་དུ། འུ་འུད། ཕྲོམ་གྱི་སྐད་དུ། ཨ་ལི་མེ་ཞེས་ཟེར། ནག་ཆུང་ལ་ཀུན་དགའ་ཡང་ཟེར། འཁྲུངས་དཔེར། ཨ་རུ་ར་ཞེས་བྱ་བའི་ཤིང་།། སྡོང་པོ་ཆེ་ལ་ལོ་མ་མཐུག། མེ་ཏོག་སེར་པོའི་འབྲས་བུ་ལ།། རིགས་ནི་བརྒྱད་དམ་བདུན་ནམ་ལྔ།། རོ་ནི་དྲུག་དང་ལྡན་པ་སྟེ།། ནུས་པས་ནད་ཀུན་སེལ་བར་བྱེད།། ཅེས་པ་ལྟར། ཤིང་སྡོང་ཆེ་ལ་ཕྱི་སྐོགས་མདོག་སོགས་སྟར་གའི་སྡོང་པོ་འདྲ་བའི་བར་ཤུན་ལྗང་སེར། ལོ་མ་ལྗང་གུ་མཐུག་པ། མེ་ཏོག་སེར་པོ་འཆར་ལ། འབྲས་བུ་ནག་སེར་རིགས་གཉིས།ནག་པོ་དཀྱུས་མ་རིགས་གཅིག་དང་། སེར་པོར་གོང་བཞིན་དབྱེ་རིགས་ཡོད། འདྲ་ཡིག་ལས། ཨ་རུ་ར་ནི་ཡུངས་ཆུང་སྐམ་པོ་འདྲ།། ཞེས་དང་། འདྲ་དཔེ་ལས། རྣམ་རྒྱལ་མཇུག་རིང་ཀུ་བ་འདྲ།། གསེར་མདོག་གསེར་གྱི་སྒོ་ང་འདྲ།། ཤ་ཆེན་སྦལ་པ་འགྲངས་པ་འདྲ།། འཇིགས་མེད་སྦལ་སྒོང་ལྕོང་མོ་འདྲ།། འཕེལ་བྱེད་སེ་འབྲུའི་གང་བུ་འདྲ།། སྙུང་པོ་རིལ་བ་སྤྱི་བླུགས་འདྲ།། ཞེས་གསུངས་སོ།།
     མིང་དོན་བརྡ་སྤྲོད་རྣམ་ལྔ་ལས། ཨ་རུ་ར་ནི་གསེར་མདོག་ཐོན།། ཤ་རྒྱས་ཁེངས་པ་བཟང་བ་ཡིན།།
     སྨན་མིང་རྒྱ་མཚོ་ལས། ཨ་རུ་ར་ལ་རིགས་བདུན་ཡོད།། བཅུད་ཀྱིས་ལེན་པ་ཤ་ཆེན་ཏེ།། དྲི་དང་བཤལ་ལ་སྙུང་པོ་མཆོག། རྣམ་རྒྱལ་འཇིགས་མེད་གདོན་ལ་བསྔགས།། འཚོ་བ་རྩངས་པ་འཕེལ་བ་གསུམ།། ཐ་མ་ཤེས་བྱ་དེ་རྣམས།
     སྨན་སོ་སོའི་མངོན་བརྗོད་དང་ངོས་འཛིན་ཤེལ་དཀར་མེ་ལོང་ལས། ཨ་རུ་ར་ནི། ཤིང་སྡོང་ཆེ་ལ་ཕྱི་སྐོགས་མདོག་སོགས་སྟར་སྡོང་འདྲ་བ་བར་ཤུན་ལྗང་སེར་ལོ་མ་ལྗང་མཐུག་མེ་ཏོག་སེར་པོ་འཆར་བའི་འབྲས་བུ་སྟེ། དེ་ལ་སེར་ནག་གཉིས་ལས་སེར་པོ་ལ་ཤིང་དར་གུད་ཀྱི་རིགས་བརྒྱད་དམ་ལྔ་ཡོད་ལ། ཕྱི་མ་བཞིས་ཀྱང་ལུས་སྲོག་འཚོ་བར་བྱེད་ཅིང་དྲོད་བསྐྱེད་ལ་ཟས་འཇུ་བ་སོགས་འཕྲོད་པར་བྱེད་ཅིང་རླུང་མཁྲིས་བད་ཀན་ལས་གྱུར་པའི་ནད་ཀུན་སེལ། ཁྱད་པར་དུ་རིགས་ལྔ་ལས་རྣམ་རྒྱལ་ཆག་ཚང་ཀུ་བའི་མཇུག་མ་འདྲ་བ་རོ་དྲུག་ལྡན་གྱིས་ནད་ཀུན་སེལ་ནུས་ཤིང་དེ་ཡོད་པར་བཀྲ་ཤིས་ལ་དོན་འགྲུབ་པས་ནོར་བུ་འདྲ་ལ།དེའི་འཚབ་ཏུ་གསེར་མདོག་རྡོག་ཆེ་བ་མཇུག་མ་ཅན་ཡང་རུང་ཙམ་ཡིན། འཇིགས་མེད་ཟུར་ལྔ་ནག་པོ་འཇོང་བ་དེ་མིག་ནད་དང་གདོན་རིགས་ལ་བསྔགས། བདུད་རྩི་སེར་པོ་ཤ་མཐུག་པས་ཤ་ཆེན་དུ་གྲགས་པ་དེས་ལུས་སྐེམ་པོ་རྣམས་ཤ་འཕེལ་བར་བྱེད། འཕེལ་བྱེད་སེར་སྐྱ་ཟླུམ་པོ་བུམ་པ་འདྲ་བའི་རིལ་བ་དེ་རྨ་ལ་ཕན། སྐེམ་པོའམ་གཙང་མ་ཤ་ཆུང་བས་སུལ་མང་བ་དེས་བྱིས་པའི་མཁྲིས་ནད་སེལ་ཏེ། ཕྱི་མ་བཞི་ལན་ཚྭ་མ་གཏོགས་པའི་རོ་ལྔ་ལྡན་ཡིན། གཞན་ཡང་གསེར་མདོག་གམ་འཚོ་བ་ཞེས་སེར་པོ་དང་། མཆུ་སྙུང་ཟུར་གསུམནག་ཆུང་ཚི་གུ་མེད་པ་བདུད་རྩིའི་ནུས་པ་དང་འདྲ་བ་བཅས་བདུན་ནམ་བརྒྱད་དུའང་བཤད།
     སྨན་མིང་དང་ངོས་འཛིན་ཐོར་བུ་མཁས་པའི་ངག་གི་བདུད་རྩིའི་ཟེགས་མ་ལས། ཨ་རུའི་རིགས་ཀྱི་བཟང་ངན་ཡང་། རྡོ་རྗེ་མཁའ་འགྲོར། ཨ་རུ་ར་ནི་འབིགས་བྱེད་ཀྱི། ནགས་དང་རི་བོ་དབང་ཆེན་སྐྱེས།། ནར་མ་ད་ཡི་ཆུ་སྐྱེས་མཆོག། གཞན་དག་དམན་དང་འབྲིང་པོ་ཡིན།། ཞེས་གསུངས་པ་མཆོག་དང་། རྒྱ་གར་ནས་འབྱུང་བ་བཟང་ཞིང་། བལ་པོ་ནས་འབྱུང་བའི་མདོག་སེར་པོ་ཆུང་ངུ་འདི་ནི་ནུས་པ་དམན་པས་མི་བཏང་བར་གསུངས་སོ།།

གོང་ངོས། ཡིག་ཆ་མི་འདུག
X