>
ཁྱེད་ཀྱི་གནས་ཡུལ། > གཙོ་ངོས། > སྨན་རྫས། > རྩི་ཡི་སྨན། > > ནང་དོན།

གུར་ཀུམ།

ཇུས་འགོད་པ། སྒྲོལ་མ་མཚོ། རྩོམ་སྒྲིག་པ། བོད་གཞུག་སྐྱིད། དུས་ཚོད། 2015-06-02 14:58:34 ཀློག་གྲངས། 150

     བདུད་རྩི་སྨན་གྱི་རྣམ་དབྱེ་ངོ་བོ་ནུས་མིང་རྒྱས་པར་བཤད་པ་དྲི་མེད་ཤེལ་ཕྲེང་ལས། གུར་ཀུམ་མཆིན་ནད་ཀུན་སེལ་རྩ་ཁ་སྡོམ།། ཞེས་པར། དཔག་བསམ་ལྗོན་ཤིང་ལས། གུར་ཀུམ་མཆིན་པའི་ཚ་བ་སེལ།། ཞེས་དང་། ལྕགས་ཕྲེང་ལས། གུར་ཀུམ་བསིལ་ལ་ལྕི་བས་རང་གི་ནུས་པས་མཆིན་ནད་གསར་རྙིང་སེལ།། ཞེས་དང་། བདུད་རྩི་ཐིགས་པར། གུར་ཀུམ་བསིལ་ཞིང་ལུས་ཟུངས་འཕེལ་བར་བྱེད།། ཅེས་གསུངས་པའི་མིང་ནི། ཀུང་ཀུ་མཾ། གུར་ཀུམ། ཀུ་སུ་མ། མེ་ཏོགདྷཱ་རཾ། དཔལ་བ། ཨགྣི་ཀཾ མེ་ལྡན། ཧ་རི་ཙནྡ་ནཾ། ཧ་རི་ཙནྡ་ཅན། བ་རཾ་སྐསྨི་ར། ཁ་ཆེར་མཆོག་སྐྱེས། སྐསྨི་ར་ཛནྨ། ཁ་ཆེར་སྐྱེས། ལོ་ཧི་ཏ་ཙནྡ་ནཾ། ཙནྡན་དམར་ཅན། དཱི་པ་ནཾ། སྣང་བྱེད། སཱིརྱ། ཉི་མ། ཤྩྪ་ཀོ་ཙཾ། ཡང་དག་འཁུམ། རཀྟ་ཤྩྪ་ཛྙཱ་ཀཾ དམར་མིང་ཅན། སྃ་བྷ་བྷཾ། དྲི་ཞིམ། སུ་གནྡྷ། དྲི་བཟང་། རཀྟཱངྒ་། ལུས་དམར། ཨགྣི་ཤྲྀགཾ མེའི་རྩེ་མོ། ཀུ་སུ་མཱརྠ་ཀཾ མེ་ཏོག་དོན་ཅན། སིད་མུ་ཐ། ཎི་ཙནྡྷུ། ཡུལ་སྐད་དུ། ཟི་ཚི་ཀུ་ས། ཀུ་ས་ནི། ཀེ་ས་ར། ཀུ་སུམྦྷ། གབ་ཏུ། མཆིན་སྨན་གཙོ་བོ། ལི་ཁྲིའི་མདངས་ཅན། ལེ་བརྒན་རྩི། ཉི་མ་གུང་རྙེད། འཇམ་དབྱངས་མདོག་ཅན་ཟེར། རྒྱ་ནག་པས། ཟ་ཕན་ཟེར་རོ།། འདིའི་ཁུངས་དང་ལོ་རྒྱུས་ནི། གུར་ཀུམ་འདི་ནི་སྨན་ཐམས་ཅད་ཀྱི་རྩ་བ་ཡིན་པས། ཙ་ར་ཀ་ལས། ཚངས་པའི་སྨན་སྦྱོར་སྟོང་དང་རྩ་གཉིས་ཀྱང་། རྩ་བ་གུར་ཀུམ་སེ་འབྲུ་གཉིས་ལ་ཐུག། ཅེས་གསུངས་པས། གྲང་སེལ་ཐམས་ཅད་ཀྱི་རྩ་བ་སེ་འབྲུ་དང་། ཚ་སེལ་ཐམས་ཅད་ཀྱི་རྩ་བ་གུར་ཀུམ་ལ་མཛད་པའི་དོན་ནི། སྔོན་རྒྱ་མཚོ་བསྲུབས་པའི་ཚེ། བདུད་རྩིའི་བུམ་པའི་ཁ་རྒྱན་དུ་ལྷའི་མེ་ཏོག་སུ་གནྡྷ་ཀུ་སུ་མ་བྱུང་བ་དང་། བདུད་རྩིའི་ཟེགས་མ་ས་ལ་འཐོར་བ་ལས། ཀེ་ས་ར་པིངྒ་ལི་འཁྲུངས་པ་འདི་དག་རྒྱུ་འདྲ་བ་ལས་ཆེས་སྔོན་དུ་བསྐལ་པ་རྫོགས་ལྡན་ཚེ་ལོ་བརྒྱད་ཁྲིའི་དུས། རྒྱལ་པོ་ལག་བསྐྱང་གིས་སངས་རྒྱས་འཁོར་བ་འཇིག་སྤྱན་དྲངས་པའི་ཚེ། ལྷ་རྣམས་ཀྱིས་མེ་ཏོག་གུར་ཀུམ་གྱི་ཆར་ཕབ་པས་སྟོན་པའི་སྐུ་ལ་མཚན་དཔེའི་ཆ་ཤས་ཆེས་གསལ་བར་གྱུར་པ་དང་། དེ་རྗེས་བསྐལ་པ་ཉིས་ལྡན་ཚེ་ལོ་དྲུག་ཁྲིའི་དུས། རྒྱལ་པོ་ལྷས་བསྟན་གྱི་རིང་ལ་སངས་རྒྱས་གསེར་ཐུབ་འཇིག་རྟེན་དུ་བྱོན་པ་སྐུ་འཁྲུངས་ཚེ་ལྷ་རྣམས་ཀྱིས་གུར་ཀུམ་གྱི་ཆུས་ཁྲུས་གསོལ་བ་དང་སྐྱེམས་སུ་ཕུལ་བས། སངས་རྒྱས་ཀྱིས་གུར་ཀུམ་གྱི་ཡོན་ཏན་ལ་བསྔགས་པའི་ཚིགས་སུ་བཅད་པ་ཉི་ཤུ་རྩ་ལྔ་དང་བཅས་གསོ་དཔྱད་འབུམ་པའི་ཚ་སེལ་གྱི་རྩ་བར་བཞག་ནས།མི་མཇེད་ཀྱི་བདག་པོ་ཚངས་པ་ལ་གནང་། དེ་ལ་བརྟེན་ནས་ཚངས་པས་སྨན་སྦྱོར་སྟོང་དང་རྩ་གཉིས་ཉམས་སུ་བཞེས་པ་དང་། དེ་རྗེས་བསྐལ་པ་སུམ་ལྡན་ཚེ་ལོ་བཞི་ཁྲིའི་དུས། རྒྱལ་པོ་ཀྲྀ་ཀྲཱིའི་རིང་ལ་སངས་རྒྱས་འོད་སྲུངས་འཇིག་རྟེན་དུ་བྱོན་པའི་ཚེ། སྐུ་འཁྲུངས་མ་ཐག་ལྷ་རྣམས་ཀྱིས་གུར་ཀུམ་གྱི་ཆུས་ཁྲུས་གསོལ་བ་དང་། སྐྱེམས་སུ་ཕུལ་བས་སྐུ་མཚན་དཔེ་འབར་བ་དང་། གསུངས་དབྱངས་ཡན་ལག་དྲུག་ཅུ་རྫོགས་པའི་རྐྱེན་དུ་སྨིན་པས་སངས་རྒྱས་ཀྱིས་མེ་ཏོག་དེ་ལ་མངོན་པར་བསྟོད་པས། དེའི་ཚེ་དགྲ་བཅོམ་པ་པདྨའི་དཔལ་ཞེས་བྱ་བ་སངས་རྒྱས་ཀྱི་མཐུས་རྫུ་འཕྲུལ་གྱིས་ལྷ་ཡུལ་དུ་ཕེབས་པས། ལྷ་རྣམས་ཀྱི་བསོད་ནམས་ཀྱི་མཐུས་ཆོས་བཟངས་ལྷའི་འདུན་སར་གུར་ཀུམ་གྱི་སྐྱེད་ཚལ་ཡོད་པ་ནས་ས་བོན་བླངས་ཏེ་དྲག་ཤུལ་ཅན་གྱི་རི་ལ་བཏབ། དེ་རྗེས་སྨན་གྱི་ལྷ་མོ་ཡིད་འཕྲོག་མས་སྨན་ཐམས་ཅད་ཀྱི་ས་བོན་འདེབས་པ་དང་ལྷན་ཅིག་ཏུ་ལྷའི་སྨན་པ་ཐ་སྐར་སྐྱེས་ཀྱི་བུ་ཐང་གྲོ་དང་དཔལ་གྲོ་གཉིས་སངས་རྒྱས་ཀྱི་བཀའ་དང་། ཚངས་པའི་ལུང་གིས་བསྐུལ་ནས་རི་དྲག་ཤུལ་ཅན་ལས་ས་བོན་བླངས་ཏེ་རི་བོ་བྱ་རྐང་དུ་བཏབ། དེ་ནས་ཁ་ཆེའི་ཡུལ་ཆུས་གང་སྟེ་རི་རྣམས་ཀྱི་སྟོད་ལས་ཆེར་མི་མངོན་པའི་དུས་དེའི་རི་ཕུག་ཏུ་དགྲ་བཅོམ་པ་ཉི་མ་གུང་པ་བྱ་བ་ཞིག་ཐུགས་དམ་ལ་བཞུགས་པར། ཀླུའི་དབང་པོ་རྣམས་མངོན་པར་དད་ཅིང་ཆོས་ཞུ་བའི་ཚེ། དགྲ་བཅོམ་པས་ཀླུ་རྣམས་ལ། དཀོན་མཆོག་མཆོད་པ་དང་། འགྲོ་བའི་ནད་ཀྱི་སྡུག་བསྔལ་བསལ་བའི་ཕྱིར་གུར་ཀུམ་འདེབས་པའི་ས་རྒྱ་ཞིག་བསླང་ན། དེ་ལ་ཀླུ་རྣམས་དགྱེས་པས་གནང་བ་དང་། དེའི་ས་མངོན་པར་བྱ་བའི་ཕྱིར་མཚོ་ཕྲི་བ་དང་སྨིན་པའི་གྲོགས་གསོལ། ཞེས་བཀའ་སྩལ་པས། གསོལ་བ། ཉིད་ཀྱི་ཆོས་གོས་ཀྱིས་གང་ཁེབས་པའི་ས་རྒྱ་འབུལ་བ་དང་བཅས་ཕྲིན་ལས་བསྒྲུབ། དགྲ་བཅོམ་པས་ངའི་ཆོས་གོས་སངས་རྒྱས་ཀྱིས་མ་གནང་བས་ས་ཆུ་ལ་འགེབ་པར་མི་བཏུབ། གསུངས་པས། འོ་ན་མཁའ་ལ་བཏེག་པའི་གྲིབ་མ་ལ་ཚོད་གྱིས་ཤིག དགྲ་བཅོམ་པ་ནང་པར་ནམ་མཁའ་ལ་རྫུ་འཕྲུལ་གྱིས་འཕུར་ཏེ་ཉི་མ་འཆར་བའི་རིའི་གསང་ཧེ་ལ་ཆོས་གོས་འཕྱར་བས་དེའི་ཡུལ་ལྗོངས་ཕལ་ཆེར་གྲིབ་མས་ནོན། དེར་ཀླུས་ས་ཕུལ་བཞིན་མཚོ་ཕྲིས་པས། དགྲ་བཅོམ་པས་རི་བྱ་རྐང་ཅན་ནས་ས་བོན་བླངས་ཏེ་བཏབ་ནས། སངས་རྒྱས་ཀྱི་བསྟན་པ་ཇི་སྲིད་གནས་ཀྱི་བར་སྐྱེ་བར་སྨོན་ལམ་བཏབ་པ་དང་། ཀླུས་གྲོགས་བགྱིས་པས་སྐྱེས་པ་དང་། ཡུལ་དེར་མི་ཡང་རིམ་པས་ཆགས་པར་གྱུར། དེ་བཞིན་དུ་པཎ་ཆེན་ནཱ་རོ་པས་ཀྱང་རི་བོ་བྱ་རྐང་ནས་ས་བོན་བླངས་ཏེ་པུཥྤ་ཧ་རིར་བཏབ་པ་དང་། དེ་ལས་འཕྲོས་པ་མ་ལ་ཡ་སོགས་སུ་ཡང་སྐྱེས་པ་དང་། དེ་མ་ཡིན་པའི་དེ་དང་ནུས་པ་ཕྱོགས་མཐུན་པ་ཙམ་ལྡུམ་རར་བཏབ་བ་ལེ་བརྒན་མ་ནི་རྒྱ་གར་གྱི་ཡུལ་ཕལ་ཆེར་དུ་སྐྱེ་བ་དང་། དེའི་རྒྱུན་བལ་ཡུལ་དུའང་དེ་ལས་དམན་ཙམ་རྟག་པར་སྐྱེས་པ་དང་། དེ་ལས་དམན་པ་ཙམ་བོད་ཀྱི་ལྡུམ་རར་ཡང་སྐྱེ་བ་ན་དེ་རྣམས་ནི་ཁུངས་བྱུང་གི་ལོ་རྒྱུས་སོ།། དེས་ན་གུར་ཀུམ་གྱི་མཆོག་ནི་བྱ་རྐང་མ་དང་། རབ་ནི་རྒྱ་གར་སྐད་དུ་ཀསྨི་ར། བོད་སྐད་དུ་ཁ་ཆེ་སྟེ། ཡུལ་གྱི་མིང་མེ་ཏོག་ལ་ཐོགས་པ་ཁ་ཆེ་མ་དང་། དེ་དང་འདྲ་བ་པུཥྤ་ཧ་རི་དང་མ་ལ་ཡར་སྐྱེས་པ། འབྲིང་པོ་ནི་རྒྱ་གར་ཕལ་དུ་སྐྱེ་བ་ལེ་བརྒན་མ་དང་། དེ་ལས་ཅུང་དམན་པ་བལ་པོ་གུར་ཀུམ་དང་། ཐ་མ་བོད་ཀྱི་ལྡུམ་རར་སྐྱེ་བ་སྟེ་མཆོག་རབ་འབྲིང་མཐའི་དབྱེ་བས་རིགས་ལྔའོ།། མ་ལ་ཡ་འགྲེལ་ལས། གུར་ཀུམ་བྱ་རྐང་ཁ་ཆེ་མ།། ལེ་བརྒན་བལ་བོད་རྣམ་པ་ལྔ།། ཞེས་བྱ། ཁུངས་ཡང་དེ་ཉིད་ལས། གུར་ཀུམ་དྲག་ཤུལ་ཅན་རི་ནས།། དྲང་སྲོང་རྣམས་ཀྱིས་བྱ་རྐང་དུ།། ས་བོན་ཁྱེར་ནས་བཏབ་ལས་བྱུང་།། དགྲ་བཅོམ་ཉི་མ་གུང་པ་ཡིས།། བྱ་རྐང་རི་ནས་ས་བོན་བླངས།། ཁ་ཆེའི་ཡུལ་ལྗོངས་ཆགས་མ་ཐག། སྨོན་ལམ་ས་བོན་ལྷན་ཅིག་བཏབ།། བདེ་ལེགས་ཟེའུ་འབྲུས་བསྡུས་པ་ཡིས།། དེང་སོང་སོ་ནམ་དགོས་ཞེས་ཟེར།། པུཥྤ་ཧ་རིའི་དགོན་པ་ན།། གུར་ཀུམ་སྐྱེ་བ་ཡིན་ཕྱིར་བརྟག། མ་ལ་ཡ་ནས་འབྱུང་བ་མཆོག། ལེ་བརྒན་རྒྱ་གར་ཡུལ་ཀུན་སྐྱེ།། བལ་པོ་གུར་ཀུམ་ཞེས་གྲགས་ཡོད།། མེ་ཏོག་འདབ་མས་བསྡུས་པ་ཡིན།། བོད་ཀྱི་གུར་ཀུམ་གོ་བ་སླ།། ལྡུམ་རའི་ནང་དུ་སྐྱེ་བ་ཡོད།། ཅེས་སོ།། དེ་དག་སོ་སོར་ངོས་འཛིན་པ་ཡང་དེ་ཉིད་ལས། གུར་ཀུམ་དམར་སེར་སིལ་བུ་ལ།། དྲི་ཞིམ་རོ་མངར་ཁུ་བ་ཆེ།། ཞེས་སྤྱིའི་བཤད་པ་དང་། བྱ་རྐང་བ་ནི་ལོ་མ་དང་།། མེ་ཏོག་སྔོན་པོ་ཅུང་ཟད་འདྲེ།། རྩ་བ་དོ་བའི་སྡོང་པོ་འདྲ།། དྲི་རོ་ལྷག་པར་བཟང་བ་ཡིན།། ཞེས་བྱ་རྐང་མ་སྟེ་འདི་ཤིན་ཏུ་དཀོན་པའོ།། ཁ་ཆེ་མ་ནི་རབ་ཏུ་སེར།། གེ་སར་ཁམ་ན་གཞན་མ་འདྲེས།། ཞེས་པ་འདི་ཁ་ཆེ་མ་སྟེ། རྒྱ་གར་ནས་ཛོ་ཀི་རྣམས་ཀྱིས་འཁྱེར་ཡོང་བ་དང་འདི་རྣམས་འདྲ་བ་ལས་ཛོ་ཀིས་འཁྱེར་བའི་མ་ལ་ཡ་ནས་འོང་བ་དང་། པུཥྤ་ཧ་རི་ནས་འོང་བ་སིལ་བུ་ཡིན་ལ། ཁ་ཆེ་ནས་འོང་བ་ཕལ་ཆེར་བཀྵ་ཞེས་དམ་བཀྲས་བསྡམས་པ་མང་། འདི་ལ་རིང་ཐུང་ཁྲུ་གང་རེ་ཙམ་ཡོང་བར་གསུངས། དེ་ཉིད་ལས། ལེ་བརྒན་དྲི་རོ་མི་གསལ་ཡང་།། ཁ་དོག་དམར་སེར་གསལ་ན་བཟང་།། ཞེས་རྒྱ་གར་གྱི་གུར་ཀུམ་སྟེ། དྲི་རོ་ཆེར་མེད་ཀྱང་ཁ་དོག་ཤིན་ཏུ་གསལ་ལ་ཁུ་བ་སེར་པོ་འབབ་པ་དང་། བལ་པོའི་གུར་ཀུམ་ནག་ལ་ཉོབ་པ་ཁུ་བ་མེད་པ་འབྱུང་། འདི་གཉིས་ལོ་མ་ཆེ་ལ་རྐང་རིང་པ་མི་ཚད་ཙམ་འབྱུང་ཟེར། བོད་ཀྱི་ལྡུམ་རའི་གུར་ཀུམ་ཡང་། དེ་ཉིད་ལས། བོད་ལ་ལྡུམ་རའི་ནང་དུ་སྐྱེ།། དྲི་ཞིམ་ལི་ཁྲིའི་མདོག་ཅན་མཆོག། གེ་སར་སྨུག་པོ་འདུག་པ་འབྲིང་། སྐྱ་ལ་དྲི་མ་ཆུང་ན་ངན།། ཞེས་སོ།། བཟང་ངན་བརྟག་པ་ནི། དེ་ཉིད་ལས། གུར་ཀུམ་ཤིན་ཏུ་མི་དམར་ཞིང་།། ཤིན་ཏུ་སྨུག་པ་མ་ཡིན་པ།། དམར་སེར་སྣུམ་ཞིང་ལྕི་བ་དང་།། རོ་མངར་དྲི་མ་ཆེ་ལ་ཞིམ།། ཁུ་བ་དམར་སེར་གར་ན་བཟང་།། དེ་ལས་ཇི་ལྟར་ལྡོག་བཞིན་ཞན།། ཞེས་གསུངས་བཞིན་ཁ་ཆེ་མ་ཡང་ཁུ་བ་བཏོན་པ་ཡོང་བས། དྲི་རོ་དང་ཁུ་བ་གསུམ་གཙོ་ཆེ། དྲི་རོ་ལས་ཀྱང་ཁུ་བ་རྟགས་ཆེ་བ་ཡིན། སེར་ལ་འཇམ་པ་དང་། ནག་ལ་ཟན་སྐམ་འདྲ་བ་ཁུ་བ་སོང་བ་ཡིན། སྨུག་ལ་སྣུམ་ཞིང་གྱོང་བ་བཟང་། དེས་ན། འདྲ་དཔེར་ཡང་། གུར་ཀུམ་གཡག་ཤ་ཕྱེ་མ་འདྲ།། ཞེས་སོ།།
     སྨན་མིང་རྒྱ་མཚོ་ལས། གུར་ཀུམ་མཆིན་ཚད་ཁྲག་ལ་ཕན།། ཀུ་སུ་མ་ཡང་དེ་དང་མཐུན།།
     མིང་དོན་བརྡ་སྤྲོད་རྣམ་ལྔ་ལས། གུར་གུམ་ལུག་རུ་སྐམ་པོ་འདྲ།།
     རིན་པོ་ཆེའི་རོ་ནུས་ཞུ་རྗེས་བསྟན་པ་ལས། གུར་ཀུམ་ཀུང་ཀུ་མཾ་རོ་མངར་ཁ་དང་ཞུ་རྗེས་བསིལ།། མཁལ་ཚད་མཆིན་ཚད་ཕོ་བའི་ཚད་པ་དང་།། སྟོད་འཁྲུགས་སེལ་ཞིང་སྨད་འཁྲུགས་རྩ་ཁ་སྡོམ།།
     སྨན་གྱི་རོ་ནུས་ཞུ་རྗེས་བཤད་པ་བཻཌཱུརྱའི་མེ་ལོང་ལས། གུར་ཀུམ་རོ་མངར་ཞུ་བའི་རྗེས་ལ་བསིལ།། མཆིན་ནད་ཀུན་སེལ་རྩ་སྡོམ་ཟུངས་འཕེལ་བྱེད།།
     སྨན་སོ་སོའི་མངོན་བརྗོད་དང་ངོས་འཛིན་ཤེལ་དཀར་མེ་ལོང་ལས། ཡང་གུར་ཀུམ་ལ་ཀུང་ཀུ་མཾ། མེ་ཏོག་དོན་ཅན། འཇམ་དབྱངས་མདོག་ཅན། མེ་ཏོག་ཉི་མ། དྲི་ཞིམ། ལི་ཁྲིའི་མདངས་ཅན། ཀུན་ནས་འཁུམ། རྩ་བ་བརྒྱ་པ། ཁ་ཆེར་སྐྱེས་ལ་ཀསྨི་ར་ཛཾ་སྐ་སྨི་ར་ཛནྨདང་ཉི་མ་གུང་རྙེད། བལ་གུར་ལ་ལྡུམ་ར་གུར་ཀུམ། ལེ་བརྒན་རྩི། མངའ་རིས་མེ་ཏོག་བལ་པོ་མེ་ཏོག་འདྲ་སེ་ཞིག་ལའང་མིང་འདི་བཙུན་མོ་གུར་ཀུམ།
     སྨན་མིང་དང་ངོས་འཛིན་ཐོར་བུ་མཁས་པའི་ངག་གི་བདུད་རྩིའི་ཟེགས་མ་ལས། ཀུངྐུ་མ། ཟུར་ཆག་པས། གུར་གུམ་སྟེ། རྡོ་རྗེ་མཁའ་འགྲོར། གུར་གུམ་ཀུ་སུམ་དམར་འདྲ་ཞིང་།། སྣུམ་ལ་གེ་སར་སྲབ་པ་མཆོག། གེ་སར་སྦོམ་ཞིང་སེར་བ་དང་།། སྦྲང་རྩིའི་དྲི་ལྡན་འབྲིང་པོ་ཡིན།། ཞེས་གསུངས། དེ་ཡང་ཨུ་རྒྱན་དང་། ཁ་ཆེར་འབྱུང་བ་སྟེ། ཁ་ཆེ་གུར་གུམ་ཞེས་གྲགས་པ་འདི་ནི་དངོས་ཡིན། རྒྱ་གར་གྱི་ཡུལ་ཐམས་ཅད་དང་། དེའི་རིགས་གཅིག་བལ་པོ་དང་། བོད་ཀྱིའང་ལྡུམ་རར་སྐྱེ་བའི་ལེ་བརྒན་རྩི་ཞེས་གྲགས་པ་འདི་རྣམས་ནི་ཚབ་རུང་ཙམ་མ་གཏོགས། གུར་གུམ་དངོས་མིན་ཏེ། བརྒྱད་པ་རྩ་འགྲེལ་སོགས་སུ་གུར་ཀུམ་དང་། ལེ་བརྒན་རྩི་ཐ་དད་དུ་བཤད་པ།
     མཛེས་མཚར་མིག་རྒྱན་ལས། མཆིན་པའི་བཟང་པོ་གུར་གུམ་ནི། རྒྱ་སྐད་དུ་ཀུང་ཀུ་མཾ། ཀུ་སུ་མྦྷ། སྤང་གི་མེ་ཏོག ཆོས་གོས་ངུར་སྨྲིག་ཟེར། ཤེལ་འཕྲེང་དུ་ལེབ་རྒན་རྩི་ཟེར་བའང་ལེབ་རྒན་མ་སྟེ་རྩིར་མི་འཐད། དེར་རིགས་ལྔ་ཡོད། མ་ལ་ཡ་འགྲེལ་ལས། གུར་གུམ་བྱ་རྐང་ཁ་ཆེ་མ།། ལེབ་རྒན་བལ་བོད་རྣམ་པ་ལྔ།། ཞེས་པའི་བྱ་རྐང་མ་ནི། རྒྱ་གར་རི་བོ་མ་ལ་ཡའི་ལོ་མ་དང་མེ་ཏོག་སྔོན་པོ་ཅུང་ཟད་འདྲ། རྩ་བ་དོ་བའི་སྡོང་པོ་འདྲ་ལ་དྲི་རོ་ལྷག་པ་དེ་ཤིན་ཏུ་དཀོན་པ། ཁ་ཆེ་མ་ནི། རྒྱ་སྐད་དུ། ཀསྨི་ར་ཞེས་པ་ཁ་ཆེའི་ཡུལ་དུ་སྐྱེས་པ་སྟེ། ཤོ་ཁ་མ་ཡང་ཟེར། མ་ལ་ཡ་འགྲེལ་ལས། དགྲ་བཅོམ་ཉི་མ་གུང་པ་ཡིས།། བྱ་རྐང་རི་ནས་ས་བོན་བླངས།། ཁ་ཆེའི་ཡུལ་ལྗོངས་ཆགས་མ་ཐག།། སྨོན་ལམ་ས་བོན་ལྷན་ཅིག་བཏབ།། ཅེས་དང་། ལེབ་རྒན་མ་ནི། རྒྱ་གར་གྱི་གུར་གུམ་དྲི་རོ་ཆེ་མེད་ཀྱང་ཁ་དོག་ཤིན་ཏུ་གསལ་ལ་ཁུ་བ་སེར་པོ་འབབ། བལ་གུར་ནི། འདབ་སྤུ་ཐུང་ལ་དམར་པོ་ཁོ་ན་ལི་ཁྲི་ལྟ་བུས་ལི་ཁྲི་མདོག་ཅན་ཟེར། འདི་གཉིས་ལོ་མ་ཆེ་ལ་རྐང་རིང་མི་ཚད་ཙམ། བོད་གུར་ནི། ལི་ཁྲིའི་དངས་ལྡན་ཟེར། ལྡུམ་རར་སྐྱེ་བ་ལོ་སྡོང་ཐམས་ཅད་ཚེར་མས་ཁྱབ་པ།

གོང་ངོས། གི་ཝང་།
X