>
ཁྱེད་ཀྱི་གནས་ཡུལ། > གཙོ་ངོས། > སྨན་རྫས། > རྡོ་ཡི་སྨན། > > ནང་དོན།

རྡོ་རྒྱུས།

ཇུས་འགོད་པ། སྒྲོལ་མ་མཚོ། རྩོམ་སྒྲིག་པ། བོད་གཞུག་སྐྱིད། དུས་ཚོད། 2015-05-29 16:35:26 ཀློག་གྲངས། 9

     བདུད་རྩི་སྨན་གྱི་རྣམ་དབྱེ་ངོ་བོ་ནུས་མིང་རྒྱས་པར་བཤད་པ་དྲི་མེད་ཤེལ་ཕྲེང་ལས། རྡོ་སོལ་རྡོ་རྣམས་འཇུ་ཞིང་རྩ་ཁ་སྡོམ།། ཞེས་པར། རང་བྱུང་ཞབས་ཀྱིས། རྡོ་སོལ་དབྱིག་གི་དུག་ལ་ཕན།། གསུངས་པ། རྡོ་ཁ་དོག་མ་ངེས་པ་ལས་ཁྱད་པར་ནག་ཤས་ཆེ་བ་འབྱུང་ཞིང་། མེ་ལ་བསྲེགས་ན་མེར་འབར་ལ། མ་བསྲེགས་པར་རང་བཞིན་གྲང་མོ་ཆུར་བཅུག་ན་ཡུན་ཙམ་སོང་ནས། རིམ་པས་ཆུ་དྲོས་ཤིང་རླངས་པ་འབྱུང་བ་དང་། ཚ་ཙམ་དང་ཁོལ་བ་སོགས་སྟོབས་མཐུན་འབྱུང་བ་དང་། ཡང་ན་ཆུ་ཐིགས་ཙམ་བྲན་ན་སེག་སྒྲ་དང་རླངས་པ་འཐུལ་བའོ།། དོན་ལ་ཆུ་ཚན་ཁོལ་བྱེད་ཀྱི་རྡོ་དེ་ཡིན། འདི་ལ་འགྲེལ་པ་ཁ་ཅིག་ཏུ་རྩ་རྒྱུད་ཆུ་ཚན་སྐབས། རྡོ་ཞོ་རྡོ་ཐལ་བྱེད་རྒྱུའི་རྡོ་རིགས་ལྔ་ཕྱེ་རྒྱུའི་རྡོ་ཡིན། ཞེས་དང་། བཤད་རྒྱུད་ནུས་པ་རྐྱང་སེལ་སྐབས། ནག་པོ་མེ་འབར་ཡིན་ཞེས་གསུང་གཉིས་མཛད། སྔ་མ་རྒྱུ་མཚན་བཅས་གསུངས་ཀྱང་མི་འགྲུབ་སྟེ། རྡོ་དེ་བསྲེགས་ནས་གྲང་ཡང་ཆུ་དང་འཕྲད་ཚེ་ཁོལ་བར་བསམས་ནས་ཆུ་ཚན་ཁོལ་བྱེད་དུ་རློམ་ཀྱང་། ཆུ་ཚན་གཏིང་པའི་རྡོ་སྲེག་མཁན་མེད་ལ་རྡོ་དེ་མ་བསྲེགས་པ་བསྐལ་བར་ཆུར་བཅུག་ཀྱང་དྲོས་ཙམ་མི་ནུས་པས། བོད་ཁམས་ཀྱི་བྲག་དཀར་ཐམས་ཅད་དང་། དེའི་ལུང་པའི་རྡོ་གྲམ་ཐམས་ཅད་རྡོ་ཞུན་གྱི་རྡོ་འདི་ཁོ་ན་ཡིན་ཡང་། ཆར་བབ་པ་དང་ཆུ་བོ་སོགས་གང་དང་ཕྲད་ཀྱང་མི་ཁོལ་བར་མ་ཟད་རྫ་ཆབ་བསིལ་བའི་རང་བཞིན། ཚོས་པར་བསྲེགས་ནས་ལོ་ཟླ་ཞག་དུ་གྲང་ཡང་ཆུར་བཅུག་ཚེ་ཁོལ་ཡང་། དེ་རྡོ་ཐལ་དུ་ཞིག་ནས་ཞོ་ལྟར་སོང་ནས་མི་ཁོལ་བའོ།། ཆུ་ཚན་ཁོལ་བྱེད་ནི་བསྐལ་བར་ཡང་མི་འཇུ་མི་འཇིག་མི་གྲང་ལ། ནམ་གྲང་ན་ཆུ་དེ་མེད་ཅིང་ཆུ་དང་ནམ་བྲལ་བའི་ཚེ་གྲང་། སླར་རླན་ནམ་ཕོག་ཀྱང་སྔ་མ་ལྟར་ཁོལ་ཏེ། ཕ་དམ་པའི་ལས་བརྒྱ་པ་ལས། རྡོ་སོལ་རི་ལ་ཆར་གྱི་རྒྱུན་བབས་ན།། དེ་ཉིད་མེ་ཡི་ས་གཞི་ལྟ་བུར་འགྱུར།། ཞེས་གསུངས། རྡོ་ཞུན་དུ་འདོད་པས། ལྷོ་ཕྱོགས་རྟ་གདོང་གི་མེའི་རྒྱུའི་རྡོ་སོལ་དེ་ལ་མཐའ་མ་ལྕགས་རི་ནག་པོས་བསྐོར་བར་བཤད་པ་ལ། དགག་པ་བསལ་ཕྱིར་མི་འགལ་ཏེ། རྡོ་རིགས་སྔོ་ནག་ཆར་སྤྲིན་མདོག་ཅན་དེ་ཡིན་སྨྲ་ཡང་། ཆར་སྤྲིན་མདོག་ཀྱང་མ་བསྲེགས་པར་ཆུ་མི་ཁོལ་ཚུལ་གོང་དུ་བཤད་པས་རྡོ་རིགས་ལྔ་ལ་ཁྱད་པར་མེད། བསྲེགས་པ་གྲང་མོས་ཁོལ་བ་ཙམ་ལ་འཛིན་ན་ཅོང་ཞི་དང་། དུང་དང་འགྲོན་བུ་སོགས་ཀྱང་འདྲ། དེ་ལྟར་གནད་ཤེས་པར་བྱས་ནས་རྡོ་སོལ་ངོ་མ་རྙེད་ཀྱང་ཆུ་ཚན་འགའ་ཞིག་གི་ཁར་རྡོ་སོལ་གྱི་ནུས་རྩད་ལས་བྱུང་བའི་རྡོ་སྐྱ་སོབ་གྲང་མོར་མཆིལ་མ་སོགས་བླུགས་པས་སེག་སྒྲ་དང་རླངས་པ་འབྱུང་ཙམ་པ་དེས་རུང་བར་བཤད།
     སྨན་མིང་རྒྱ་མཚོ་ལས། རྡོ་སོལ་དབྱིག་གི་དུག་ལ་ཕན།།
     སྨན་སོ་སོའི་མངོན་བརྗོད་དང་ངོས་འཛིན་ཤེལ་དཀར་མེ་ལོང་ལས། རྡོ་སོལ་ནི། ནག་པོ་གསོམ་སོལ་འདྲ་བ་མེར་བསྲེག་ན་འབར་བ་སྟེ། དེས་རྡོ་འཇུ་ཞིང་རྩ་ཁ་སྡོམ།
     མཛེས་མཚར་མིག་རྒྱན་ལས། རྡོ་སོལ་ནི། ཆུ་ཚན་ཁོལ་བྱེད་པའི་རྡོ་རི་འོག་ནས་ཁུང་བྱས་ནས་ལེན་པ། རྡོ་ནག་པོ་མེར་བསྲེགས་པས་འབར་ཞིང་དྲི་ངན་པ། མ་བསྲེགས་པར་གྲང་ཆུར་བཅུག་ནས་ཡུན་ཙམ་དུ་ཆུ་དྲོས་པ་ཡིན།

གོང་ངོས། རྡོ་སོལ།
X