//不能复制 // >
ཁྱེད་ཀྱི་གནས་ཡུལ། > གཙོ་ངོས། > རྨང་གཞི་གཞུང་ལུགས། > འཇམ་རྩུབ་དཔྱད། > ནང་དོན།

ས་བཅད་དྲུག་པ། ལོག་གནོན་ཐུར་མའི་བཅོས།

ཇུས་འགོད་པ། སྒྲོལ་མ་མཚོ། རྩོམ་སྒྲིག་པ། རིན་ཆེན་མཚོ། དུས་ཚོད། 2015-01-12 11:20:22 ཀློག་གྲངས། 28 

ནད་སྟེང་དུ་ཤ་ལ་སོགས་པ་དབུག་ནས་ཉེས་སྐྱོན་ཕྱིར་བསལ་བར་བྱེད་པའི་ཆ་བྱད་ལ་ཟེར་ཏེ། འདི་ལ་ཐུར་མ་རུང་བ་དང་མི་རུང་བ། ཆ་བྱད་ཀྱི་དབྱིབས། གསང་ས། དབྱེ་བ ལུས་ཀྱི་ཆོ་ག བརྡེག་ཐབས ལག་ཚོད འཆི་རྟགས ལོག་གནོན ཕན་ཡོན་དང་བཅས་བཅུ་གཅིག་ཡོད

དང་པོ ཐུར་མ་རུང་བའི་ནད

རླུ་དང་བད་ཀན གྲང་བ མ་ཞུ་བ་སོགས་ཀྱི་སྐྲན་དང་དམུ་ཆུ་དང་རླངས་འཁྱིམས་པ་དང་ཤ་བེམ་དུ་སྐྲངས་པ་དང་ཁྲག་དང་ཆུ་སེར་དང་རྣག་དང་ཚིགས་ཆུ་སོགས་ལ་གསོ་དཔྱད་གཞན་རྣམས་ཀྱིས་མ་ནོན་པའི་མཐུ་རྡུགས་པ་ཕལ་ཆེར་ཐུར་མས་གསོ་བར་བྱ་དགོས་ཏེ། དེ་ཡང་རླུང་ནད་དུ་གྱུར་པ་མགོ་རླུང་སྙིང་རླུང་གློ་རླུང་མཆིན་པ་མཆེར་བ་ཕོ་བ་མཁལ་མ་རྒྱུ་མ་ལོང་མཁྲིས་པ་བཅས་པའི་རླུང་དང་། སྒལ་པ་རུས་ཚིགས་རྣམས་ལ་རླུང་ཞུགས་པ་ཐུར་མས་གཞིལ་དགོས་ལ། སྙིང་ལ་རླུང་དང་སྨྱོ་བྱེད་དང་ཆུ་སེར་དང་བད་ཀན་ལྡན་པ་བཞི་དང་། བད་ཀན་གྲང་བ་མེ་དྲོད་ཉམས་པ་དང་ལྷེན་དང་ལྕགས་དྲེག་དང་མགོ་བོ་ལ་བད་ཀན་རྒྱས་པ་དང་། དོན་ལྔ་སྣོད་དྲུག་དང་ཚིགས་པ་ལ་བད་ཀན་རྒྱས་པ་རྣམས་སྨན་དཔྱད་མེ་བཙའ་སོགས་དྲོད་ཀྱིས་མ་སེལ་ན་ཐུར་མས་གསོ་དགོས་པ་དང་། གཞན་ཡང་མ་ཞུ་བའི་སྙིགས་མ་རང་སོར་ལུས་པ་དང་། བད་ཀན་བེ་སྣབས་རྒྱས་པ་ཡང་ཐུར་མས་བཞུ་དགོས་ཤིང་། སྐྲན་ནད་དུ་གྱུར་པ་གློ་བ་སྙིང་མཆིན་པ་མཆེར་པ་མཁལ་མ་དང་ཕོ་བ་ལོང་ག་མཁྲིས་པ་རྒྱུ་མ་ལྒང་པ་མངལ་ཏེ་རྩ་སྐྲན་བཅུ་གཅིག་པོ་རྣམས་དང་། གཞན་ཡང་བད་རླུང་ལས་གྱུར་པའི་གྲང་བའི་སྐྲན་ཐམས་ཅད་ལའང་ཐུར་མ་མཆོག་ཡིན་ཏེ། དེར་མ་ཟད་ཁྲག་དང་མཁྲིས་པ་ལས་གྱུར་པའི་ཚ་བའི་སྐྲན་རྣམས་ཀྱང་གཞན་གྱི་བཅོས་རྡུགས་ཤིང་ཚད་པ་ཆོགས་ན་རྙིངས་ནས་ཐུར་མས་བཤིག་དགོས་ལ་དམུ་ཆུ་དང་གྲང་བའི་ཟགས་ཆུ་དང་འཁྱིམས་ཆུ་རྣམས་ཀྱང་ཐུར་མས་བཙག་དགོས་ཤིང་། རླངས་པ་འཁྱིམས་པ་ནི་མགོ་ལ་བད་ཀན་གྱི་རླངས་འཁྱིམས་པ་དང་། བྱང་ཁོག་སྟོད་དུ་བད་རླུང་གི་རླངས་འཁྱིམས་པ་དང་། གློ་སྙིང་ཕོ་བར་རླངས་འཁྱིམས་པ་ཐམས་ཅད་ཐུར་མས་གསེང་དགོས་ཤིང་། ཤ་ལ་ཆུ་སེར་བེམ་པའི་ཉོར་ཉོར་བྱེད་པ་དང་སྐྲངས་པ་དང་མགོ་དང་བྱང་ཁོག་ཡན་ལག་སོགས་ཀྱི་ཆུ་སེར་དང་། དེ་རྣམས་ལ་རྣག་ཁྲག་ཞུགས་པ་རྣམས་ཀྱང་ཐུར་མས་དབྱུང་བར་བྱ་དགོས་པ་ཡིན་ནོ།།

གཉིས་པ ཐུར་མ་མི་རུང་བའི་ནད།

ཤིན་ཏུ་རྒས་པ་དང་བྱིས་པསྨན་པའི་ངག་གིས་བསྒོ་བ་ལ་མི་ཉན་པ། གནས་དུས་ཡོ་བྱད་སོགས་ཀྱིས་རྐྱེན་མ་འཛོམ་པ་དང་། མཆིན་པ་དང་མཆེར་བའི་སྐྲནཟགས་པའི་ཚ་ཆུཚ་སྐྲན་རྒྱས་པསྙིང་སོགས་དོན་ལྔ་སྣོད་དྲུག་འགྲམས་སམ་ཚ་བའི་ནད་རོ་ཡོད་པ། ཁྲག་དང་མཁྲིས་པ་ལས་གྱུར་བའི་ཚ་བ་ཐམས་ཅད་དང་། སྲོག་གནས་པ་ལྟ་བུའི་ཤིན་ཏུ་གཉན་པའི་ཤ་རུས་རྩ་ཚིལ་གྱི་གནད་སྟེང་རྣམས་སུ་ཐུར་མ་སྤང་ངོ་།།

གསུམ་པ ཆ་བྱད་ཀྱི་དབྱིབས

མགར་བ་མཁས་པས་བརྡུངས་པའི་ནས་འདྲ་བ་མགོ་མཇུག་ཕྲ་ཞིང་རྐེད་པ་སྦོམ་པ་དེ་ནི། གློ་བ་སྙིང་ཚིགས་པ་མཁལ་མ་རྣམས་ལ་བརྡེག་པར་བསྔགས་ཤིང་། སྦལ་མགོ་འདྲ་བ་ནི་མཆིན་པ་མཆེར་པ་རྒྱུ་མ་ལོང་རྣམས་ལ་བརྡེག རྩེ་རྣོ་སོ་ཅན་གུག་པ་ཆུ་གྲི་སྟེ་སྐྲ་གྲི་འདྲ་བས་ནི་ཡན་ལག་གི་ནད་རྣམས་ཅུར་འབྱིན་དང་། རྩེ་རྣོ་ལ་དབལ་ཅན་དུ་མདུང་རྩེ་འདྲ་བས་ནི་ཡན་ལག་གི་རྣག་རྣམས་ལ་སྦྱར། རིང་ཐུང་མཐོ་གང་ལ་དབལ་དང་ལྡན་པ་དེས་ནི་ཕོ་བའི་ནད་ཅུར་འབྱིན་བྱ་ཞིང་། དབྱིབས་ལེབ་ལ་སྦུབས་མཆུ་ཁ་ཡོད་པ་དེས་ནི་མགོ་བོ་ལ་ནད་ཡོད་པ་གཙག་པར་བྱ། སྦུབས་ཡོད་པའི་ཐུར་མ་སྦལ་པའི་མགོ་འདྲ་བས་ནི་སྙིང་ཆུ་གཙག་ཅིང་། སྦུབས་ཐུར་རྩེ་རྣོ་བ་བྱིད་པོའི་མཆུ་འདྲ་བས་ནི་བྱང་ཁོག་གི་རྣག་གང་དུ་ཡོད་པའི་གསང་དབྱེ། སྦུབས་ཐུར་ཁ་གསེགས་སྨྱུ་གུའི་ཁ་ལྟ་བུ་དེས་ནི། དམུ་ཆུ་གཙག་ཅིང་རླངས་འཁྱིམས་པ་གདོན། ཟངས་ཀྱི་ཐུར་མ་རྩེ་བྲ་བོའི་དབྱིབས་འདྲ་བས་མིག་གི་བར་འགྲིབས་བསལ་བ་སོགས་ལ་བསྔགས་ལ། དེ་དག་ཀུན་ཀྱང་སྐེ་ཕྲ་ཞིང་མགོ་འོག་ཏུ་ལུས་ཤོང་བ་ཐུར་མའི་ཞབས་ཅུང་ཟད་སྦོམ་ལ་ལྡིག་པ་དང་ཐུར་རྐེད་ཕྲ་ལ་མཁྲང་བ་སྲིད་དུ་སྒང་སོར་དྲུག་པ་བྱའོ

བཞི་པ ཐུར་མའི་གསང་ས།

གསང་སའམ་ཐུར་མའི་ལམ་ནི་རྣམ་པ་བཞི་ཡིན་ཏེ། དོན་ལྔ་སྣོད་དྲུག་གི་ཡུལ་དང་། རྩ་རུས་ཤ་ཚིལ་གྱི་གནད་ཤེས་པར་བྱ་བ། སྤྱིའི་གསང་ས། བྱེ་བྲག་གི་གསང་ས་ཤེས་པས་ན་རྣམ་པ་བཞིར་ངེས་དགོས་སོ།། འོན་ཀྱང་དེ་ལས་གོ་ལྡོག་པ་རྣམས་ཀྱིས་དང་པོ་དོན་ལྔ་སྣོད་དྲུག་གི་གནས་ཡུལ་གྱིས་མ་ཤེས་ན། དེ་རྣམས་གང་ལ་ནད་ཞུགས་པ་དེ་དང་དེའི་དཔྱད་ཀྱི་དམིགས་མི་ཕྱེད་ལ། ཤ་རུས་རྩ་ཚིལ་གྱི་གནད་རྣམས་མ་ཤེས་ན་དཔྱད་ལ་འབྱོལ་བར་མི་ནུས་པས་དེས་ན་སྨན་པའི་ལག་དགྲ་སྤང་བའི་ཕྱིར་རྩ་གནད་རུས་གནད་ཤ་གནད་ཚིལ་གནད་མཐའ་དག་ཤེས་པ་ཤིན་ཏུ་གཅེས་པ་ཡིན་པས་རྒྱུ་མཚན་དེའི་ཕྱིར་ན་བྱང་ཁོག་ཡུལ་ཐིག་གི་གསང་། མན་ངག་རྒྱུད་ཀྱི་ལེའུ་གྱ་ལྔ་པ་རྩ་འགྲེལ་གྱི་གནད་རྣམས་མ་འཁྲུལ་པར་ཡིད་ལ་གཟུང་བར་བྱ་དགོས་ཤིང་། སྤྱིར་མགོ་སྐེ་ཡན་ལག་བྱང་ཁོག་རྣམས་ཀྱི་གསང་ལ་དབྱེ་གསང་དང་མེ་གསང་དང་ཐུར་གསང་གསུམ་དུ་གསུངས་པ་ལས། རྣག་ཁྲག་ཆུ་སེར་འབྱིན་པའི་དབྱེ་གསང་རྣམས་ནི་བྱང་ཁོག་གི་གསང་སར་གསལ་བ་དང་། མེ་གསང་མེ་བཙའི་སྐབས་སུ་གསལ་བས་འདིར་མ་སྨོས་ཤིང་། སྐབས་དོན་ཐུར་མའི་གསང་ལ་སྤྱི་དང་བྱེ་བྲག་གཉིས་ཡོད་པ་ལས།

སྤྱི་གསང་

དེ་ལའང་རགས་པའི་དབང་དུ་སོང་ན་ཡངས་པ་དང་ཤིན་ཏུ་ཡངས་པ། དོག་པཤིན་ཏུ་དོག་པ་རྣམ་པ་བཞིར་འདོད་དེ། དེའང་ཡངས་པའི་གསང་རྣམས་ལ་ཐུར་མ་གཡུལ་ཐབས་ཏེ་འཕྲེད་གསེགས་འཇོལ་ཐབས་སུ་བརྡེག་ཐུབ་པ་དང་། ཤིན་ཏུ་ཡངས་པའི་གསང་རྣམས་སུ་ཐུར་མ་རྒྱ་གྲམ་དུ་བསྐོར་ཐུབ་པ་ཡིན་ཞིང་། དོག་པ་ན་གཉན་ཐོག་ཏུ་གཉན་བབས་པ་ཞེས་བྱ་སྟེ་གདོད་ནས་གསང་མེད་པའི་གནད་པ་དེར་ནད་ཞུགས་ནས་ནད་ཀྱིས་གནད་ཀྱི་གོ་ས་ཕྲོགས་པ་དེ་ལ་གནད་ལ་ཟེམ་སྟེ་ཟོ་ལེན་གྱིན་ཐུར་མ་སོགས་དཔྱད་བྱ་དགོས་ཤིང་། ཤིན་ཏུ་དོག་པ་ནི་ནད་ཡོད་པའི་དམིགས་ཏེ་གནད་ཤིན་ཏུ་དམ་པ་ཞིག་གིས་བཀག་པ་ཡིན་ན་དེ་ནི་གནད་ཀྱིས་ནད་ཀྱི་གོ་ས་ཕྲོགས་པ་ཡིན་པས་དེ་འདྲ་བ་ལ་ཐུར་མའི་ལམ་གཡས་གཡོན་རྒྱབ་མདུན་སྟེང་འོག་ཏུ་གཅུས་ལ། གནད་མེད་པའི་ས་བཙལ་ཞིང་བརྡེག་དགོས་པའོ།

བྱེ་བྲག་གི་གསང་།

སྙིང་གསང་། སྙིང་ལ་གསང་ས་བཅུ་གཅིག་ཡོད་དེ། ནུ་ཏོག་ནས་གཞལ་བའི་ནུ་མའི་སྟེང་ཚོན་གང་བཅལ་བ་རགས་པའི་དབང་གིས་སྙིང་གི་སྟོད་དེ་ལ་ཐུར་མ་བཏབ་པས་གསང་དེ་གཉིས་ནི་སྙིང་སྲོག་འཛོམ་པའི་གསང་ཡིན་ཏེ་སྙིང་རླུང་སེལ། ནུ་མའི་རྒྱབ་ངོས་སུ་ཚོན་གང་གཞལ་བ་སྲོག་རྩ་མྱོས་བྱེད་ཀྱི་གསང་གཉིས་ཏེ་སྲོག་རྩ་ལ་རླུང་དང་ཆུ་སེར་ཞུགས་པ་ལ་ཕན། ནུ་མའི་ནང་ཚོན་གང་བསྐུམ། དེ་ནས་ཐུར་དུ་ཚོན་གང་གཞལ་བ་གཡས་གཡོན་ཕོ་མོའི་ཕྱོགས་ཀྱི་རགས་པ་ཐུར་དུ་སྙིང་རྩེ་གཏོད་དབང་དང་དོན་སྙིང་གཤམ་དེ་ལ་སྙིང་ཆུ་གཙག་པའི་གསང་གཉིས། བྲང་ངོས་ཏེ་ནང་དུ་ཚོན་གང་བཅལ་བ་རགས་པ་སྙིང་གི་ལོགས་གཉིས་ཡིན་ལ། དེ་ནི་ཆུ་སེར་དང་བད་རླུང་རླངས་པ་འཁྱིམས་པ་སོགས་ཀྱི་གསང་ངོ་། དེ་ནས་ན་ངོས་ལ་སླར་དཀར་ནག་མཚམས་ཕྱོགས་སུ་ཚོན་གང་བཅལ་བ་གཉིས་གློ་སྙིང་འདོམ་པའི་གསང་ཡིན་ཏེ་གྲང་བ་དང་རླུང་སེལ་ཞིང་། རྒྱབ་ཀྱི་ཚིགས་པ་བདུན་པའི་དབུས་དང་གཡས་གཡོན་ཚོན་རེ་གཞལ་བའི་ཁ་གསུམ་ཀྱང་དེ་དང་འདྲའོ།།

སྲོག་རྩའི་གསང་། སྲོག་རྩའི་གསང་ས་རྒྱབ་ཀྱི་ཚིགས་པ་དྲུག་པའི་དབུས་དང་གཡས་གཡོན་གྱི་ཚོན་རེ་གཞལ་བའི་ཁ་གསུམ་ཡིན་ཏེ། དེའང་གཡོན་ངོས་སུ་བྱ་འདབ་ཀྱི་གསང་བར་དུ་ནང་བརྟོལ་བྱ་དགོས་པ་དང་། སྐེ་སྟོང་ཙ་ར་ཁུང་ནས་ཐུར་དུ་ཚོན་དོ་སོར་གང་བཅལ། དེ་ནས་གཡས་གཡོན་ཚོན་རེ་ཕུན་རེ་བཅལ་བ་བྱ་རོག་མིག་སྟེ་དེ་ནས་ཕྱིར་ཚོན་གང་བཅལ་བའི་ས་རྩིབ་བར་གོང་མ་གོ་ཆེན་དང་དེ་ནས་ཐུར་ཚོན་གང་རེ་བཅལ་བ་འོག་མ་གོ་ཆུང་གི་གསང་དང་། སྐེ་སྟོང་ཙ་ར་ཁུང་དང་བཅས་པའི་རྣམ་པ་ལྔ་པོ་དེ་ནི་གློ་བ་དང་སྙིང་དང་མཆིན་པའི་གསང་སྟོད་དེ་དག་ཏུ་རླངས་པ་འཁྱིམས་པ་དང་། སྙིང་འཆུས་པ་དང་སྟོད་ཁེངས་པ་དང་དབུགས་བརྩེགས་པའི་ནད་རྣམས་ལ་དབྱེ་བར་བྱའོ།།

གློ་གསང་། གློ་བ་ལ་གསང་ས་ཉི་ཤུ་རྩ་གཉིས་ཡོད་དེ། སོག་འདབ་ཀྱི་རྩིབ་མའི་གཡས་གཡོན་གྱི་གོ་བར་ཚིགས་པ་བདུན་པ་ནས་གཡས་གཡོན་དུ་ཚོན་གསུམ་རེ་དང་། དེ་ནས་ཡས་མས་ལ་ཚོན་རེ་རྣམ་པ་གསུམ་གསུམ་ནི་གློ་བའི་སྒང་ལ་སྐྲན་ཞུགས་པའི་གསང་དྲུག་ཡིན་ཞིང་། མཆན་འོག་ནས་ཐུར་དུ་ཚོན་གང་དང་པོ་དེ་ནས་ཚོན་གང་གཉིས་པ། དེ་ནས་ཚོན་གང་གསུམ་པ་སྟེ། རྩིབ་མའི་གཡས་གཡོན་གྱི་གོ་བར་གོང་འོག་རྣམ་པ་གསུམ་གསུམ་ནི་གློ་བ་བྱ་འདབ་ལ་སྐྲན་ཞུགས་པའི་གསང་དྲུག་ཡིན། བྲང་གི་རྩིབ་མའི་གོ་བར་གཡས་གཡོན་བཞི་བཞི་ནི་ནུ་མ་ནས་ཕྱིར་ལ་སོར་གང་བཅལ།དེ་ནས་གྱེན་དུ་སོར་གང་བཅལ་བར་གཅིག་དང་དེ་ནས་ནང་དུ་ཚོན་གང་བཅལ། དེ་ནས་གྱེན་དུ་ཚོན་གང་བཅལ་བར་གཅིག  དེ་ནས་ནང་དུ་སོར་གང་ཕུན་གང་བཅལ། དེ་ནས་གྱེན་དུ་ཚོན་གང་བཅལ་བར་གཅིག  དེ་ནས་ནང་དུ་སོར་གང་ཕུན་གང་བཅལ། དེ་ནས་གྱེན་དུ་ཚོན་གང་བཅལ་བར་གཅིག་སྟེ་དེ་རྣམས་ནི་གློ་བ་བུ་ལ་སྐྲན་ཞུགས་པའི་གསང་བརྒྱད་ཡིན་། གློ་བའི་རྒྱབ་གསང་ནི་ཚིགས་པ་བཞི་པ་དང་ལྔ་པ་གཉིས་ཀྱི་གཡས་གཡོན་དུ་ཚོན་རེ་བཅལ་བ་ཁ་གསུམ་རླུང་དང་བད་ཀན་གྱི་ནད་ཞུགས་པའི་གསང་ངོ་།།

X